Уйғур қуллуқ әмгики мәсилиси әнглийә һөкүмити билән парламент арисидики талаш-тартишқа сәвәб болған

Әнглийә енергийә министири ед милибанд өткән һәптиниң ахири әнглийә енергийә қануниға киргүзүлгән қуллуқ әмгәккә мунасивәтлик түзитишкә қарши туридиғанлиқини билдүргәндин кейин, кәң парламент әзалириниң наразилиқини қозғиған. Бу киргүзүлгән түзитиштә һөкүмәтниң қуллуқ әмгәк арқилиқ ишләп чиқирилған мәһсулатларни чәклиши оттуриға қоюлған.

Әнглийәдә чиқидиған күндилик хәвәрләр гезитидә ейтилишичә, енергийә министири милибанд өткән җүмә күни әнглийә енергийәсиниң 180 милйон понд-стерлиң қиммитидики тунҗи қурулушини оттуриға қойған болуп, униңда 200 мәктәпниң өгзисигә күнтахта бекитилидикән. Милибанд мухбирларниң соалиға җаваб бәргинидә бир қисим күнтахтиларниң хитайдин келидиғинини етирап қилған.

Әнглийә парламент әзаси давид алтон буниңға наразилиқ билдүрүп, өзиниң твиттер һесабида уйғур қуллуқ әмгики арқилиқ ясалған күнтахтиларни ишлитишниң әхлақсизлиқ икәнлики вә буниңда әнглийәниң қоли болмаслиқиға чақириқ қилди.

Әнглийәдики йәһудий чоң қирғинчилиқтин қутулуп қалған дорит оливер волф ханим бу мәсилә үстидә әнглийә вәзири кейр стармерға хәт йезип, униң тарихтин савақ елип җиддий һәрикәткә өтүшини тәләп қилған. Дорит ханим вәзиргә язған хетидә, “бүгүн мениң көңлүмгә еғир кәлгән уйғур мәҗбурий әмгәк мәсилиси үстидә сизниң күчлүк һәрикәт елип беришиңизни сораймән” дегән.

Дорит ханим хетидә йәнә, “әнглийәниң енергийә қануни сизниң һөкүмитиңизгә зор пурсәт яритип бәрди. Йәни пүтүн дуняниң алдида әнглийәниң заманивий қуллуқ мәһсулатиниң әхләт сандуқи әмәсликини билдүридиған пурсәттур. Чүнки бу йеңилинидиған енергийә саһәси уйғур мәҗбурий әмгикиниң қени билән боялған” дегән.

Дорит ханим хетиниң ахирида, “мән өмүр бойи өзәмниң бешидин өткән иссиқ-соғақларни сөзләш арқилиқ <қайта тәкрарланмаслиқ> дегәнниң бир қуруқ сөзла болуп қалмаслиқини арзу қилимән. Әмма мән <қайта тәкрарланмаслиқ> ниң <қайта-қайта тәкрарлиниш> икәнликини көрдүм” дегән.

Дорит оливер волф ханим бу йил 89 яшқа киргән болуп, у 5 яш вақтидила натсистлардин қечип югославийәдә йошурунуп йетип аман қалған икән.