“Bügünki dewr Uyghur shé'irliri toplimi” namliq kitap istanbulda neshir qilindi

31 Neper Uyghur sha'irining 125 parche esiri kirgüzülgen “Bügünki dewr Uyghur shé'irlar toplimi” yéqinda türkiye paradigma akadémiyesi teripidin türk tilida neshir qilin'ghan.

Mezkur toplam dunya Uyghur yazghuchilar uyushmisi teripidin neshrge teyyarlan'ghan bolup, bu Uyghur bügünki dewr sha'irlirining tunji türkche shé'irlar toplimi iken.

Mezkur toplamgha weten ichi sirtidiki tonulghan Uyghur sha'irlirining bügünki dewir Uyghur edebiyatigha wekillik qilalaydighan shé'iri eserliri kirgüzülgen. Mezkur toplamgha eserliri kirgüzülgen sha'irlardin wahitjan osman, abduqadir jalalidin, perhat tursun, shahip abdusalam nurbeg, adil tuniyaz, ablet abduréshit berqiy qatarliq sha'irlarning xitay hökümiti teripidin yighiwélish lagéri yaki türmilerge solan'ghanliqi melum.

“Bügünki dewir Uyghur shé'irliri toplimi” ning kirish sözini yazghan ege uniwérsitétining piroféssori doktor alimjan inayet ependi bu heqte ziyaritimizni qobul qildi. U mezkur kitabning Uyghur hazirqi zaman shé'iriyitining yuqiri sewiyesini eks ettürüp béridighanliqini, bu kitabning yash sha'irlarning ijadiyet qabiliyitini namayen qilish bilen birge yene Uyghur xelqining chongqur kirzis tuyghusini, rohiy halitini, ichki dunyasini we kelgüsige bolghan arzu-ümidlirini eks ettürgenlikini éytti.

“Bügünki dewir Uyghur shé'irliri toplimi” amérikidiki Uyghur sha'iri tahir hamut izgil teripidin teyyarlan'ghan bolup, toplamgha kirgüzülgen shé'irlar alimjan metqasim, erkan qadir, enwer hamit we mehzun qatarliq edebiy terjimanlar teripidin terjime qilin'ghan.

Sha'ir we edebiy terjiman alimjan metqasim ziyaritimizni qobul qilip, mezkur kitabning terjime qilinish we tüzülüsh jeryani heqqide anglighuchilargha tepsiliy melumat berdi.

Ilim sahesidiki ziyaliylar Uyghur edebiyati we Uyghur medeniyitini tonushturushning Uyghurlarning nöwettiki siyasiy weziyitini tonushturushta muhim ehmiyetke ige ikenlikini tekitlimekte.

Dunya Uyghur yazghuchilar jem'iyitining bash katipi abdüshükür muhemmet ependi ziyaritimizni qobul qilip, Uyghur edebiyatidiki wekillik sha'irlarning shé'irliri kirgüzülgen mezkur kitab heqqide köz qarashlirini anglarmenler bilen ortaqlashti. U yene Uyghurche edebiy eserlerning chet el tillirigha terjime qilinishining ehmiyitini tekitlidi.

Dunya Uyghur yazghuchilar uyushmisi 2018-yili qurulghandin bolup, muhajirettiki Uyghur edebiyatining tereqqiyati we Uyghurche edebiy eserlerning chet el tillirigha terjime qilinishida muhim xizmetlerni qilip kelmekte.