Kaliforniye shitat mejliside Uyghurlargha a'it qarar layihesi maqulluqtin ötti

Uyghur irqiy qirghinchiliqini eyiblesh we mejburiy emgek mehsulatlirini cheklesh qarar layihesini awazgha qoyush yighinidin körünüsh. 2023-Yili 27-mart, kaliforniye shitati.

Düshenbe, yeni 27-mart küni kaliforniye shtat mejliside mejlis ezasi jéssé gabri'él (Jesse Gabriel ) teripidin tonushturulghan HR25 nomurluq Uyghur irqiy qirghinchiliqini eyiblesh we mejburiy emgek mehsulatlirini cheklesh qarar layihesi yighin'gha qatnashqan 79 neper mejlis ezasining toluq awaz bérishi bilen qobul qilin'ghan.

Qarar layihesini awazgha qoyush yighinigha sherep méhmini süpitide qatnashqan amérikadiki Uyghur kishilik hoquq qurulushining diréktori ömer qanat ependining bildürüshiche, 27-mart küni chüshtin kéyin kaliforniye shitat mejliside échilghan yighinda, yehudiylardin kélip chiqqan mejlis ezasi jéssé gabri'él teripidin otturigha qoyulghan HR25 nomurluq Uyghur irqiy qirghinchiliqini eyiblesh we mejburiy emgek mehsulatlirini cheklesh qarar layihesi qobul qilindi. Mezkur qarar layiheside herqaysi shtatlardiki hökümet organliri Uyghur irqiy qirghinchiliqini eyibleshke we dunyadiki dangliq marka shirketliri Uyghur mejburiy emgikige chétishliq mehsulatlar bilen bolghan munasiwetlirini üzüsh üchün tedbir élishqa chaqirilghaniken.

Yighinning neq meydan sin körünüshide, mezkur qarar layihesini otturigha qoyghan parlamént ezasi jéssé gabri'él nöwettiki Uyghurlar uchrawatqan irqiy qirghinchiliq weziyitini tonushturup, Uyghurlarning qul emgiki bedilige ishlepchiqirilghan mehsulatlargha qarita cheklesh tedbiri élishning muhimliqi we texirsizlikini tekitligen.

UHRP

Jéssé gabri'él sözide xitayda éghir kishilik hoquq depsendichilikige uchrawatqan Uyghurlargha qaritilghan irqiy qirghinchiliqning musulmanlarning ramzan éyi mezgilidimu dawam qiliwatqanliqini bildürgen.

U, sözide Uyghurlargha yürgüzülüwatqan irqiy qirghinchiliq siyasitining Uyghurlarning milliy kimlikini yoqitish, diniy étiqadini yoqitish, ana tilini qollinishtin mehrum qaldurush, medeniyet jehette assimilyatsiye qilish, Uyghurlarni mejburiy emgekchilerge aylandurush qatarliq köp xil shekillerde dawam qiliwatqanliqini bildürgen. U, nöwette eng az dégendimu bir milyondin ikki milyon'ghiche insanning türme we lagérlarda qamaqliq ikenlikini alahide tekitligen. U yene yighin meydanidiki lagér shahitlirining ismini birmu-bir tilgha élip, ularning xitay hökümitining insaniyetke qarshi bu jinayetlirining guwahchiliri ikenlikini bildürgen.

Uyghur kishilik hoquq qurulushining diréktori ömer qanat ependining bildürüshiche, mezkur qarar layihesini tonushturghan jésse gabri'él ependi sözide yene yighin'gha sherep méhmini süpitide qatnashqan lagér shahitlirining bu qarar layihesining maqullinishi üchün élip barghan pa'aliyetlirige alahide minnetdarliqini ipadiligen.

UHRP

Ömer qanat ependi yene özlirining 27-mart küni yighin échilishtin ilgiri kaliforniyediki bir qisim mejlis ezaliri bilen körüshüp, ulardin shu küni chüshtin kéyin otturigha qoyulidighan Uyghurlar heqqidiki qarar layihesige awaz qoshushini telep qilish pa'aliyetliride bolghanliqini bildürdi.

Gollandiye we firansiyedin kélip, yighin'gha sherep méhmini süpitide qatnashqan lagér shahitliridin qelbinur sidiq xanim we gülbahar xatiwaji xanimmu ziyaritimizni qobul qildi.

Qelbinur xanim, özlirining kaliforniye shitat mejlis ezaliri bilen körüshüp, ulargha irqiy qirghinchiliqqa uchrawatqan Uyghurlar weziyiti we özlirining xitay lagérliridiki kechmishlirini anglatqanliqini bildürdi.

Gülbahar xatiwaji xanim bolsa, ular körüshken mejlis ezalirining zor köp qismining ayallar ikenlikini, ulargha özlirining lagérlardiki kechmishlirini anglatqanliqini bayan qildi. U, erler lagéri we ayallar lagérigha ayrim-ayrim qamilip, mejburiy emgekke sélin'ghan Uyghur er-ayalliri we ata-aniliridin mejburiy ayriwétilip, “Perishtiler mektipi” namidiki balilar lagérlirigha qamalghan Uyghur balilirining échinishliq qismetlirining parlamént ezaliri alahide köngül bölgen mesililer bolghanliqini bildürdi.

Yuqiriqi awaz ulinishidin tepsilatini anglaysiler.