Pénsiyege chiqqan mudir obul sidiq qol téléfonidin chiqqan sirliq bir "Xataliq" seweblik tutqun qilin'ghan

Muxbirimiz shöhret hoshur
2021-09-17
Share
Altay 5 ‏-ottura mektipining Qoralliq eskerning qeshqer türmisining qarawulxanisida turghan körünüshi. 2021-Yili 3-may, qeshqer.
REUTERS

Chapchalliq muhajirlardin biri ötken hepte radiyomizgha uchur yollap, özining sabiq oqutquchisi, pénsiyege chiqqan mudir obul sidiqning téléfonidin "Chataq" chiqip tutqun qilin'ghanliqini inkas qilghan idi. Muxbirimizning éniqlashliri dawamida, pénsiyonér obul sidiqning nöwette ghulja jirghilangdiki lagérda tutup turuliwatqanliqi delillendi. Melum bolushiche, uning tutulushqa téléfonidin chiqqan, nimilikini hetta edliye xadimlirimu bilmeydighan "Ku'eyya" isimlik bir "Xataliq" seweb bolghan.

Melum bolushiche, özlirining néme üchün tutulghanliqini bilmeslik, 2017 ‏-yildin buyanqi zor tutqunda Uyghur tutqunlarning köpinchisi duch kelgen bir ehwaldur. Chapchalliq muhajirlardin birining radiyomizgha inkas qilishiche, chapchal nahiye merkiziy bashlan'ghuch mektepning sabiq mudiri, pénsiyonér obul sidiq téléfonidin chiqqan, emma özi chüshenmeydighan bir "Xataliq" seweblik2018 ‏-yili tutqun qilin'ghan. Mezkur mudir a'ile ezaliri bilen ékranda birqanche qétim körüshtürlgende, özige melum bir "Xataliq" ning artilghanliqi, emma özining bu "Xataliq" ni téxiche chüshünüp bolalmaywatqanliqini yoshurmighan.

Biz obul sidiqning ötküzgen atalmish "Xataliqi" we nöwettiki ehwalini bilip béqish üchün, chapchaldiki alaqidar xadimlargha téléfon qilduq.

Éniqlashlirimizdin melum bolushiche, bu yil 66 yashqa kirgen obul sidiq, chapchal merkizi bashlan'ghuch mektipidin pénsiyege chiqandin kéyin, ghulja shehiridiki qariway mehellisige yötkilip ketken we ghulja shehiridiki dölet amanliq xadimliri teripidin tutqun qilin'ghan.

Chapchalliq muhajirning inkas qilishiche, pénsiyonér obul sidiqning oqughuchliridin biri uni a'ilisige yoqlap barghanda, uning téléfonigha ündidarni chüshürüp bergen. Bu jeryanda mezkur oqughuchi bilip yaki bilmey cheklen'gen bir yumshaq détaldin paydilan'ghan we yaki cheklen'gen mezmundiki uchurlarni körgen. Az kem üch yilning aldida yüz bergen bu ish2018 ‏-yiligha kelgende, obul sidiqqa tügimes bir putlikashang élip kelgen.

Ghuljada edliye saheside xizmet qiliwatqan bir xadim téléfonimizni qobul qilip, tutqun obul sidiqning deslepte partiye mektepte qurulghan lagérgha apirilghanliqi, u yerdin su éliktir istansidiki lagérgha yötkelgenlikini ashkarilidi.

Bu xadimmu obul sidiqning téléfonidin "Chataq" chiqqanliqi üchün tutulghanliqi, emma "Chataq" téxnikiliq mesile bolghanliqi üchün, buning némilikini obul sidiqningmu, hetta öziningmu bilmeydighanliqini bayan qildi. Xizmet munasiwiti bilen uning bilen birqanche qétim ékranda körüshkenlikini tilgha alghan bu xadim, obul sidiqning öz xataliqini "'koya' (ku'eyya) bolup qaptimen" dep ipadiligenlikini tilgha aldi. Uning diyishiche, obul sidiq soraq dawamida, "Ku'eyya" dep atilidighan bu nersini yaki meshghulatni bilmeydighanliqi hem chüshenmeydighanliqini izchil tekrarlighan bolsimu, emma arqa-arqidin kelgen soraq guruppiliri oxshashla ene ashu "Ku'eyya" mesilisi üstide soraq qilghan. U buni chüshenmeydighanliqida ching turghan waqtida, soraqchilar teripidin "Koya bolup qaldim" dep iqrar qilishqa mejburlan'ghan we u atalmish "Xataliqi" ni mushu yosunda boynigha alghan. Emma u "Xataliqi" ni boynigha élipmu jazadin qutulalmighan. Peqet orni lagérdin lagérgha yötkelgen. Emma uning ta hazirghiche lagérda ikenliki we yaki késiwétilgenliki melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet