Ana weten xewpsizliki ministiri mayorkas, Uyghur siyasiy panahlan'ghuchiliri mesilisining qolaylashturulushqa merkezleshkenlikini bildürdi

Washin'gtondin muxbirimiz erkin teyyarlidi
2024.07.10
Alejandro-Mayorkas-AP Amérika ana weten xewpsizliki ministiri alixandro mayorkas (Alejandro Mayorkas) birleshme agéntliqning ziyaritini qobul qiliwatidu. 2024-Yili 21-iyun, washin'gton
AP

Amérika ana weten xewpsizliki ministiri alixandro mayorkas (Alejandro Mayorkas) 9-iyul washin'gtondiki nopuzluq bir aqillar ambirida ötküzülgen Uyghur mejburiy emgikining yéngi fironti” namliq doklat bérish yighinida, Uyghur siyasiy panahlan'ghuchilirining mesilisining qolaylashturulushqa merkezleshkenlikini bildürgen. Mayorkasning tekitlishiche, éksplatatsiye jinayitidiki eng muhim halqa shexslerning tesirige uchrishi bolup, shunga amérika ana weten xewpsizliki ministirliqi éksplatatsiye jinayitining ziyankeshlikige uchrighuchi shexslerni merkizi nuqta qilish yolini tutmaqtiken.

Alixandro mayorkas 9-iyul washin'gtonni baza qilghan “Xelq'ara we istratégiye tetqiqat merkizi” aqillar ambirida élan qilghan söhbette, amérika ana weten xewpsizliki ministirliqining amérika “Uyghur mejburiy emgikining aldini élish qanuni” ijra qilinishqa bashlighan 2022-yilidin buyan érishken utuqlar we duch kéliwatqan xirislar, shundaqla buningdin kéyin qilinidighan xizmetler heqqide toxtalghan.

Mayorkas, éksplatatsiye jinayitining shexske bolghan tesiri seweblik ziyankeshlikke uchrighuchi shexsning bu yerdiki merkizi amil ikenliki, shundaqla Uyghur siyasiy panahlan'ghuchilirining panahliq mesilisini qolaylashturushqa merkezleshkenlikini éytqan. Mayorkas mundaq dégen: “Uyghur jama'etchilikining mesiliside, eger birersi méni chetke tartip sorisa, men bu jama'etchiliktiki kishilerning siyasiy panahliq iltimasini béjirishni qolaylashturushqa kapaletlik qilishning merkezleshkenlikini éytalaymen” dégen. Lékin mayorkas sözide Uyghurlarning siyasiy panahliq iltimasining konkrét qandaq qolaylashturulghanliqigha a'it tepsiliy chüshenche bermigen.

Mayorkasning qeyt qilishiche, “Uyghur mejburiy emgikining aldini élish qanuni” ijra qiliniwatqan ikki yildin béri, Uyghur mejburiy emgiki mehsulatlirining amérika bazirigha kirishini chekleshte nurghun utuqlargha érishish bilen bir waqitta yene bezi xirislarghimu duch kélin'gen.

Mayorkas mundaq deydu: “Sözni biz duch kelgen riqabettin bashlisam, ochuq-ashkara bolmasliq bezi hallarda yer shari teminlesh zenjirini éniqlashta duch kélidighan muhim riqabettur. Yene bir muhim riqabet mejburiy emgek mehsulati bilen qanunluq soda yaki qanunluq mal yötkeshni bir-biridin perqlendürüsh, ularni arilashturup qoymasliqtur. ”

Lékin mayorkas, yene “Uyghur mejburiy emgikining aldini élish qanuni” yolgha qoyulup qisqighine ikki yil ichide zor utuqlargha érishilgenlikini tekitleydu. Uning körsitishiche, ular bu ikki yilda mejburiy emgekke chétishliq qimmiti 3. 4 Milyart dollarliq 9 ming mal yollanmisini toxtitip qoyghan, 68 shirketni qara tizimlikke kirgüzgen, shundaqla xelq'ara we karxanilar bilen keng shérikchilik munasiwiti shekillendürgen.

Mayorkas mundaq deydu: “Belkim, ikki yil uzundek bilinishi mumkin. Lékin yéngi bir qanunni chiqirish, uni ijra qilish we netijige érishish üchün ikki yil nahayiti azliq qilidu. Biz nahayiti téz heriket qilduq. ”

Mayorkas, özlirining “Uyghur mejburiy emgikining aldini élish qanuni” ni qattiq ijra qilishta qanun ijra qilishning özlirining wezipisi bolupla qalmay, belki bu qanunning merkizide insanlar chékiwatqan iztirapning yatqanliqini bildürgen. Mayorkasning qeyt qilishiche, “Uyghur mejburiy emgikining aldini élish qanuni” nurghun sahelerning teminlesh zenjirige tesir körsetken polisilikon teminlesh zenjiri körünerlik tesirge uchrighan sahelerning biri iken. Halbuki, “Sherqiy asiya munbiri” torining bildürüshiche, nöwette dunya küntaxta teminlesh zenjirining 80 pirsenttin köpreki xitayda, dunyadiki polisilikonning texminen 35 pirsenti Uyghur élide ishlepchiqirilmaqta iken.

Mayorkas “Xelq'ara we istratégiye tetqiqat merkizi” diki söhbette “Uyghur mejburiy emgikining aldini élish qanuni” seweblik xelq'ara polisilikon teminlesh zenjirining Uyghur élidin yötkiliwatqanliqini éytqan.

Mayorkas mundaq deydu: “Küntaxtigha ishlitilidighan polisilikonni alsaq, polisilikon teminlesh zenjirining shinjangdin ibaret küntaxtigha ishlitilidighan eng muhim polisilikon ishlepchiqirish bazisigha tayinishtin zor kölemde yiraqlishiwatqanliqi, teminlesh zenjirining bu jaydin bashqa jaygha yötkiliwatqanliqini körimiz. Men shuninggha ishinimenki 2026-yiligha barghanda shimaliy amérika we hindistanning küntaxta derijilik polisilikon ishlepchiqirishi 200 pirsentkiche éshishi mumkin. ”

Mayorkas Uyghur mejburiy emgiki mehsulatlirini chekleshte zor utuqlargha érishkenlikini qeyt qilsimu, emma Uyghur teshkilatliri buning yéterlik emeslikini qeyt qilmaqta. “Xelq'ara we istratégiye tetqiqat merkizi” diki yighin'gha qatnashqan “Amérika Uyghur birleshmisi” ning re'isi elfidar éltebir, amérika ana weten xewpsizliki ministirliqining Uyghur mejburiy emgikige chétishliq shirketler qara tizimlikini téximu kéngeytishi kéreklikini tekitleydu.

Elfidarning 9-iyul muxbirimizning bu heqtiki ziyaritini qobul qilghanda körsitishiche, Uyghur mejburiy emgiki peqet emgek hoquqlirini depsende qilish bilenla cheklinip qalmaydiken. U, mejburiy emgek Uyghur irqiy qirghinchiliqining bir parchisi ikenlikini bildüridu.

 “Xelq'ara we istratégiye tetqiqat merkizi” diki bu qétimliq söhbet, Uyghur élide mejburiy emgekning téximu kölemlishiwatqanliqi we sistémilishiwatqanliqi, Uyghurlarning “Yötkep ishqa orunlashturush” namida dawamliq xitay ölkilirige yötkiliwatqanliqi qeyt qiliniwatqan bir waqitta ötküzülgen. Bu weziyetke qarita amérika ana weten xewpsizliki ministirliqining rehberlikidiki “Amérika Uyghur mejburiy emgikining aldini élish qanuni” xizmet guruppisi yéqinda qara tizimlikni kéngeytip, xitayning alyumin, ayaq kiyim-kéchek, déngiz mehsulatliri we toqumichiliq sahesidiki bezi karxanilirini tizimlikke kirgüzgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.