Türkiyede oqughan sübhi tursunning ürümchi ghalibiyet saqchixanisi teripidin tutulghanliqi delillendi

Muxbirimiz shöhret hoshur
2022.08.04
Share on WhatsApp
Share on WhatsApp
Türkiyede oqughan sübhi tursunning ürümchi ghalibiyet saqchixanisi teripidin tutulghanliqi delillendi Türkiyening bir xelq'araliq shirkitining gu'angjudiki shöbiside ishlewatqanda ürümchi ghalibiyet saqchixanisi teripidin “Tordin chüshüp qalghan gumandalar” qatarida tutqun qilin'ghan sübhi tursun. (Waqti we orni éniq emes).
Oqurmen teminligen

Inkas qilinishiche, türkiyediki oqushini tügetkendin kéyin, türkiyening bir xelq'araliq shirkitide xizmet qiliwatqan sübhi tursun, xizmet éhtiyaji bilen 2021‏-yili küzde mezkur shirketning gu'angjudiki shöbisige yötkelgen. Aridin bir yildek waqit ötkende, yeni bu yil 1-iyul küni u ürümchi shehirining ghalibiyet saqchixanisi teripidin “Tordin chüshüp qalghan gumandalar” qatarida tutqun qilin'ghan. Muxbirimizning téléfonini qobul qilghan ürümchidiki bir saqchi xadimi, sübhi tursunni ghalibyet saqchixanisining tutqun qilghanliqini delillidi.

Inkaslardin melum bolishiche, Uyghur élida 2017-yili bashlan'ghan chong tutqun 6‏-yiligha qarap kétiwatqan bügünki kündimu, rayonda tutqun qilish üzlüksiz dawam qilmaqta. Muhajirettiki Uyghurlar öz yurtliridiki uruq-tughqan we qolum-qoshnilirining iz-déreksiz yoqap kétiwatqanliqi we kéchiliri öylirige saqchilar basturup kirip tutup kétiwatqanliqi heqqide uchurlar almaqta. Türkiyede yashawatqan ürümchilik bireylenning inkas qilishiche, 7-ayning 1‏-küni, ürümchidiki dostliridin birining oghli bolghan sübhi tursun tutqan qilin'ghan.

Sübhi tursunning tutulushi heqqide norwégiyediki Uyghuryar fondimu belgilik uchuralargha érishken. Mezkur fondning yétekchisi, pa'aliyetchi abduweli ayupning déyishiche, bu yil 29 yashqa kirgen sübhi tursun, 2010-yilliri türkiyege oqushqa kelgen we oqushi püttürgendin kéyin, türkiyening melum xelq'araliq shirktide xizmet qilghan. Shirket uni bultur küzde özining gu'angjudiki shöbisige xizmetke yötkigen. Ürümchining öpke késellikler doxturxanisi yénidiki bir ahaliler kométitigha nopusluq bolghan sübhi tursun, bu yil 7-ayda ayda tutqun qilin'ghan.

Xewer-matériyallardin melum bolushiche, türkiye xitayning közitish tizimlikide Uyghurlarning munasiwet da'irisi inchike közitilidighan 25 sezgür döletning biri bolup, ilgiri türkiyedin yurtigha qaytqan xitay wetendashliqidiki Uyghurlarla emes, belki türkiye wetendishi bolghan Uyghurlarmu tutulghan we késilgen ehwallar körülgen.

Bulardin 41 yilliq türkiye wetendishi yehya qurban ürümchide tijaret qiliwatqan mezgilide ayali bilen birlikte tutup kétilgen. Uning iz-dériki türkiyediki perzentliri teripidin hazirghiche qilinmaqta.

Mana mushundaq bir weziyette, sübhi tursunning ürümchige bérishida uning özining bir tewekkülchilik qilip baqqanliqi yaki shirkiti teripidin uninggha bixeterlik kapaliti bérilgenliki melum emes. Abduweli ayupning munasiwetlik qanalliri arqiliq éniqlishiche, sübhi tursunni ürümchining ghalibiyet saqchixanisi tutqun qilghan.

Téléfo'inimizni qobul qilghan ürümchidiki bir saqchi xadimi, sübhi tursunni ghalibiyet saqchixanisi tutqun qilghanliqini delillidi. Emma bu xadim ghalibiyet saqchixanisining sübhi tursunni gu'angjugha bérip tutqanliqi we yaki sübhi tursun a'ilisini yoqlighili ürümchige kelgende tutuqanliqi heqqide éniq melumat bermidi. Bu xadim yene sübhi tursunning tutulush sewebi heqqidiki so'alimizghimu jawap bermidi.

Pa'aliyetchi abduweli ayupning bayan qilishiche, sübhi tursun, fujyen ormanchiliq oniwérsitétining tutqundiki oqughuchisi zulyar yasin bilen türkiyediki mezgilide bir yataqta yatqan bolup, uning zulyar yasin délosigha chétilghan bolush éhtimalliqi mumkin iken.

Türkiyediki mezkur muhajirning eskertishiche, sübhi tursun gerche 2010-yilliri türkiyege chiqqan bolsimu, téxi türkiye wetendashliqigha ötmigen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.