Әркин алптекин дуня ислам кеңиши тәшкилатиға уйғурларниң диний әркинлики һәққидә мураҗиәтнамә йоллиди

Дуня уйғур қурултийиниң рәиси әркин алптекин пәйшәнбә күни дуня ислам әллири йиғини тәшкилатиға мураҗиәтнамә елан қилип, пәйғәмбәр әләйһиссалламниң һәҗиви рәсимигә шиддәтлик инкас қайтурған, әмма уйғурларниң мәсчиткә кириш, роза тутуш вә һәҗ ибадити чәкләнсә инкас қайтурмиған дуня ислам тәшкилати дөләтлирини уйғурларниң диний вәзийитигә көңүл бөлүшкә чақирди.

У, дуня ислам тәшкилатиға язған мураҗиәтнамисидә, " уйғурларниң диний етиқади уларни контрол қилишниң қоралиға айлинип қалмақта. Йеқиндин бери хитай даирилири уйғурларға қаритилған тизгинләшни күчәйтип, дөләт вә һөкүмәт ишчи - хизмәтчилири, яш- өсмүрләр, партийә әзалири вә аялларниң мәсчиткә киришини чәклиди" дәп язған. Әркин алптекин мураҗиәтнамисидә, хитай һөкүмити уйғурларниң диний һоқуқини дәпсәндә қилиш билән биргә, диний затларни қолға елиш, зинданға ташлаш, тән җазаси бериш, өлтүрүш вә реҗим астида тутуш сиясити иҗра қилип келиватқанлиқини мисаллар билән тәкитлиди.

У, " хитай даирилириниң мәвҗут сиясити шәрқий түркистан хәлқини үмидсизлик вә бурухтумлуққа мәһкүм қилмақта. Бу үмидсизлик уйғур мусулманлирини зор тәвәккүлчиликкә мәҗбурлиши мүмкин " дәйду. Әркин алптекинниң дуня ислам тәшкилатиға язған мураҗиәтнамиси пәйғәмбәр әләйһиссалламниң һәҗви рәсими данийә гезитидә елан қилинғандин кейин, ислам дунясида зор наразилиқ пәйда қилған вәзийәткә тоғра кәлди. Әмма хитай даирилириниң мусулманларға буйрулған диний пәризләрни чәкләш сиясити ислам дунясида һәзрити муһәммәдниң һәҗиви рәсимичилик инкас қозғиялмиған.

Мураҗиәтнамисиниң ахирида әркин алптекин, дуня ислам әллири йиғини тәшкилати рәһбәрликиниң шәрқий түркистанда тәкшүрүш елип бериш, диний вә сияси өктичиләргә өлүм җазаси беришни тохтитиш, уйғурларниң мәдәнийәт, диний вә миллий кимликини қоғдашқа капаләтлик қилишни тәләп қилди. (Әркин)