“Qizilsu edebiyati” ning tehriri, sha'ir abdushükür abduréhimning türmidin chiqip ölgenliki delillendi

“Qizilsu edebiyati” zhurnilining tehriri, sha'ir abdushükür abduréhimning edebiyat sahesidiki teshkilatchiliq pa'aliyiti seweblik 17 yilliq késiwétilgenliki we jaza mudditini ötewatqan mezgilide késellinip doxturxanida jan üzgenliki ashkarilandi. Yéshi téxi 50 ke barmighan sha'irning ölüm xewirini qizilsu j x orgini delillidi.

Biz ötken hepte sha'ir we edib abdulla sawutning ölümi heqqide ehwal éniqlashlirimiz dawamida, qizilsu edebiyatining tehriri, sha'ir abdushükür abduréhimningmu oxshashla türmidin chiqip wapat bolghanliqi ashkarilandi. Qizilsu qirghiz aptonom oblastliq saqchi idarisi xadimining ashkarilishiche, 2017 ‏-yili tutqun qilin'ghan abdushükür abduréhim 17 yilliq késiwétilgen. Umu sha'ir abdulla sawutqa oxshashla türmide éghir késellinip saqiyishida ömid qalmighanda a'ilisige qayturulghan. Ötken yilning otturiliridin bashlap yérim yilche dawalan'ghan abdushükür abduréhim öktebirning otturiliri wapat bolghan.

Norwégiyediki Uyghuryar fondi teyyarlighan tutqundiki ziyaliylar tizimlikide, sha'ir abdushükür abduréhimningmu ismi xatirilen'gen. Mezkur teshkilatning yétekchisi, pa'aliyetchi abduweli ayupning tonushturushiche, abdushükür abduréhimning bir qisim muhebbet lirikiliri we edebiy obzorliri edebiyat saheside diqqet tartqan. Abduweli ayup merhumning klassik Uyghur edebiyati nemuniliridin shah meshrepning shé'irliri bilen hazirqi shé'iriyet nemuniliridin, sha'ire chimen'gül awutning eserliri üstide yazghan obzorlirini eslep ötidu.

Déyilishiche, abdushükür abduréhim edebiyat sahesige ijadiy eserliridinmu köprek, teshkilatchiliq ishliri bilen hesse qoshqan. Sha'ir perhat tursunning bir qisim talash-tartishliq eserliri abdushükürning tehrirlishide yoruq körgen we u uyushturghan edebiyat yighinlirida muzakire qilin'ghan.

Qizilsu j x idarisi xadimimu, abdushükürning yazghan eserliride mesile körülmigenliki, peqet, qatnashqan sorunliri seweblik tutqun qilin'ghanliqini eskertidu.

Melum bolushiche, 45-50 yash arisida bolghan abdushükür abduréhim, a'ilisi teripidin pütün küchi bilen dawalitilip béqilghan bolsimu, biraq türmide namelum seweb bilen yuqqan mikrob yaki zexmet sewebidin késelning penjisidin qutulalmighan.

Abduweli ayup, abdushükür abduréhimning heqiqetni yazghanla emes, yazghanliri boyiche yashighan we buning üchün éghir bedel töligen talay Uyghur sha'irliridin biri ikenlikini eskertidu.