Йүзлигән уйғур тутқунниң хитай өлкилиригә елип меңилғанлиқи һәққидики син көрүнүши ашкариланди

Мухбиримиз қутлан
2019-09-21
Елхәт
Пикир
Share
Принт
600 Нәпәргә йеқин уйғур тутқунниң корла ғәрбий вогзалидин мәхсус пойиз билән хитай өлкилиригә елип меңилған вақтидики көрүнүш. 2019-Йили сентәбир.
600 Нәпәргә йеқин уйғур тутқунниң корла ғәрбий вогзалидин мәхсус пойиз билән хитай өлкилиригә елип меңилған вақтидики көрүнүш. 2019-Йили сентәбир.
Photo: RFA

600 Нәпәргә йеқин уйғур тутқунниң хитай сақчилириниң қаттиқ назарити астида корла ғәрбий вогзалидин мәхсус пойиз билән хитай өлкилиригә елип меңилғанлиқи ашкариланди.

Алдинқи күнләрдин буян иҗтимаий таратқуларда кәң түрдә тарқалған вә көп һәмбәһрләнгән бу син көрүнүшиниң дрон, йәни учқучисиз айропилан арқилиқ бошлуқтин тартилғанлиқи, мәлум бир хаккерниң уни оғрилап, ютуб ториға чиқарғанлиқи мәлум болмақта.

«Аләм хәвәрлири» (Sky News) ториниң мәлуматлириға қариғанда, мәзкур син көрүнүшиниң растлиқи ениқланған, йәни уйғур тутқунларни хитай сақчилириниң назаритидә деризилири паятланған мәхсус пойизға елип чиқиватқан орунниң корла ғәрбий вогзали икәнлики илгири сүрүлгән. Игилинишичә, мәзкур син көрүнүши 17-сентәбир күни бошлуқтин тартилип, шу күни хаккерлар тәрипидин оғриланған вә ютуб ториға йолланған. 18-Сентәбир күнидин башлап иҗтимаий таратқуларда кәң түрдә көрүлүшкә вә һәмбәһрлинишкә башлиған.

Мәзкур син көрүнүши дәсләп торға қоюлғанда тор кезәрлири: «бу видейо хитайда тартилған. Бу хитай һөкүмитиниң узундин буян шинҗаң уйғур аптоном районида кишилик һоқуқ вә инсанларниң негизлик әркинликини дәпсәндә қиливатқанлиқиниң испати,» дәп баһа язған.

Мәзкур син көрүнүшидин мәлум болушичә, 600 нәпәргә йеқин уйғур тутқунларниң бирдәк чечи чүшүрүлгән, уларни гуруппиларға бөлүп, охшимиған гуруппидикиләргә көк, ақ вә башқа рәңдики мәһбус кийими кийдүрүлгән. Уларниң көзлири қара ниқаб билән тосуветилгән. Һәр бир тутқунни 2 дин хитай сақчи қолтуқлап пойизға елип чиққан. Син көрүнүшини йеқинлаштуруп қариғанда көк кийимлик тутқунларниң дүмбисидин «қәшқәр тутуп туруш орни»  дегән хитайчә хәтни байқиғили болидикән. 

Көзәткүчиләрниң илгири сүрүшичә, бу хитай даирилириниң уйғур тутқунларни хитай өлкилиридики түрмиләргә түркүмләп йөткәватқанлиқи һәққидики әң йеңи вә син көрүнүшлүк дәлил-испат икән. Радийомиз өткән йилидин буян көп қетимлар ениқлаш вә сүрүштүрүш арқилиқ хитай һөкүмитиниң уйғур тутқунларни түркүм-түркүмләп хитайниң хейлоңҗяң, шәндоң, шәнши, гәнсу, хенән вә сичүән өлкилиридики түрмиләргә йөткигәнликини дәлиллигән иди.  Хитай даирилириниң һәтта 2017-йилиниң ахири айларчә муддәт билән уйғур дияридин хитай өлкилиригә қатнайдиған йолучилар пойизиға беләт сетишни тохтатқанлиқи, бу мәзгилдә уларниң уйғур тутқунларни түркүмләп хитай өлкилиригә йөткигән болуши мумкинлики илгири сүрүлгән иди.

Пикирләр (0)
Share
Толуқ бәт