Уйғур сот коллегийәси “хитай һөкүмити уйғурлар үстидин ирқий қирғинчилиқ қилмақта” дәп һөкүм чиқарди

Мухбиримиз мәмәтҗан җүмә
2021.12.09
Уйғур сот коллегийәси “хитай һөкүмити уйғурлар үстидин ирқий қирғинчилиқ қилмақта” дәп һөкүм чиқарди Уйғур сот коллегийәси “хитай һөкүмити уйғурлар үстидин ирқий қирғинчилиқ қилмақта” дәп һөкүм чиқарди. 2021-Йили 9-декабир.
Photo: RFA

Әнглийәниң лондон шәһиригә җайлашқан “уйғур сот коллегийәси” хитай һөкүмити уйғурлар үстидин ирқий қирғинчилиқ қилмақта, дәп һөкүм чиқарди. Мәзкур сот коллегийәси йәнә бу җинайәтләргә хитай компартийәсиниң баш секритари ши җинпиң, уйғур аптоном районлуқ парткомниң секретари чен чуәнго қатарлиқларниң биваситә җавабкар икәнликини билдүрди.

Уйғур сот коллегийәсиниң 9-декабир ечилған һөкүм елан қилиш йиғинида йәнә хитайниң уйғур вә башқа түркий милләтләр үстидин инсанийәткә қарши җинайәт садир қиливатқанлиқиму җакарланди.

Уйғур сот коллегийәсиниң баш сотчиси сир җеффрей найс сот коллегийәсидә оқуп өткән ахириқи һөкүмнамидә, хитай хәлқ җумһурийити уйғурлар үстидин аталмиш “нопусни әлалаштуруш” нишани билән “туғут чәкләш вә туғут нисбитини төвәнлитиш арқилиқ нопусини узақ муддәт қисқартиш мәқситигә йетиш үчүн қәстән, системилиқ вә бир гәвдиләшкән сиясәткә йүргүзгән” ликини, буниң бирләшкән дөләтләр тәшкилатиниң “ирқий қирғинчилиқиниң алдини елиш әһдинамиси” дики ирқий қирғинчилиққа берилгән изаһатларға дәл чүшидиғанлиқини билдүрди.

У йәнә мундақ деди: “сот мәһкимиси ши җинпиң, чен чуәнго вә хитай хәлқ җумһурийити һәмдә хитай компартийәсиниң башқа юқири дәриҗилик әмәлдарлириниң шинҗаңдики қилмишларниң баш җавабкарлири икәнликини дәлиллиди.”

Һөкүмәтсиз вә мустәқил “уйғур сот коллеәийәси” дуня уйғур қурултийиниң тәшәббуси билән 2020-йили қурулған. Әнглийәлик адвокат вә хәлқара кишилик һоқуқ адвокати сир җеффрей найс мәзкур сотниң рәислики, йәни баш сотчилиқини үстигә алған.

Уйғур сот коллегийәси бу йил июндин башлап аз дегәндә 3 қетим гуваһлиқ бериш вә испат аңлаш йиғини ачқан.

Радийомиз зияритини қобул қилған дуня уйғур қурултийи иҗраийә комитетиниң муавин рәиси илшат һәсәнниң билдүрүшичә, мәзкур сот коллегийәсиниң хитайниң уйғурлар үстидин йүргүзүватқан җинайәтлирини ирқий қирғинчилиқ, дәп җакарлиши тарихий вә сиясий әһмийәткә игә икән.

Хитай һөкүмити мәзкур сот коллегийәси қурулғандин буян уни “хитайға қарши комедийә” дәп инкар қилип келиватқан иди. Әмма көзәткүчиләр, мәзкур сот коллегийәсниң чиқарған һөкүминиң хитайни қаттиқ биарам қилидиғанлиқини тәхмин қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.