Zeytune: "Apam uzun kiyimdin waz kechtürüldi, chéchi kestürüwétildi, balisi chüshürüwétildi, emma baladin qutulalmidi"

Muxbirimiz shöhret hoshur
2020-03-25
Élxet
Pikir
Share
Print
Türkiyede yashawatqan zeytune memet ijtima'iy taratqularda bergen guwahliq bayanatida inisi mehmutjan memet we uning a'ilisini tonushturuwatqan körünüsh.
Türkiyede yashawatqan zeytune memet ijtima'iy taratqularda bergen guwahliq bayanatida inisi mehmutjan memet we uning a'ilisini tonushturuwatqan körünüsh.
Social Media

Türkiyede yashawatqan zeytune memet ijtima'iy taratqularda bergen guwahliq bayanatida anisi aytöre xudeshning xitay da'iriliri teripidin uzun kiyim kiyishtin waz kechtürülgenliki, uzun chéchining kestürüwétilgenliki, ikki qétim qarnidiki balisining chüshürüwétilgenliki, shundaq turuqluq anisining ta bügün'giche zulumdin qutulalmaywatqanliqini ashkarilighan. Muxbirimizning bu heqtiki éniqlashliri dawamida aytöre xudeshning nöwette öyi chéqiwétilgenliki we namelum bir jaygha köchürüwétilgenliki ashkarilandi.

Zeytune memet söhbitimiz dawamida özi eqlige kelgendin buyan anisining xitay da'iriliri teripidin soraqqa tartilishliri, tutup ekitishliri, yighiwélishliri we köpchilikning aldida otturigha tartip chiqirilip sazayi qilishlirigha shahit bolghanliqini tilgha aldi. Uning déyishiche, anisi aytöre xudesh dindar bir a'ilige kélin bolup kelgenliki üchün uzun, emma renglik kiyim kéyishke adetlen'gen. Da'iriler Uyghur rayonida atalmish "Üch xil küch" ke qarshi dolqun qozghighandin buyan aytörem xudesh özining uzun kiyimliridin waz kéchishke mejbur bolghan. Aytörem bu mezgilde köp qétimlap saqchixanilargha chaqirilghan, töwenamilerge imza qoyghan we ammiwi yighinlarda pushayman bayanatliri sözligen.

Melum bolushiche, Uyghur rayonida 2017‏-yili lagérlar qurulushtin awwal herqaysi jaylarda qisqa muddetlik atalmish "Siyasiy öginish kurs" liri échilghan. Uchturpan nahiyesining aqyar yézisida bu xil kurslargha "Saghlamliq mektipi" dep nam bérilgen. Aytörem mana mushu kursqa ekitilgen mezgilide ösmür waqtidin bashlap kestürmigen uzun chéchini késiwétishke zorlan'ghan.

Zeytunening déyishiche, aytörem xudesh xitay da'irilirining bu buyruq we ijra'atlirining hemmisige axirqi hésabta boysun'ghan we emel qilghan bolsimu, emma 2017‏-yilning béshida u yenila lagérgha élip kétilish teqdiridin qutulalmighan. Melum bolushiche, uning lagérgha ekitilishige 2016‏-yilidiki türkiye sepiri bahane qilin'ghan. Aytöre xudesh lagérda bir yilche tutup turulup, namelum seweb bilen qoyuwétilgen bolsimu, emma nazarettin qutulalmighan. Uning türkiyediki qizi zeytune bilen körüshüshige ta bügün'giche yol qoyulmighan.

Zeytune yene özining baliliq we ösmürlük chaghliridiki eslimilirige asasen bayan qilishiche, aytörem xudesh mejburiy halda az dégende ikki qétim bala chüshürüsh opératsiyesi qilin'ghan we bu seweblik uning salametlikide éghir ajizlash körülgen. Shunga zeytune anisining lagérdin salametlikide éghir mesile körülüp qoyup bérilgenlikini perez qilmaqta we 3 yildin buyan sözliship baqmighan anisining nöwettiki ehwalidin endishe qilmaqta.

Ötken hepte zeytunening ghayib akisi murtiza memetning ehwalini éniqlishimiz dawamida uning anisi aytöre xudeshning öyining chéqiwétilgenliki we namelum bir jaygha köchürüwétilgenliki ashkarilandi.

Zeytune emdilikte lagérdin késel halette chiqqan anisining öyining néme üchün chéqiwétilgenliki we anisining hazir nede yashawatqanliqini bilish üchün tirishchanliq körsetmekte.

Toluq bet