Awstraliyediki Uyghurlardin shemsiye hajibegning pénsiyonér ata-anisining tutqunda ikenliki delillendi

Muxbirimiz shöhret hoshur
2021-08-31
Share
Awstraliyediki Uyghurlardin shemsiye hajibegning pénsiyonér ata-anisining tutqunda ikenliki delillendi Awstraliye sherqiy türkistan jem'iyitining aktip ezasi shemsiye hajibeg atushtiki ata-anisi kamil ebeydulla we aygül haji.
Shemsiye teminligen

Awstraliyediki Uyghurlardin shemsiye hajibeg atushtiki ata-anisi, qérindashliri bolup biwasite a'ile ezaliridinla 14 nepirining 4 yildin buyan héchqandaq uchurini alalmaywatqanidi. Muxbirimizning atushtiki alaqidar organlargha qarita élip barghan éniqlashliri dawamida, mezkur ikki pénsiyonérning 2018 ‏-yilining otturiliridin étibaren tutqunda ikenliki delillendi.

Awstraliye sherqiy türkistan jem'iyitining aktip ezasi shemsiye hajibeg atushtiki ata-anisi kamil ebeydulla we aygül haji, momisi tajinisa haji, akiliri zulpiqar kamil we xalmurat kamil, inisi dilmurat kamil we ularning ayalliri bolup, biwasite uruq-tughqanliridinla 14 nepirining 4 yildin buyan héchqandaq uchurini alalmighan. Shemsiyening radiyomizgha inkas qilishiche, u ata-anisi bilen 2017 ‏-yilining béshidin étibaren alaqisi shalanglishishqa bashlighan we bir yilche tonushlirining tonushliri arqiliq, ata-anisining hayat we sirtta ikenlikidin yeni lagérgha ekétilmigenlikidin xewer tépip turghan. Emma 2018 ‏-yilining otturilirigha kelgende, alaqisi biraqla késilgen.

Bayan qilinishiche, bu yil 67 yashqa kirgen kamil ebeydulla atush sheherlik su idarisidin, aygül haji bolsa atush sheher yéza igilik bankisidin pénsiyege chiqqan. Yéshigha nisbeten baldur pénsiyege chiqiwalghan bu er-ayal, bir mehel sodigha atlinip ottura asiyada xelq'ara tijaret bilen arqidin atushta boz yer échip igilik tiklesh bilen shughullan'ghan. Téléfonimizni qobul qilghan su idarisi we banka xadimliri, bu idaride, bundaq isimlik kishiler yoqluqi we bolghanliqidinmu xewersizlikini éytti.

Shemsiye hajibeg chet'eldiki köp sandiki muhajirlargha oxshashla bir mehel ata-anisi we qérindashlirining éhtiyat qilip özi bilen körüshmeywatqanliqini perez qilghan hem ulargha awarichiliq tépip bermeslik üchün özlirimu, biwasite iz-dérikini qilmighan. Shemsiye akiliri we yenggilirining ündidar hésabini közitish arqiliq, ündidargha héchqandaq uchur chiqarmasliqidinla, ularning tutqun qilin'ghanliq éhtimalliqini perez qilghan. Chünki shemsiyening bowisi ebeydulla 1944 ‏-1949-yilliridiki sherqiy türkistan milliy armiyeside wezipe ötügenliki, buning üstige, tonulghan sodiger turghun haji isimlik bir taghisi 1997 ‏-yili "Bölgünchilik" bilen eyiblinip muddetsiz késiwétilgenliki üchün, mezkur a'ile ezaliri qara tizimlikke élinip, nuqtiliq a'ililer qatarida az kem 30 yildin buyan izchil nazaret qilinip kéliwatqaniken.

Déyilishiche, kamil ebeydulla bilen aygül haji atush sheher ahalisige tewe bolup, biz atush sheherlik saqchi idarisining oxshimighan ishxanilirigha téléfon qilip, mezkur ikki pénsiyonérning ehwali heqqide melumat soriduq

Melum bolushiche, shemsiyening ata-anisi ilgiri perzentlirini körüp kélish üchün köp qétim pasportqa iltimas sun'ghan bolsimu, telipi keskin halda ret qilin'ghan.

Shemsiye hajibeg, ata-anising yéshi yildin yilgha chongiyip qéliwatqanliqi seweblik, ularning tinch-amanliqi üstidiki endishisi téximu kücheygen.

Alaqidar xadimlar, mezkur ikki pénsiyonérning nede ikenliki heqqidiki so'allirimizgha jawab bermigendin kéyin, biz ularning qachan tutulghanliqi heqqide melumat soriduq. Xadimlardin biri ularning ikki yil awwal tutulghanliqini ashkarilidi. Biz qizilsu oblastliq jama'et xewpsizlik idarisige téléfon qilip, mezkur pénsiyonérlarning késilgen-késilmigenlikini soriduq. Mezkur xadim bu so'alimizgha jawab bérelmigendin kéyin, biz ularning délosining qaysi saqchi teripidin tekshürülgenlikini soriduq. Bu idarining bir xadimi mezkur ikki pénsiyonérning délosini, shungqar isimlik bir qirghiz saqchi ishligenlikini ashkarilidi؛ yene bir bölüm bashliqimu oxshash uchurni tekrarlidi.

Axirida téléfonimizni qobul qilghan bir ahaliler komitéti saqchi xadimi, kamil ebeydulla tutulup "Terbiyelesh" ke ekétilgendin kéyin, ta hazirghiche qoyup bérilmigenlikini ashkarilidi.

Shemsiye hajibeg sherqi türkistan awstraliye jem'iyitining re'isi, aktip Uyghur pa'aliyetchi nurmemet abdulméjit türkistanining ayali bolup, bayan qilinishiche, nurmemetningmu biwasite uruq-tughqanliridin 10 nechche kishi lagérgha ekétilgen. Emma, ularning aqiwiti ta hazirghiche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet