"страсбург уйғурлар үчүн" намлиқ тәшкилатниң рәһбәрлириниң уйғурлар тоғрисидики баянлири

Ихтиярий мухбиримиз әкрәм
2021-08-17

Франсуз яшлири тәрипидин қурулған "страсбург уйғурлар үчүн" намлиқ тәшкилат уйғурларни қоллап, хитайниң җаза лагерлириға қарши көрәш қилмақта.

WUC/ Social Media

Д у қ мәркизидин игилишимизчә, явропа иттипақиниң иккинчи мәркизи вә қарар елиш оргини җайлашқан франсийәниң страсбург шәһридики бир бөлүк яшлар бундин бирқанчә ай илгири өзликидин қозғилип, "страсбург уйғурлар үчүн" намлиқ тәшкилатни қуруп чиққан һәмдә уйғурларни қоллап, хитайниң җаза лагерлириға қарши көрәшкә атланған. Д у қ рәиси долқун әйса әпәндиниң билдүришичә, бу тәшкилатниң әзалири франсийәдики охшаш болмиған милләтләргә тәвә болған, көпинчиси алий мәктәпләрни пүттүргән яшларни асас қилидикән.

Уйғурларниң тартиватқан азап - оқубәтлиригә һесдашлиқи қозғалған, хитайға болған нәпрәтлири күчәйгән бу яшлар алдинқи айларда явропа иттипақиниң хитайға бесим ишлитишини қолға кәлтүрүш үчүн бир йүрүш паалийәтләрни елип берип, франсийәдә зор тәсир қозғиған. Долқун әйса әпәндиниң бәргән учурлириға қариғанда "страсбург уйғурлар үчүн" намлиқ бу тәшкилатниң 9 нәпәр рәһбәрлири 15 - авғуст күни германийәниң мюнхен шәһригә йетип келип, д у қ мәркизини зиярәт қилған, уйғурлар хусусида сөһбәтләрдә болған һәм уйғур таамлириға еғиз тәгкән.

Биз бүгүн "страсбург уйғурлар үчүн" намлиқ бу тәшкилатниң бәзи рәһбәрлири билән телефон арқилиқ алақилишип, уларниң немә үчүн уйғурларни қоллап һәрикәт қилиш нийитигә кәлгәнлики, бундин кейин уйғурлар үчүн немә ишларни қилмақчи боливатқанлиқи вә д у қ мәркизини зиярәт қилиштин һасил болған тәсиратлири тоғрисида соаллар соридуқ.

"страсбург уйғурлар үчүн" намлиқ тәшкилатниң идарә һәйәт әзалиридин бири болған чәйма ханим мундақ дәйду: "уйғурлар дуч келиватқан еғир вәзийәт бизниң җиддий диққитимизни чәккән назук тема болди. Биз уйғурлар учраватқан ирқий қирғинчилиқни вә у пәйда қилған қабаһәтни қобул қилалмидуқ. Биз франсийәликләр маарип тәрбийәсидә кишилик қиммәт қарашлирини һимайә қилиш вә қоғдаштин дәрс алимиз. Бизниң кишилик һәқлири дәпсәндә болуватқан инсанларниң авази болуш вә уларниң һәққини қоғдаш мәҗбурийитимиз бар. Нөвәттә уйғурларниң бешиға келиватқан күлпәтләргә қарши турушни өзимизгә вәзипә қилғанлиқимиздин пәхирлинимиз."

Мәзкур тәшкилатниң рәһбәрлиридин бири болған толга әпәнди мундақ дәйду: "д у қ рәисиниң бәргән мәлуматлири бизни қаттиқ тәсирләрдүрди вә бизниң техиму җанлиқ һәрикәт қилиш ирадимизни күчләндүрди. Биз барғансери сепи кеңийиватқан бир қошун. Биз өзимизгә несип болған һәрқандақ йиғилиш пурсәтләрдин пайдилинип, уйғур ирқий қирғинчилиқини тәшвиқ қилишни қолдин бәрмәслик қарариға кәлдуқ вә паалийәтлиримиз шу йосунда давам қиливатиду. Биз хитай маллирини байқут қилишни тәшвиқ қиливатимиз. Страсбургдики хуавейниң завутини тақашни тәләп қиливатимиз. Биз йәнә страсбургда явропа иттипақиға уйғурлар мәсилисидә тәсир көрситиш үчүн көлими техиму зор болған паалийәтләрни өткүзүшни пиланлаватимиз. Уйғурлар мәсилиси биз үчүн интайин җиддий тема. Биз алдимиздики күнләрдә мәхсус уйғурларниң кимлики вә мәдәнийитини қоғдаш мәзмун қилинған паалийәтлирни елип баримиз."

Мәзкур тәшкилатниң рәһбәрлиридин бири болған түрк қизи һүля ханим мундақ дәйду: "биз мюнхен зияритидә д у қ рәиси тәрипидин қизғин күтивелиндуқ вә күчлүк илһамға ериштуқ. Д у қ рәиси бизгә һәқиқәтәнму зор мәдәт бәрди вә бизни башқидин җанландурди. Униң биздин күткәнлирини биҗа кәлтүрүш үчүн пүтүн имканлиримиз билән һәрикәт қилимиз. Биз д у қ билән һәмкарлиқ орнатқанлиқмиздин көп мәмнунлуқ һес қиливатимиз. Биз бундин кейин қандақ һәрикәтләр билән мәшғул болидиғанлиқимизни д у қ рәһбәрлиригә тәпсилий мәлум қилдуқ. Уйғурлар вә шәрқий түркистан билән алақилиқ болған һәрқандақ сорунларда биз уйғурлар мәсилисини көтүрүп чиқишни давамлаштуримиз. Рәисниң ичимизни аччиқ қилған шәрқий түркистандики ечинишлиқ вәқәләр тоғрисидики баянлири бизниң ғәйритимизгә ғәйрәт қошти. Мән уйғурлар үчүн хизмәт қилалиғанлиқимдин иптихарлинимән."