Uyghur siyasiy aktiplirining gérmaniye parlaméntidiki pa'aliyetliri dawamlashmaqta

24-Iyundin bashlap d u q re'isi dolqun eysa, d u q bérlin ishxanisining mudiri gheyur qurban, merkizi washin'gtondiki Uyghur herikiti teshkilatining rehbiri roshen abbas, Uyghur tetqiqat merkizining diréktori abdulhakim idris, türkiyediki adwokat we siyasiy aktip jewlan shirmemet qatarliqlardin terkib tapqan bir guruppa Uyghur wekilliri gérmaniye parlaméntida pa'aliyet élip bérishqa bashlighan.

RFA/Ekrem

D u q re'isi dolqun eysa ependi bügün 25-iyun bu heqte ziyaritimizni qobul qilghanda, bu qétimqi bérlin ziyaritining asasliq meqsitining gérmaniye parlaménti Uyghur dostluq guruppisining qosh re'isi pétér haylit (Peter Heilt) qatarliqlar bilen uchriship, aldimizdiki künlerde élip baridighan pa'aliyetlerning pilan pirogrammilirini ortaq muzakire qilishtin ibaret ikenlikini eskertti.

RFA/Ekrem

Uyghur herikiti teshkilatining rehbiri roshen abbas xanim bu xususta toxtalghanda, özlirining parlamént ezasi pétér haylit qatarliqlar bilen Uyghur irqiy qirghinchiliqigha xatime bérish mesilisi üstide söhbet ötküzgenlikini, shuning bilen birge 24-iyun kechte merkizi bérlindiki “Aksélsprin'gér erkinlik fondi” ning orunlashturushi bilen “Hedemni izdeymen” namliq filimni körsitip, sherqiy türkistandiki irqiy qirghinchiliqning heqiqiy yüzini yorutup bérishke tirishqanliqini tilgha aldi.

Gérmaniye parlaméntidiki bu pa'aliyetler heqqide toxtalghan d u q bérlin ishxanisining mudiri gheyur qurban ependi bu ziyaretning ehmiyetlik bolghan tereplirini tilgha alghanda, buning Uyghur xelqining erkinlik we hörlük yolidiki tirishchanliqlirigha qarita estayidil hem jiddiy bir pozitsiyening ipadisi ikenlikini, uzun mezgillik emgekler netijiside, Uyghurlar mesilisining hazir gérmaniyening dölet siyasitide her xil shekillerde eks étiwatqanliqini ipade qildi.

Uyghur tetqiqat merkizining diréktori abdulhakim idris ependining bildürüshiche, bu qétimqi gérmaniye parlaméntida ötküzülgen söhbette, Uyghurlar mesilisini xelq'ara küntertipte tutup turush üchün némilerni qilish lazimliqini muzakire qilish bilen birge, Uyghurlar nöwette duch kéliwatqan irqiy qirghinchiliq we insaniyetke qarshi jinayetni gérmaniye parlaméntida dawamliq otturigha qoyush mesilisi toghruluqmu pikir almashturushlar bolghan.

Türkiyedin kelgen adwokat we siyasiy aktip jewlan shirmemetning bayan qilishiche, gérmaniye parlaméntida élip bérilghan bu uchrishishlarda, Uyghur teshkilatlirining gérmaniye parlaménti bilen birliship aldimizdiki yillarda ortaq élip baridighan bir yürüsh pa'aliyetlirining muzakirisi bolghanliqini eskertti.

Uyghur siyasiy aktiplirining bergen melumatlirigha qarighanda, ular bügün, yeni 25-iyun küni chüshtin kéyin yene gérmaniye kishilik hoquq komitétining bezi rehberliri hemde parlamént ezaliri bilen uchriship, Uyghur irqiy qirghinchiliqigha da'ir témilarda söhbetler élip baridiken.