Мәһбус аниси: “оғлум сақчиға тәзим қилғанда беши йәргә тәгкили аз қалди, йүриким ағриди”

Мухбиримиз шөһрәт һошур
2022.07.22
Share on WhatsApp
Share on WhatsApp
Германчә мәтбуатлар хитайниң “ирқий қирғинчилиқ” вә “инсанийәткә қарши җинайәт” лири билән толуп ташти Лоп наһийәсидики 4-йиғивелиш лагеридики тутқунлар сиясий өгиништә. 2017-Йили март, хотән.
BITTER WINTER

Радийомизға инкас қилинишичә, үрүмчи 3-түрмидики оғли билән екранда көрүшкән бир ана, чәтәлдики бир туғқиниға оғли билән екранда көрүшкәндин кейинки тәсиратини йоллап бәргән. Бу аваз хатирисидә оғлиниң сақчиларға тазим қилғанда беши йәргә тегәйла дәп қалғанлиқи алаһидә әскәртилгән вә өзиниң бу көрүнүшни көрүп йүрики ағриғанлиқи йиға авазидин әкс әткән. Бу аваз хатирисини радийомизға йоллиған муһаҗирниң баян қилишичә, мәһбусларни аилиси билән хитайчә сөзлитиш вә хитай сақчилириға тазим қилдуруш түзүми уйғур районидики түрмиләрдә омумйүзлүк һалда йолға қоюлған. Америкада яшаватқан сиясий көзәткүчи илшат һәсән әпәндиму юртдашлиридин биридин мәһбус туғқининиң аилиси билән екранда хитайчә сөзләшкән бир син хатирисини тапшурувалған; мәзкур син хатирисидә хитайчә сәвийәси йоқ дейәрлик бир мәһбусниң туғқанлири билән қийнилип туруп хитайчә гәп қиливатқан көрүнүши хатириләнгән.

Радийомизға кәлгән илгирики инкаслардин мәлум болушичә, мәһбусларниң уруқ-туғқанлири билән екранда көрүшүши түрмә ичи вә сирти болуп һәр икки тәрәптә сақчиниң назаритидә елип берилмақта. Сақчихана хадимлири мәһбус аилә тавабиатлирини һәр айниң бәлгилик күн вә саәтлиридә тәвәликтики әдлийә понкитлири яки аһалиләр комитетиға елип берип, мәһбус туғқини билән екранда көрүштүргән. Биз бүгүн қәшқәр шәһәр ичидики әнә шундақ екранда көрүштүрүшкә мәсул бир сақчи хадимидин мәлумат соридуқ. У һәр айниң муқим икки күнидә тәвәликидики мәһбус аилә тавабиатлирини аһалиләр комитетиға апиридиғанлиқини ашкарилиди. Униң дейишичә, екранда көрүшүш гәрчә 1-2 минуттин көп болмисиму, екранда көрүшүшни күтүп турған кишиләрниң көплүки сәвәбидин һәр қетим аһалиләр комитетиға бу иш билән барғинида 1-2 саәтчә өчирәт сақлашқа мәҗбур болған.

У йәнә өзи көрүштүргини апарған кишиләргә саламәтликини билдүрүш вә партийәгә рәһмәт ейтиштин башқа сөз қилишқа рухсәт бәрмәйдиғанлиқини ашкарилиди.

Бу хадим өзи назарәт қилған екран сөһбитиниң дөләт тилида елип берилидиғанлиқини тәкитлиди. У мәһбусларниң сақчиларға хитайчә тазим қилғанлиқини көрүп бақмиғанлиқини баян қилған болсиму, әмма у өзиниң екранға мәһбустин кейин чиқидиғанлиқи вә балдур узайдиғанлиқини баян қилиш арқилиқ, хитайчә тазим түзүминиң мәвҗутлуқ еһтималлиқини инкар қилмиди.

Көзәткүчи илшат һәсән әпәнди, бешиға әң еғир күн кәлгән минутларда ана тилда сөзләшниң бир тәбиий еһтияҗ икәнликини әскәртиду. У хитай даирилириниң мана мушу еһтияҗниму чәкләш арқилиқ, уйғур мәһбусларға җисманий қийин-қистақларниң үстигә роһий қийин-қистақ елип бериватқанлиқини баян қилиду вә буни давам қиливатқан ирқий қирғинчилиқиниң йәнә бир ечинишлиқ сәһниси дәп тәсвирләйду.

Юқирида даириләрниң уйғур районида мәһбусларни аилиси вә сақчиларға хитайчә тазим қилдурулуватқанлиқи һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.