Shinjang pédagogika uniwérsitétining oqutquchisi nurmemet ömer uchqunning 10 yilliq késiwétilgenliki delillendi

Muxbirimiz shöhret hoshur
2022-03-04
Share
nurmemet-omer-uchqun.jpg Shinjang pédagogika uniwérsitétining oqutquchisi nurmemet ömer uchqun. (Waqti we orni éniq emes)
Oqurmen teminligen

“Közüngni ach, özüngni tap erkekler” namliq maqaliler toplimining aptori, “Chong shahmat taxtisi” namliq amérika istratégiye desturini Uyghurche terjime qilghan nurmemet ömer uchqunning 10 yilliq késiwétilgenliki we nöwette kériye türmiside jaza mudditini ötewatqanliqi delillendi.

Inkas qilinishiche, shinjang pédagogika uniwérsitéti filologiye institutining edebiyat oqutquchisi nurmemet ömer uchqun “Dölet medeniyitini chetke qéqish” we “Döletni parchilashqa urunush” bilen eyiblinip 10 yilliq késiwétilgen. Bu uchur nurmemet ömer uchqunning nöwette norwégiyede yashawatqan sawaqdishi hüsenjan ependi teripidin igilen'gen.

Melum bolushiche, edebiyat, terjime, tetqiqat we kompyutér qatarliq köp xil sahede özini puxta yétildürgen we Uyghur jem'iyitige mezkur sahelerde közge körünerlik méwilerni sunup kéliwatqan nurmemet ömer uchqun 2018 ‏-yilining béshida tutqun qilin'ghan. Uning tutqunda ikenliki ikki yil awwalqi éniqlashlirimiz dawamida delillen'gen bolsimu, emma késilgen-késilmigenliki namelum idi. Uning tutqunda ikenliki ashkarilan'ghandin kéyin, hüsenjan ependi özining alaqidar qanalliri arqiliq, nurmemet ömer uchqunning aqiwiti heqqide izchil melumat igiligen we uning kériye türmiside jaza mudditini ötewatqanliqidinmu xewer tapqan.

Téléfonimizni qayta qobul qilghan, pédagogika uniwérsitéti xadimliri, nurmemet ömer uchqunning ehwali heqqidiki so'allirimizgha jawab bérishtin özlirini qachurdi.

Tor arxipliridiki matériyallarda körsitilishiche, nurmemet ömer uchqun, xoten qariqashtin bolup, shinjang uniwérsitétining edebiyat fakultétini 2009 ‏-yili püttürgen we shu yili shinjang pédagogika uniwérsitétigha ishqa chüshken. U 2011 ‏-yildin 2015 ‏-yilghiche shangxey xu'adong pédagogika uniwérsitétida bilim ashurup doktorluq unwanigha érishken we shinjang pédagogika uniwérsitétigha qaytidin ishqa chüshken. U oqush we oqutush ishlirining sirtida ilmiy tetqiqat, edebiy ijadiyet we terjime-tehrir ishliri bilenmu shughullinip Uyghur jem'iyitige közge körünerlik semerilerni teqdim qilghan. Inkas qilinishiche, uning “Közüngni ach, özüngni tap erkekler” namliq maqalisi jem'iyette milliy oyghinish sadasini yangratqan bolsa, “Chong shahmat taxtisi” namliq terjime kitabi jem'iyetni siyasiy sezgürlükke dewet qilghan. Melum bolushiche bu ikki kitab uning bölgünchilik gumani bilen soraq qilinishigha türtke bolghan bolsa, uning “Bayqisang topimu altun” namliq terjime esiri da'iriler teripidin “Gherb medeniyitini kökke kötürüsh we dölet medeniyitini chetke qéqish” dep qaralghan.

Ürümchidiki alaqidar xadimlar nurmemet ömer uchqun heqqide uchur bérishni izchil halda ret qildi.

Hüsenjan ependining igilishiche, nurmemet ömer uchqun ürümchi saqchiliri teripidin tutulup, bir mezgildin kéyin xoten saqchi da'irilirige ötküzüp bérilgen we 10 yilliq késilgendin kéyin, kériye türmisige solan'ghan. Hüsenjan ependi yene nurmemet ömer uchqunning ehwali heqqide, uning ata-anisi olturushluq bolghan qaraqash nahiye yawagh yéziliq saqchi xadimlirining éniq xewiri bolush éhtimalliqini otturigha qoydi. Téléfonimizni qobul qilghan nurmemetning ata-anisi olturushluq kentning sékrétari nurmemetning 10 yilliq késilgenliki we nöwette kériye türmiside jaza mudditini ötewatqanliqini delillidi.

Hörmetlik radi'o anglighuchular, nurmemet ömer uchqun yene Uyghur rayonidiki nopuzluq zhurnallardin “Shinjang medeniyiti” zhurnilining bir mezgil tekliplik muherriri bolup xizmet qilghan. Mezkur zhurnalning dangliq muherriri qurban mamut ependimu 2017-yildin kéyin tutqun qilin'ghan we aqiwiti hazirghiche éniqsiz idi. Xitay saqchilirining délo bir terep qilishta nurmemet ömer uchqun bilen qurban mamut ependini bir-birige chatqan-chatmighanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet