Қаримай нефит башқуруш идарисиниң ишчилири намайиш өткүзди

Германийидики шәрқий түркистан учур мәркизиниң радиомизға мәлум қилишичә, қаримай нефит башқуруш идарисидики хизмәт стажини сетивәткән ишчиларниң 3 - айниң 13 - күнидин башлап елип бериватқан намайиши һазирғичә давам қилмақта икән.

Намайишқа чиққучиларниң% 80 и уйғур, % 20 и уйғур елидә туғулған иккинчи әвлад хитайлар икән. Улар асаслиқи хизмәт стажини төвән баһада сетивәткәндин кейин, нөвәттә турмуш вә давалиниш ишлирида қийиниливатқанлиқи сәвәбидин намайишқа чиққан болуп, улар һазир балилирини оқутуш вә дохтурханида давалиниш қатарлиқ турмуш мәсилилиридә иқтисадий йетишмәсликтәк қийинчилиқларға дуч кәлгән.

Намайишқа чиққан миңдин ошуқ ишчиларниң сани һазир нәччә йүзгә чүшүп қалған болсиму, лекин улар һазир йәнила қаримай нефит башқуруш идарисиниң партком ишханиси алдида давамлиқ тинч қаршилиқ билдүрүп, мәзкур орундин хизмәтчиләрниң стажини сетишиға аит һөҗҗәтләрни көрситишини һәмдә турмуш қийинчилиқи түпәйлидин һөкүмәтниң уларни қайта ишқа орунлаштурушини тәләп қилған. Бирақ қаримай нефит башқуруш идарисиниң партком секритари таң җйән, ишчилар билән сөһбәт елип беришни рәт қилған.

Шәрқий түркистан учур мәркизиниң билдүришичә йәнә, қаримайдики бихәтәрлик идариси, бу намайишқа башчилиқ қилған чүн фалиң исимлик тәнтәрбийә оқутқучисини тутқун қилған. Нөвәттә намайишчилар һөкүмәттин бу кишини қоюп беришни күчлүк тәләп қилмақта икән. Намайишчиларниң мәзкур агентлиққа билдүрүшичә, һөкүмәт уларниң стажини сетивалғанда һәр йилиға 4 миң юәндин бәргән, әмма хитайниң дачиң нефитликидә болса ишчиларниң стажини йилиға 10 миң юәндин сетивалған икән. (Пәридә)