تۈركىيە ياشلار ۋە تەنتەربىيە مىنىستىرى: ئۇيغۇر ياشلىرى مىللەتنىڭ كېلەچىكى ئۈچۈن ياراملىق كىشىلەردىن بولۇپ يېتىشىشى كېرەك

مەركىزى ئىستانبۇلدىكى «شەرقىي تۈركىستان يېڭى نەسىل ھەرىكىتى» نىڭ ئۇيۇشتۇرۇشى بىلەن تۈركىيەدىكى ئۇيغۇر ياشلىرى مانىسا شەھىرىدىكى بىر ئورمانلىقتا ئۈچ كۈنلۈك دالا پائالىيىتى ئېلىپ بارغان.

8‏-ئاينىڭ 20‏-كۈنىدىن 22‏-كۈنىگىچە ئۈچ كۈن داۋاملاشقان بۇ دالا پائالىيىتىگە ئىستانبۇل ۋە كونيا قاتارلىق شەھەرلەردە تولۇقسىز ۋە تولۇق ئوتتۇرا مەكتەپلەردە ئوقۇۋاتقان ئۇيغۇر ياشلىرىدىن 125 نەپەر ياش-ئۆسمۈر قاتناشقان.

بۇ قېتىملىق دالا پائالىيىتى جەريانىدا. تۈركىيە تەنتەربىيە ۋە ياشلار مىنىستىرلىقىنىڭ مۇئاۋىن مىنىستىرى دوكتور ئەنەس ئىمىنئوغلۇ ئۇيغۇر ياش-ئۆسمۈرلىرى بىلەن كۆرۈشكەن ۋە سۆھبەت ئېلىپ بارغان. ئۇ، بۇ كۆرۈشۈشتە ئۇيغۇر ياشلىرىنىڭ مىللەتنىڭ كېلەچىكى ئۈچۈن ياخشى ئوقۇپ يېتىشىپ چىقىشىنى ئۈمىد قىلىدىغانلىقىنى بىلدۈرگەن.

 «شەرقىي تۈركىستان يېڭى نەسىل ھەرىكىتى» نىڭ رەئىسى، دوكتورانت ئابدۇسالام تەكلىماكان بۇ ھەقتە زىيارىتىمىزنى قوبۇل قىلدى. ئۇنىڭ بىلدۈرۈشىچە، پائالىيەت جەريانىدا ئۇيغۇر ياشلىرى ئۆزئارا تونۇشۇش، ئورمانلىقتا پىيادە يۈرۈش، ئوقيا ئېتىش، سۇ ئۈزۈش، پۇتبول مۇسابىقىسى ۋە ھەر تۈرلۈك تەنتەربىيە ئويۇنلىرىنى ئويناش، شۇنداقلا بۇ پائالىيەتكە قاتناشقان ياش-ئۆسمۈرلەرگە شەرقىي تۈركىستان تارىخىي، جۇغراپىيەسى ۋە ھازىرقى ئەھۋالى توغرىسىدا لېكىسىيە سۆزلەش پائالىيەتلىرى ئۇيۇشتۇرۇلغان.

ئابدۇسالام تەكلىماكان، بۇ پائالىيەتنى ئۇيۇشتۇرۇشتىكى ئاساس مەقسەتنىڭ ئۇيغۇر ياش-ئۆسمۈرلىرىنى بىر يەرگە جەم قىلىپ ئۆزئارا تونۇشتۇرۇش، دوستلۇق ئورنىتىش، مۇناسىۋەتنى قويۇقلاشتۇرۇش، مىللىي كىملىكىنى ئەسلىتىش، شۇنداقلا ئۇلارنىڭ كېلەچەكتە شەرقىي تۈركىستان دەۋاسىغا ئىگە چىقىدىغان ئاڭ-چۈشەنچە بويىچە تەربىيەلىنىشىگە تۈرتكە بولۇشتىن ئىبارەت ئىكەنلىكىنى تەكىتلىدى.

مىنىستىر ئەنەس ئىمىنئوغلۇ ئۇيغۇر ياش-ئۆسمۈرلىرىگە سۆز قىلىپ مۇنداق دېگەن: «شۇنى ئىسىمىزدىن چىقارماسلىقىمىز كېرەككى، بىز تۈركىيە جۇمھۇرىيىتى بولۇش سۈپىتىمىز بىلەن شەرقىي تۈركىستان مەسىلىسىگە يېقىندىن كۆڭۈل بۆلىمىز. بىز ھەر ۋاقىت شەرقىي تۈركىستانلىق قېرىنداشلىرىمىزنىڭ يېنىدا بولىمىز، ئۇلار بىلەن ھەر ۋاقىت يېقىن مۇناسىۋەت قۇرۇپ كېلىۋاتىمىز، سىلەردەك ياشلارنى مۇشۇنداق دالا پائالىيىتى مەركەزلىرىدە كۈتۈۋېلىپ، ساھىبخانلىق قىلىشنى خالايمىز. زۇلۇمغا ئۇچراۋاتقان مەزلۇم خەلقلەر دۇچ كېلىۋاتقان قىيىن مەسىلىلەرنىڭ ھەل بولۇش ئۈمىدى تۈركىيەدۇر، شۇنىڭ ئۈچۈن بىز ھەر زامان زۇلۇمغا ئۇچراۋاتقانلار شەرقىي تۈركىستان خەلقىنىڭ يېنىدا تۇرۇشنى داۋاملاشتۇرىمىز. خۇدايىم بۇيرۇسا، شەرقىي تۈركىستان چوقۇم ئەركىنلىككە ئېرىشىدۇ، بىز بۇنىڭغا ئىشىنىمىز، بۇنىڭ ئۈچۈن ھەم دۇئا قىلىمىز ھەم ئەمەلىي خىزمەتلەرنى ئىشلەشنى داۋاملاشتۇرىمىز. ھۆرمەتلىك جۇمھۇر رەئىسىمىز تەسىس قىلغان تۈركىيە جۇمھۇرىيىتىنىڭ 100 يىللىقى پىلانى، پۈتۈن تۈركىي جۇمھۇرىيەتلىرىنىڭمۇ 100 يىللىق خاتىرىسى بولىدۇ.»

مىنىستىر ئەنەس ئىمىنئوغلى سۆزىنىڭ ئاخىرىدا ئۇيغۇر ياشلىرىنىڭ كەيپىياتىنى يۇقىرى تۇتۇشى كېرەكلىكىنى تەكىتلىدى. ئۇ، تۈركىيە تەنتەربىيە ۋە ياشلار مىنىستىرلىقىنىڭ قارمىقىدىكى ھەر قايسى ياشلار مەركەزلىرى ھەمدە دالا پائالىيىتى ئورۇنلىرىنىڭ ھەر ۋاقىت ئۇيغۇر ياشلىرى ئۈچۈن ئۇچۇق ئىكەنلىكىنى بىلدۈردى.

بۇ قېتىملىق دالا پائالىيىتىگە قاتناشقان مۇھەممەد ئۆتكۈر ئىسىملىك ئۇيغۇر ياش ئۆزىنىڭ 11‏-‏سىنىپتا ئوقۇيدىغانلىقىنى بىلدۈرۈپ، مۇنداق دېدى: «بۇ پائالىيەت بەك تەسىرلىك بولدى. مېنىڭچە، 10 يىلدىن كېيىنمۇ دوستلىرىم بىلەن ئەسلىشىپ تۇرىدىغان ئۇنتۇلغۇسىز بىر دالا پائالىيىتى بولدى، بۇ گۇرۇپپىدا ئىلگىرى ئۆزۈم تونۇيدىغان دوستلىرىم بار ئىدى، ھازىر يەنە يېڭىدىن تونۇشقان دوستلىرىممۇ بولدى.»

ئىمران تايماس ئىسىملىك ياش ئۆزىنىڭ بۇ يىل ئالىي مەكتەپكە ئۆتكەنلىكىنى، بۇ قېتىملىق دالا پائالىيىتىگە قاتنىشىپ كۆپلىگەن تەسىراتلارغا ئېرىشكەنلىكىنى، ئۇيغۇر ياشلىرىنىڭ بىرلىكتە پائالىيەت ئېلىپ بېرىشنىڭ ئىنتايىن مۇھىملىقىنى چۈشىنىپ يەتكەنلىكىنى بىلدۈردى.

11‏-سىنىپ ئوقۇغۇچىسى ئالىمجانمۇ زىيارىتىمىزنى قوبۇل قىلىپ، ئۆزىنىڭ بۇ قېتىملىق دالا پائالىيىتىدىن ئالغان مول تەسىراتلىرىنى بايان قىلىپ ئۆتتى.