Австралийәдики уйғурлардин шәмсийә һаҗибәгниң пенсийонер ата-анисиниң тутқунда икәнлики дәлилләнди

Мухбиримиз шөһрәт һошур
2021-08-31
Share
Австралийәдики уйғурлардин шәмсийә һаҗибәгниң пенсийонер ата-анисиниң тутқунда икәнлики дәлилләнди Австралийә шәрқий түркистан җәмийитиниң актип әзаси шәмсийә һаҗибәг атуштики ата-аниси камил әбәйдулла вә айгүл һаҗи.
Shemsiye teminligen

Австралийәдики уйғурлардин шәмсийә һаҗибәг атуштики ата-аниси, қериндашлири болуп биваситә аилә әзалиридинла 14 нәпириниң 4 йилдин буян һечқандақ учурини алалмайватқаниди. Мухбиримизниң атуштики алақидар органларға қарита елип барған ениқлашлири давамида, мәзкур икки пенсийонерниң 2018 ‏-йилиниң оттурилиридин етибарән тутқунда икәнлики дәлилләнди.

Австралийә шәрқий түркистан җәмийитиниң актип әзаси шәмсийә һаҗибәг атуштики ата-аниси камил әбәйдулла вә айгүл һаҗи, момиси таҗиниса һаҗи, акилири зулпиқар камил вә халмурат камил, иниси дилмурат камил вә уларниң аяллири болуп, биваситә уруқ-туғқанлиридинла 14 нәпириниң 4 йилдин буян һечқандақ учурини алалмиған. Шәмсийәниң радийомизға инкас қилишичә, у ата-аниси билән 2017 ‏-йилиниң бешидин етибарән алақиси шалаңлишишқа башлиған вә бир йилчә тонушлириниң тонушлири арқилиқ, ата-анисиниң һаят вә сиртта икәнликидин йәни лагерға әкетилмигәнликидин хәвәр тепип турған. Әмма 2018 ‏-йилиниң оттурилириға кәлгәндә, алақиси бирақла кесилгән.

Баян қилинишичә, бу йил 67 яшқа киргән камил әбәйдулла атуш шәһәрлик су идарисидин, айгүл һаҗи болса атуш шәһәр йеза игилик банкисидин пенсийәгә чиққан. Йешиға нисбәтән балдур пенсийәгә чиқивалған бу әр-аял, бир мәһәл содиға атлинип оттура асияда хәлқара тиҗарәт билән арқидин атушта боз йәр ечип игилик тикләш билән шуғулланған. Телефонимизни қобул қилған су идариси вә банка хадимлири, бу идаридә, бундақ исимлик кишиләр йоқлуқи вә болғанлиқидинму хәвәрсизликини ейтти.

Шәмсийә һаҗибәг чәтәлдики көп сандики муһаҗирларға охшашла бир мәһәл ата-аниси вә қериндашлириниң еһтият қилип өзи билән көрүшмәйватқанлиқини пәрәз қилған һәм уларға аваричилиқ тепип бәрмәслик үчүн өзлириму, биваситә из-дерикини қилмиған. Шәмсийә акилири вә йәңгилириниң үндидар һесабини көзитиш арқилиқ, үндидарға һечқандақ учур чиқармаслиқидинла, уларниң тутқун қилинғанлиқ еһтималлиқини пәрәз қилған. Чүнки шәмсийәниң бовиси әбәйдулла 1944 ‏-1949-йиллиридики шәрқий түркистан миллий армийәсидә вәзипә өтүгәнлики, буниң үстигә, тонулған содигәр турғун һаҗи исимлик бир тағиси 1997 ‏-йили "бөлгүнчилик" билән әйиблинип муддәтсиз кесиветилгәнлики үчүн, мәзкур аилә әзалири қара тизимликкә елинип, нуқтилиқ аилиләр қатарида аз кәм 30 йилдин буян изчил назарәт қилинип келиватқаникән.

Дейилишичә, камил әбәйдулла билән айгүл һаҗи атуш шәһәр аһалисигә тәвә болуп, биз атуш шәһәрлик сақчи идарисиниң охшимиған ишханилириға телефон қилип, мәзкур икки пенсийонерниң әһвали һәққидә мәлумат соридуқ

Мәлум болушичә, шәмсийәниң ата-аниси илгири пәрзәнтлирини көрүп келиш үчүн көп қетим паспортқа илтимас сунған болсиму, тәлипи кәскин һалда рәт қилинған.

Шәмсийә һаҗибәг, ата-анисиң йеши йилдин йилға чоңийип қеливатқанлиқи сәвәблик, уларниң тинч-аманлиқи үстидики әндишиси техиму күчәйгән.

Алақидар хадимлар, мәзкур икки пенсийонерниң нәдә икәнлики һәққидики соаллиримизға җаваб бәрмигәндин кейин, биз уларниң қачан тутулғанлиқи һәққидә мәлумат соридуқ. Хадимлардин бири уларниң икки йил аввал тутулғанлиқини ашкарилиди. Биз қизилсу областлиқ җамаәт хәвпсизлик идарисигә телефон қилип, мәзкур пенсийонерларниң кесилгән-кесилмигәнликини соридуқ. Мәзкур хадим бу соалимизға җаваб берәлмигәндин кейин, биз уларниң делосиниң қайси сақчи тәрипидин тәкшүрүлгәнликини соридуқ. Бу идариниң бир хадими мәзкур икки пенсийонерниң делосини, шуңқар исимлик бир қирғиз сақчи ишлигәнликини ашкарилиди; йәнә бир бөлүм башлиқиму охшаш учурни тәкрарлиди.

Ахирида телефонимизни қобул қилған бир аһалиләр комитети сақчи хадими, камил әбәйдулла тутулуп "тәрбийәләш" кә әкетилгәндин кейин, та һазирғичә қоюп берилмигәнликини ашкарилиди.

Шәмсийә һаҗибәг шәрқи түркистан австралийә җәмийитиниң рәиси, актип уйғур паалийәтчи нурмәмәт абдулмеҗит түркистаниниң аяли болуп, баян қилинишичә, нурмәмәтниңму биваситә уруқ-туғқанлиридин 10 нәччә киши лагерға әкетилгән. Әмма, уларниң ақивити та һазирғичә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт