Qazaqistan Uyghur tenheriketchiliri dunya musabiqiliride köplep chémpiyon bolmaqta

Ixtiyariy muxbirimiz oyghan
2021.12.29
Share on WhatsApp
Share on WhatsApp
Qazaqistan Uyghur tenheriketchiliri dunya musabiqiliride köplep chémpiyon bolmaqta Dunya chémpiyoni ibrahim aytaxunof. 2021-Yil dékabir almuta.
RFA/Oyghan

Kéyinki waqitlarda qazaqistandiki Uyghur yashliri we ösmürlirining tenheriketning her xil türliride dunya musabiqilirige qatniship, yaxshi körsetküchlerni namayen qilip kéliwatqanliqi melum. Peqet kéyinki ikki ayning ichidila birnechche Uyghur tenheriketchining dunya we asiya chémpiyoni bolghanliqi heqqide ijtima'iy taratqularda xewerler tarqilip, bu, Uyghur jama'etchiliki arisida alahide diqqet qozghighanidi. Mesilen, ötken ayning otturilirida ereb birleshme xelipilikining paytexti ebu-zebide braziliyeche jyu-jitsu, yeni erkin chélishish we mushtlishish türi boyiche dunya ösmürler musabiqisi ötüp, uningda bextiyar qehriman, gülminem iminowa we iliyas abdullayéflar chémpiyon bolghanidi. Shuningdek yéqinda türkiyening antaliya shehiride ötken uniwérsal, yeni yekmuyek élishish türi boyiche töt neper qazaqistanliq Uyghur yash shu jümlidin alliyar qemirdinof, rewqet zéripof, turghanjan rasul we ilham ghapparoflar birinchilikke érishken.

Dunya chémpiyoni rénat qurbanof (soldin birinchi) 2021-yil, dékabir, sérbiye.
Dunya chémpiyoni rénat qurbanof (soldin birinchi) 2021-yil, dékabir, sérbiye.

Ammiwi axbarat wasitiliri we ijtima'iy taratqulardin igilishimizche, yéqinda özbékistan paytexti tashkentte wushu-sanda, yeni chambashchiliq, sérbiye paytexti bélgradta uniwérsal, yeni yekmuyek élishish, rusiye paytexti moskwada braziliyeche jyu-jitsu, yeni erkin chélishish we mushtlishish boyiche dunya musabiqiliri ötken iken. Ulargha qazaqistandin Uyghur tenheriketchilirimu qatnashqan.

Shularning biri almuta shehirining turghuni ibrahim aytaxunof radiyomiz ziyaritini qobul qilip, mundaq dédi: “Men özbékistanda bolidighan musabiqige yaxshi teyyarlandim. Bizning komanda bir kün burun bérip, salmaqlirimizni ölcheytuq. Musabiqige 13-14 yashliq tenheriketchiler qatnashti. Tenheriketchiler ottura asiyaning her xil memliketliridin bolup 1000din oshuq qiz-yigit küch sinashti. Bizni 52 kilogram salmaqtiki derijilerge böldi, shuning ichide men 1-orunni igilidim. Men méni mushu musabiqige teyyarlighan trénérim kamil akigha we shundaqla méni hertereplime qollap-quwwetligen ata-anamgha chong rehmitimni éytimen. Men tashkent shehiride altun médalgha ériship, qazaqistan tughini égiz kötürginimdin we Uyghur xelqining bir perzenti bolghinimdin nahayiti pexirlinimen. Buningdin kéyinmu mushundaq utuqlargha yétish üchün yene tirishimen”.

Radiyomiz ziyaritini qobul qilghan ibrahimning dadisi marat paltayéf ependi mundaq dédi: “Ibrahim 2007-yili almuta shehiride dunyagha kelgen. Hazir u mesim yaqupof namidiki 101-Uyghur gimnaziyeside 9-sinipta oquwatidu. Balam on yéshidin tartip trénéri kamil abduréyimofning rehberlikide ishlewatqan ‛sokol‚ tenheriket kulubida wushu-sanda bilen shughullinip kéliwatidu. Mushu töt yil ichide u özining tirishchanliqi arqisida köpligen utuqlargha yetti. Bir nechche qétim qazaqistanning almuta we bashqimu sheherliride ötken musabiqilerde birinchi orunlarni aldi. Emdi ibrahimning bu yilqi chong utuqi uning yéqinda özbékistan paytexti tashkent shehiride ötken ottura asiya boyiche musabiqige qatniship, asiya chémpiyoni bolghini”.

1990-Yili almuta wilayitining chélek tewesige qarashliq qaraturuq yézisida tughulghan sérbiye paytexti bélgrad shehiride ötken uniwérsal, yeni yekmuyek élishish boyiche dunya musabiqiside kümüsh médalgha érishken rénat qurbanof ziyaritimizni qobul qilip, mundaq dédi: “Tenheriket bilen 12 yéshimdin bashlap shughullinip kéliwatimen. 2002-Yili dékabir éyida tunji qétim boks boyiche meshiq zaligha bardim. U yerde méni nurmuhemmet raziyéf shagirtliqqa qobul qildi. U yerde men 2006-yilghiche boks bilen shughullinip, andin almuta shehirige kélip ta bügünki kün'giche boks, wushu sanda we sherq küreshliri boyiche meshhur tenheriket mahiri hémit toxtaxunofning qolida terbiyilinip kéliwatimen. Shu waqit ichide men boks, kikboksing, yeni chambashchiliqtin qazaqistan boyiche musabiqilerde yéngip, kikboksinng boyiche tenheriket mahiri dégen ataqqa érishtim. 2006-Yili tunji qétim yekmuyek élishish boyiche rusiyege dunya musabiqisige bérip, kümüsh médal yéngiwaldim. Kéyinki yillardimu bir nechche qétim dunya we asiya musabiqiliride, shu jümlidin xitayning béyjing shehiride ötken musabiqidimu chémpiyon boldum. Axirqi qétim sérbiyege bérip, yekmuyek élishish boyiche dunya musabiqiside kümüsh médal élip, xelq'ara derijidiki tenheriket mahiri dégen ataqqa ige boldum”.

Rénat qurbanofning éytishiche, sérbiyede 20-26-dékabir ariliqida bolup ötken musabiqige 14 memlikettin 350 etrapida tenheriketchi qatnashqaniken. Qazaqistandin ondin oshuq tenheriketchi, shu jümlidin almutadin rénat qurbanof qatnashqan.

Melumatlargha qarighanda, moskwada ötken braziliyeche jyu-jitsu, yeni erkin chélishish we mushtlishish türi boyiche dunya ösmürler musabiqisi ötüp, uningda bextiyar tayipof rehberlikidiki “Gratsiyabarra-yarkent” tenheriket kulubining shagirti Uyghur qizi gülminem iminowa üch mertem dunya chémpiyoni atiqigha érishken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.