Kelpin nahiyelik ma'arip idarisi xadimi: “Mekteplirimizde Uyghurche ders yoq, dölet tili omumlashti”

Muxbirimiz shöhret hoshur
2021-01-26
Share
Kelpin nahiyelik ma'arip idarisi xadimi: “Mekteplirimizde Uyghurche ders yoq, dölet tili omumlashti” Yeken 5-ottura mektep oqughuchilirigha xitayning en'eniwi pasonidiki kiyimler kiydürülüp, xitay edebiyati ögitilmekte. 2018-Yili öktebir.
xjyc.gov.con

Amérikaning sabiq tashqi ishlar ministiri mayik pompéyoning “Uyghur qirghinchiliqi” heqqidiki bayanatigha inkas qayturghan xitay da'iriliri, Uyghurlarning heq-hoquqlirining toluq qoghdiliwatqanliqi heqqidiki teshwiqatliri arisida, rayonda milliy til-yéziq we milliy ma'aripning qoghdiliwatqanliqini ilgiri sürgenidi.

Muxbirimizning bügün we ilgiri igiligen bu heqtiki uchurliridin xitay teshwiqatidiki mezkur melumatning qipqizil yalghanliqi yene bir qétim delillendi.

Amérikaning sabiq tashqi ishlar ministiri mayik pompéyo xitayning Uyghur rayonidiki ijra'atlirini “Irqiy qirghinchiliq” dep élan qilghandin kéyin, xitay axbarati heqni sözligen mayk pompéyogha esebiylerche hujum qildi. Emma, mayik pompéyoni eyibleshte selbiy süpetlerni ayimay ishletken xitay terep, u otturigha qoyghan heqiqetni inkar qilishta qiynaldi. Xitay axbarati bu témida ilgirikige oxshashla Uyghur rayoni weziyitining gül-gülistanliq ikenliki, Uyghurlarning bext-sa'adetke chömülüp yashawatqanliqini qaytidin bazargha saldi. Xitayning Uyghur rayonluq téléwiziye qanili Uyghurlarning milliy ma'aripining qoghdiliwatqanliqini tereddutsiz tilgha aldi. Bügün, 25-yanwar radiyomizgha kelgen awaz xatirisi sheklidiki bir inkastin melum bolushiche, nöwette xitay ölkiliride yashawatqan kelpinlik bir Uyghur xitay axbaratining yuqiriqi xewirini anglighandin kéyin yurti kelpin'ge téléfon qilip, qoshnisining oqushsiz qalghan ikki balisini mektepke orunlashturush heqqide alaqidar xadimdin melumat sorighan. U özini tonushturghandin kéyin qoshnisining terbiyeleshke ekétilgenliki, uning 5 we 7 yashliq ikki balisining oqushsiz qalghanliqi hem bularni kimge tapshurushi kéreklikini sorighan. Özining kelpin nahiyelik ma'arip idarisining xadimi ikenlikini tilgha alghan mezkur xadim, bu ikki balini ma'arip idarisige ekélip tapshurushni éytqan. Ehwalni inkas qilghuchi, mezkur xadimdin, bu balilarning qaysi tilda terbiye alidighanliqini sorighan. Ma'arip xadimi, hazir kelpinde pütün oqughuchilarning dölet tilida terbiye alidighanliqini éytqan. Inkas qilghuchi, balilarning Uyghurche oqush imkani bar-yoqluqini sorighinda, mezkur xadim, kelpinde ma'aripta dölet tilining omumliship bolghanliqini tekrarlighan.

“Shinjang téléwiziye istansisi” ning amérikani eyibligen yene bir xewiridimu, Uyghurlarning milliy til-yéziqini ishlitish hoquqining qoghdiliwatqanliqi tekrarlan'ghan.

Biz bügün kelpin nahiyelik 1-ottura mektepke téléfon qilip, bu mektepte Uyghur tilida oqutuluwatqan ders bar-yoqluqini sürüshte qilduq. Téléfonimizni qobul qilghan xitay xadim özining mektep mudiri ikenlikini, mektepte Uyghur mudir yoqluqini éytti؛ biz uningdin bu mektep yaki kelpindiki bashqa mekteplerde Uyghurche ders bar-yoqluqini sorighinimizda, u bu heqte teshwiqat idarisidin melumat sorishimizni tewsiye qildi. Téléfonimizni qobul qilghan mektep memuriy xadimliridin biri, mektepte Uyghurche ders ötüsh emes, oqutquchi we xizmetchiler öz'ara Uyghurche sözleshkimu ruxset yoqluqini ashkarilidi.

Yuqirida diqqitinglargha sun'ghinimiz, xitay axbaratining amérikaning Uyghur rayonidiki irqiy qirghinchiliq heqqidiki bayanatigha qarshi élip bériwatqan teshwiqatidin milliy ma'aripqa alaqidar uchurningmu saxtiliqining yene bir ret delillinishidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet