Uyghurlar bilen tibetler awstraliyening mélborin shehiride xongkongluqlarni qollash namayishi ötküzdi

Ixtiyariy muxbirimiz uchqun
2019.08.28
Uyghur-Tibet-Xongkong-Qollash-Namayishi-Awstraliye-2019-04.jpeg Uyghurlar bilen tibetler birliship awstraliyening mélborin shehiride élip barghan xongkongluqlarni qollash namayishidin bir körünüsh. 2019-Yili 25-awghust. Mélborin, awstraliye.
RFA/Uchqun

25-Awghust awstraliyening mélborin shehiride xongkonggha medet bérish namayishi ötküzüldi. Namayishqa mélborindiki tibet we Uyghurlardin bashqa birqisim xitay démokratchilirimu qatnashti. Mélborin shehiridiki wéktoriye Uyghur jem'iyitining re'isi alimjan ependi mezkur namayish heqqide melumat bérip mundaq dédi: “Bu qétimqi namayish xongkongluqlarning yéqindin béri dawam qiliwatqan özining erkinliki we démokratiyesini qolgha keltürüsh üchün qiliwatqan namayishini qollash yüzisidin orunlashturuldi, namayishqa her sahe kishiliridin 400 din oshuq adem qatnashti.”

Namayishqa qatnashqan wéktoriye tibet jem'iyitining re'isi ténzen kensa namayish heqqide toxtilip mundaq dédi: “Mining ismim ténzen kensa, wéktoriye tibet jem'iyitining re'isi we awstraliye tibet jem'iyitining katipi bolimen. Bügün biz xongkongluqlarning namayishini qollash üchün bu yerde namayish qiliwatimiz. Tibet 70 yil muqeddem xitay teripidin bésiwélindi. Ene shuningdin kiyin tibet xelqi özining erkinlikidin mehrum boldi. Tolimu epsus, shinjang yaki sherqiy türkistanmu xitay teripidin bésiwélin'ghandin kéyin bizge oxshash qismetlerge duchar boldi.”

Ténzen kensa yene awstraliye xelqining xitayning tesiridin éhtiyat qilish kéreklikinimu eskertip, mundaq dédi: “Biz alte jem'iyetning ezaliri bu yerge yighilip özimizning herwaqit xongkongluqlar bilen bir septe ikenlikimizni körsitish üchün bu yerde namayish qiliwatimiz. Awstraliye xelqini tibet, Uyghur we xongkongluqlarning külpetlik teqdiridin sawaq élip xitayning tesiridin éhtiyat qilishini tewsiye qilimen.”

Mezkur namayishqa qatnashqan awstraliyelik rob namayishtiki tesiratlirini biz bilen ortaqliship, mundaq dédi: “Addiy bir awstraliyelik bolush süpitim bilen awstraliyediki Uyghurlar bilen awstraliye xelqining dostluqidin nahayiti pexirlinimen. Bu yerde tibet we Uyghurlar bilen xongkongdiki démokratiye üchün qiliniwatqan namayishqa medet bérish üchün turuwatqanliqimdin intayin xushalmen. Mushundaq bir purset arqiliq awstraliye xelqini xitayning awstraliyediki tesiridin éhtiyat qilishqa chaqirimen.”

Bir qanche kündin béri taratqularda xongkongdiki namayishchi bir qizning namayishchilargha xitab qilip, “Eger biz meghlup bolsaq shinjangdiki jaza lagéridikilerning künige qalimiz” dégenliki keng tarqalghan bolup, u qiz namayish jeryanida Uyghurlarning weziyiti heqqide toxtilip mundaq dégen: “Köpchilik yaxshimusiler, men 90-yillardin kéyin tughulghan, uchur-téxnika saheside ishleydighan bir xongkongluqmen. 30 Yilliq hayatimdin shuni hés qildimki, xongkongning démokratiyesi üchün xitay kompartiyesini aghdurmisaq bolmaydu. Silerning herikitinglar xitay kompartiyesining zawalliq derwazisini achti. Biz özimizning heqqaniy herikitidin waz kechsek shinjangdiki jaza lagéridikilerning künige qalimiz. Shundaq déyeleymenki, eger biz meghlup bolsaq, xongkong shinjanggha aylinidu, u chaghda biz jaza lagérlirida ölüshke mejbur bolimiz.”

Hörmetlik radi'o anglighuchilar, xongkongdiki namayishning tesiri bilen yéqindin béri awstraliyening bezi sheherliride xongkongluqlar bilen xitaylar otturisida kichik da'iride toqunushmu yüz bergenliki taratqularda xewer qilin'ghan idi. Awstraliyening bezi sheherliride yéqindin béri xongkongluqlarni qollash namayishi ötküzülgen bolup, mélborindiki bu qétimqi namayish xongkongluqlarni qollash yüzisidin ötküzülgen ikkinchi qétimliq namayish iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.