Алимҗан сабирли: нишанимиз пәрзәнтләрни өз тили, мәдәнийити, етиқади вә заманиви билимләр билән тәрбийәләш

4‏-Авғуст күни мәркизи истанбулдики сутуқ буғрахан илим вә мәдәнийәт вәхписиниң тәлим тәрбийә мәркизи бөлүминиң уюштуруши билән өткүзүлгән 2022--2023-йили истанбулдики башланғуч вә оттура мәктәпләрдә әлачи болуп оқуған уйғур оқуғучиларни тәбрикләш, мукапатлаш вә оқуш пүттүрүш мурасимида, уйғур оқуғучилар “вәтән һәсрити” дегәнгә охшаш һәр хил темиларда шеир декламатсийә қилди, нәсир оқуди вә һәр хил номур көрситип йиғинға қатнашқан ата-аниларниң қизғин алқишиға еришти.

RFA/Arslan

Мурасимда ечилиш сөзи сөзлигән шәрқий түркистан өлималар бирликиниң рәиси доктор алимҗан буғда пәрзәнтләрни яхши оқутушниң муһимлиқи тоғрисида тохтилип мундақ деди: “биз үчүн вәтән һәқиқәтән муһим, әмма шу вәтәнни қутқузидиған әң муһим амил, бу вәтәнгә саһиб чиқидиған яшлиримизни, пәрзәнтлиримизни әң яхши шәкилдә йетилдүрүшимиз керәк. Пәрзәнтлиримизгә кичикидин тартип игә чиқип уларниң зеһни чүшәнчисини, әхлақини, етиқадини, һәр қайси җәһәттин вәтәнпәрвәрликини наһайити яхши йетилдүрүшимиз керәк”.

 Истанбулдики бәзи уйғур иҗтимаий тәшкилатлири уйғур пәрзәнтлирини ана тили, миллий мәдәнийити, өрп-адәт, дини етиқад вә қиммәт-қараш чүшәнчилири билән йетиштүрүш мәқситидә һәр хил йәсли, мәктәп вә курсларни ечип тәлим тәрбийәгә әһмийәт берип кәлмәктә. Мәркизи истанбулдики сутуқ буғрахан илим вә мәдәнийәт вәхписи әнә шу хил тәлим-тәрбийә билән шуғуллинип келиватқан мәркәзләрдин бири һесаблиниду.

Истамулдики сутуқ буғрахан илим вә мәдәнийәт вәхписи тәлим-тәрбийә мәркизиниң мудири алимҗан сабирли әпәндиниң билдүрүшичә, сутуқ буғрахан илим вә мәдәнийәт вәхписи тәрипидин тәсис қилинған язлиқ тәтиллик тәлим-тәрбийә мәркизидә башланғуч вә оттура мәктәп оқуғучилири үчүн 13 синип ечилип 270 қиз-оғул уйғур оқуғучи дәрс оқуған. Униң сиртида оқуш йешиға тошмиған 4 ‏-6 яш арисидики уйғур пәрзәнтлиридин 19 өсмүргә мәхсус ана тили дәрс өгитилип уйғур тили савати чиққан.

Алимҗан сабирли әпәндиниң билдүрүшичә бу тәлим-тәрбийә мәркизидә оқуғучиларға һәр һәптидә бәш күн һәр күни алтә саәт дәрс өтүлгән болуп, дәрсләрдә асаслиқи, уйғур тили, қуран кәрим оқуш, түркчә, инглизчә, математика вә тәнтәрбийә дәрслири өтүлгән.

Алимҗан сабирли түркийәдики уйғур оқуғучиларға уйғурчә дәрс өтүш мәқсити тоғрисида тохтилип мундақ деди: “вәтәндә йүз бериватқан ассимилятсийә һәрикити һәммимизгә мәлум, бизниң вәтән сиртида яшаватқан, болупму түркийәдә яшаватқан уйғур пәрзәнтлиримизниң өз ана тилини унтуп кәтмәслики, өзиниң вәтәнгә болған бурчини унтуп қалмаслиқи үчүн уларға ана тили дәрслирини өгитиватимиз, ана тилида һәр хил саһәдики һәр хил жанирдики әсәрләрни оқуп чүшинәләйдиған, униңдин зоқ алалайдиған болуп йетишип чиқиши үчүн күч чиқириватимиз, ана тил дәрслиримизни биринчи синиптин һәтта йәслидин башлап оттура мәктәпниң 8‏-синипқичә болған оқуғучиларниң һәммисигә өзлириниң сәвийәси бойичә ана тили дәрслири бериватимиз, оқуғучилиримизниң миллий еңиниң йүксилиши, дини етиқадини тонуши үчүн уларға һәр хил дәрс вә паалийәтләр орунлаштуруп буларни һес қилдурушқа тиришиватимиз”.

Биз йәнә сутуқ буғрахан илим вә мәдәнийәт вәхписиниң тәлим-тәрбийә мәркизидә пәрзәнтлирини оқутуватқан һизбулла қари исимлик кишини зиярәт қилип, пәрзәнтлириниң оқуш әһвали тоғрисида сөһбәт елип бардуқ. Зияритимизни қобул қилған һизбулла қариниң билдүрүшичә униң, хәйриниса, һәмзә, мустапа, муһәммәд исимлик икки оғул, икки қизи бар икән. У, төт пәрзәнтиниң сутуқ буғрахан илим вә мәдәнийәт вәхписиниң тәлим-тәрбийә мәркизидә оқуватқанлиқини, униң пәрзәнтлиридин бир қизи вә бир оғлиниң күчләндүрүш дәрслиригә қатнашқандин кейин имтиһандин юқири номур елип дөләтлик нуқтилиқ оттура мәктәпкә өткәнликини, пәрзәнтлири билән биллә оқуған 30 уйғур оқуғучиниңму шу нуқтилиқ мәктәпкә өткәнликини, пәрзәнтлириниң йәнә уйғур тили савати чиққанлиқини, һазир пәрзәнтлириниң уйғурчә китабларни оқуп раваб чүшинәләйдиған сәвийәгә йәткәнликини, булардин мәмнун икәнликини билдүрди.

 Алимҗан сабирлиниң билдүрүшичә, сутуқ буғрахан илим вә мәдәнийәт вәхписи 2012‏-йили қурулғандин буян уйғур оқуғучиларниң һәр хил еһтияҗлирини қамдап, оқуғучиларниң дөләт мәктипидики асасий дәрслирини күчәйтиш вә тәкрарлаш билән биргә уларни ана тили, әдәбияти, дини етиқади, тарих вә күлтүрини пухта билгән, йеңи заман билимлири билән юқири дәриҗидә қоралланған әвлад қилип тәрбийәләшни нишан қилғаникән.