Uyghur sot kollégiyesi “Xitay hökümiti Uyghurlar üstidin irqiy qirghinchiliq qilmaqta” dep höküm chiqardi

Muxbirimiz memetjan jüme
2021.12.09
Uyghur sot kollégiyesi “Xitay hökümiti Uyghurlar üstidin irqiy qirghinchiliq qilmaqta” dep höküm chiqardi Uyghur sot kollégiyesi “Xitay hökümiti Uyghurlar üstidin irqiy qirghinchiliq qilmaqta” dep höküm chiqardi. 2021-Yili 9-dékabir.
Photo: RFA

En'gliyening london shehirige jaylashqan “Uyghur sot kollégiyesi” xitay hökümiti Uyghurlar üstidin irqiy qirghinchiliq qilmaqta, dep höküm chiqardi. Mezkur sot kollégiyesi yene bu jinayetlerge xitay kompartiyesining bash sékritari shi jinping, Uyghur aptonom rayonluq partkomning sékrétari chén chu'en'go qatarliqlarning biwasite jawabkar ikenlikini bildürdi.

Uyghur sot kollégiyesining 9-dékabir échilghan höküm élan qilish yighinida yene xitayning Uyghur we bashqa türkiy milletler üstidin insaniyetke qarshi jinayet sadir qiliwatqanliqimu jakarlandi.

Uyghur sot kollégiyesining bash sotchisi sir jéffréy nays sot kollégiyeside oqup ötken axiriqi hökümnamide, xitay xelq jumhuriyiti Uyghurlar üstidin atalmish “Nopusni elalashturush” nishani bilen “Tughut cheklesh we tughut nisbitini töwenlitish arqiliq nopusini uzaq muddet qisqartish meqsitige yétish üchün qesten, sistémiliq we bir gewdileshken siyasetke yürgüzgen” likini, buning birleshken döletler teshkilatining “Irqiy qirghinchiliqining aldini élish ehdinamisi” diki irqiy qirghinchiliqqa bérilgen izahatlargha del chüshidighanliqini bildürdi.

U yene mundaq dédi: “Sot mehkimisi shi jinping, chén chu'en'go we xitay xelq jumhuriyiti hemde xitay kompartiyesining bashqa yuqiri derijilik emeldarlirining shinjangdiki qilmishlarning bash jawabkarliri ikenlikini delillidi.”

Hökümetsiz we musteqil “Uyghur sot kollée'iyesi” dunya Uyghur qurultiyining teshebbusi bilen 2020-yili qurulghan. En'gliyelik adwokat we xelq'ara kishilik hoquq adwokati sir jéffréy nays mezkur sotning re'isliki, yeni bash sotchiliqini üstige alghan.

Uyghur sot kollégiyesi bu yil iyundin bashlap az dégende 3 qétim guwahliq bérish we ispat anglash yighini achqan.

Radiyomiz ziyaritini qobul qilghan dunya Uyghur qurultiyi ijra'iye komitétining mu'awin re'isi ilshat hesenning bildürüshiche, mezkur sot kollégiyesining xitayning Uyghurlar üstidin yürgüzüwatqan jinayetlirini irqiy qirghinchiliq, dep jakarlishi tarixiy we siyasiy ehmiyetke ige iken.

Xitay hökümiti mezkur sot kollégiyesi qurulghandin buyan uni “Xitaygha qarshi komédiye” dep inkar qilip kéliwatqan idi. Emma közetküchiler, mezkur sot kollégiyesning chiqarghan hökümining xitayni qattiq bi'aram qilidighanliqini texmin qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.