"Uyghur kishilik hoquq siyasiti qanun layihesi" ge imza qoyghan amérika kéngesh palata ezalirining sani üzlüksiz köpeymekte

Muxbirimiz sada
2019-07-25
Élxet
Pikir
Share
Print
"Xitaydiki diniy erkinlik: Uyghurlarni depsende qiliwatqan teqib téxnikisini bahalash" témisidiki yighinda shimaliy karolina shtatining sanatori som tills söz qilmaqta. 2019-Yili 24-iyul, washin'gton.
"Xitaydiki diniy erkinlik: Uyghurlarni depsende qiliwatqan teqib téxnikisini bahalash" témisidiki yighinda shimaliy karolina shtatining sanatori som tills söz qilmaqta. 2019-Yili 24-iyul, washin'gton.
RFA/Sada

24-Iyul washin'gtondiki "Driksin" kéngesh palatasi xizmet binasida "Xitaydiki diniy erkinlik: Uyghurlarni depsende qiliwatqan teqib téxnikisini bahalash" témisida bir yighin échilghan. Mezkur yighin amérika kéngesh patalasining kishilik hoquq komitéti teripidin échilghan bolup, échilish murasimida mezkur komitétning re'isliridin démokratlar partiyesidin bolghan kris kons we jumhuriyetchiler partiyesidin bolghan som tills söz qilghan.

Mezkur yighin'gha yene Uyghur kishilik hoquq qurulushining diréktori ömer qanat, amérikadiki xelq'araliq diniy erkinlik komitéti xitay ishliri diréktorining yardemchisi tina myuford, amérikadiki erkinlik sariyining aliy derijilik tetqiqatchisi sara kuk qatarliqlarmu qatnashqan we Uyghur mesilisi heqqide muhim söz qilghan.

Uyghur diyarining nöwettiki weziyiti heqqide söz qilghan ömer qanat ependi 25-iyul radiyomiz ziyaritini qobul qilip, yighinda otturigha qoyulghan nuqtilar heqqide tepsiliy melumat berdi.

Ömer qanat ependining bildürüshiche, amérika kéngesh palatasi kishilik hoquq komitétining re'isliridin kris kons "Uyghur kishilik hoquq siyasiti qanun layihesi" ge imza qoyup bolghan iken. Mezkur qanun'gha téxi imza qoymighan jumhuriyetchi som tills mezkur yighinda söz qilip, özining bu qanun layihesining testiqlinishi üchün küch chiqiridighanliqini bildürgen hemde bu layihege imza qoyghan.

Yéqindin buyan amérika hökümitidiki nopuzluq erbablarni "Uyghur kishilik hoquq qanun layihesi" ge imza qoydurush yolida tirishchanliq körsitiwatqan Uyghur pa'aliyetchilerdin amérika alem qatnishi idarisining optik inzhénéri, doktor erkin sidiq ependi mezkur heriketning yéqinqi tereqqiyati heqqide toxtilip ötti.

Uyghur diyarida 800 mingdin üch milyon'gha qeder Uyghur we bashqa türkiy milletlerning xitay hökümitining jaza lagérlirigha solan'ghanliqi ashkarilan'ghandin kéyin, amérika dölet mejlisi Uyghurlarni qoghdash meqsitide ikki qanun layihesini tonushturghan idi. Bularning biri "Uyghur kishilik hoquq siyasiti qanun layihesi" bolup, bu layihe 2018-yili noyabirda amérika kéngesh palata ezasi marko rubiyo we awam palata ezasi kristofir simit qatarliq 25 neper sénator teripidin tonushturulghan. Bularning yene biri "Uyghur qanun layihesi" bolup, mezkur layihe 2018-yili dékabirda amérika dölet mejlisi asiya tarmaq komitétining re'isi ted yohu we hey'et ezasi bred shérman qatarliq sekkiz neper dölet mejlisi ezasining birlikte imza qoyushi bilen otturigha qoyulghan.

Ömer qanat ependi sözi dawamida mushu ikki qanun layihesi toghrisidimu toxtilip, amérika dölet mejlisining bu ikki qanunni birleshtürüp téximu küchlük bir qanun layihesi tüzüp chiqish yolida izdiniwatqanliqini bildürdi.

Erkin sidiq ependining bildürüshiche, nöwette "Uyghur kishilik hoquq qanun layihesi" ning kéngesh palatasidin maqulluqtin ötüsh éhtimalliqi yuqiri iken. Emma nöwette amérika dölet mejlisi ezalirining tetil waqti yéqinliship qalghachqa, mushuningdin burun barliq kéngesh palata ezalirining mezkur qanun layihesige imza qoyup bolushi buning testiqlinishi üchün türtkilik rol oynaydiken.

Toluq bet