Уйғурлар билән тибәтләр австралийәниң мелборин шәһиридә хоңкоңлуқларни қоллаш намайиши өткүзди

Уйғурлар билән тибәтләр бирлишип австралийәниң мелборин шәһиридә елип барған хоңкоңлуқларни қоллаш намайишидин бир көрүнүш. 2019-Йили 25-авғуст. Мелборин, австралийә.

Уйғурлар билән тибәтләр бирлишип австралийәниң мелборин шәһиридә елип барған хоңкоңлуқларни қоллаш намайишидин бир көрүнүш. 2019-Йили 25-авғуст. Мелборин, австралийә.

Мелборинда өткүзүлгән хоңкоңлуқларни қоллаш бирләшмә намайишиға қатнашқан австралийәлик роб әпәндим. 2019-Йили 25-авғуст. Мелборин, австралийә.

25-Авғуст австралийәниң мелборин шәһиридә хоңкоңға мәдәт бериш намайиши өткүзүлди. Намайишқа мелбориндики тибәт вә уйғурлардин башқа бирқисим хитай демократчилириму қатнашти. Мелборин шәһиридики векторийә уйғур җәмийитиниң рәиси алимҗан әпәнди мәзкур намайиш һәққидә мәлумат берип мундақ деди: “бу қетимқи намайиш хоңкоңлуқларниң йеқиндин бери давам қиливатқан өзиниң әркинлики вә демократийәсини қолға кәлтүрүш үчүн қиливатқан намайишини қоллаш йүзисидин орунлаштурулди, намайишқа һәр саһә кишилиридин 400 дин ошуқ адәм қатнашти.”

Намайишқа қатнашқан векторийә тибәт җәмийитиниң рәиси тензән кәнса намайиш һәққидә тохтилип мундақ деди: “миниң исмим тензән кәнса, векторийә тибәт җәмийитиниң рәиси вә австралийә тибәт җәмийитиниң катипи болимән. Бүгүн биз хоңкоңлуқларниң намайишини қоллаш үчүн бу йәрдә намайиш қиливатимиз. Тибәт 70 йил муқәддәм хитай тәрипидин бесивелинди. Әнә шуниңдин кийин тибәт хәлқи өзиниң әркинликидин мәһрум болди. Толиму әпсус, шинҗаң яки шәрқий түркистанму хитай тәрипидин бесивелинғандин кейин бизгә охшаш қисмәтләргә дучар болди.”

Тензән кәнса йәнә австралийә хәлқиниң хитайниң тәсиридин еһтият қилиш керәкликиниму әскәртип, мундақ деди: “биз алтә җәмийәтниң әзалири бу йәргә йиғилип өзимизниң һәрвақит хоңкоңлуқлар билән бир сәптә икәнликимизни көрситиш үчүн бу йәрдә намайиш қиливатимиз. Австралийә хәлқини тибәт, уйғур вә хоңкоңлуқларниң күлпәтлик тәқдиридин савақ елип хитайниң тәсиридин еһтият қилишини тәвсийә қилимән.”

Мәзкур намайишқа қатнашқан австралийәлик роб намайиштики тәсиратлирини биз билән ортақлишип, мундақ деди: “аддий бир австралийәлик болуш сүпитим билән австралийәдики уйғурлар билән австралийә хәлқиниң достлуқидин наһайити пәхирлинимән. Бу йәрдә тибәт вә уйғурлар билән хоңкоңдики демократийә үчүн қилиниватқан намайишқа мәдәт бериш үчүн туруватқанлиқимдин интайин хушалмән. Мушундақ бир пурсәт арқилиқ австралийә хәлқини хитайниң австралийәдики тәсиридин еһтият қилишқа чақиримән.”

Бир қанчә күндин бери таратқуларда хоңкоңдики намайишчи бир қизниң намайишчиларға хитаб қилип, “әгәр биз мәғлуп болсақ шинҗаңдики җаза лагеридикиләрниң күнигә қалимиз” дегәнлики кәң тарқалған болуп, у қиз намайиш җәрянида уйғурларниң вәзийити һәққидә тохтилип мундақ дегән: “көпчилик яхшимусиләр, мән 90-йиллардин кейин туғулған, учур-техника саһәсидә ишләйдиған бир хоңкоңлуқмән. 30 Йиллиқ һаятимдин шуни һес қилдимки, хоңкоңниң демократийәси үчүн хитай компартийәсини ағдурмисақ болмайду. Силәрниң һәрикитиңлар хитай компартийәсиниң заваллиқ дәрвазисини ачти. Биз өзимизниң һәққаний һәрикитидин ваз кәчсәк шинҗаңдики җаза лагеридикиләрниң күнигә қалимиз. Шундақ дейәләймәнки, әгәр биз мәғлуп болсақ, хоңкоң шинҗаңға айлиниду, у чағда биз җаза лагерлирида өлүшкә мәҗбур болимиз.”

Һөрмәтлик радио аңлиғучилар, хоңкоңдики намайишниң тәсири билән йеқиндин бери австралийәниң бәзи шәһәрлиридә хоңкоңлуқлар билән хитайлар оттурисида кичик даиридә тоқунушму йүз бәргәнлики таратқуларда хәвәр қилинған иди. Австралийәниң бәзи шәһәрлиридә йеқиндин бери хоңкоңлуқларни қоллаш намайиши өткүзүлгән болуп, мелбориндики бу қетимқи намайиш хоңкоңлуқларни қоллаш йүзисидин өткүзүлгән иккинчи қетимлиқ намайиш икән.