Қәшқәр вилайитидә қолға елинғанларниң сани 500 дин ашқан

Роейтерс, мәркизи агентлиқ қатарлиқ хәлқара мәтбуатларниң хәвәр қилишичә, 4 ‏ - авғуст сәмән йоли вәқәсидин кейин, қәшқәр вилайити бойичә 500 дин артуқ киши қолға елинған. Пәқәт қәшқәр шәһәр ичидин қолға елинғанлар санила 100дин ашқан.
Мухбиримиз шөһрәт һошур хәвири
2008-08-25
Share

  Хәвәрләрдә баян қилинишичә, хитай һөкүмити бу қетимқи кәң - көләмлик тутқун қилиш һәрикитигә гиләм тазилаш һәрикити дәп нам бәргән вә бу нам астида 150 қетим ахтуруш һәм тутуш һәрикити елип берип 500дин артуқ кишини қолға алған. Бу қетимқи тутқун қилиш һәркитини җамаәт хәвпсизлик, дөләт бихәтәрлик, чегра мудапиә қатарлиқ тармақлар бирликтә елип барған.

Хәвәрләрдә әскәртилишичә, нөвәттә қәшқәрдә яшлар арисида уштумтут ғайип болуп кетиш, уруқ - туғқан қериндашлар ара хәвәр алақисиз қелиш адәттики ишқа айлинип қалған. Нөвәттә көзәткүчиләр, бу һәрикәтни хитайниң 4 ‏ - авғуст сәмән йоли вәқәси сәвәблик уйғурлардин өч елиш һәрикити дәп қаримақта.

Йәнә бәзи көзәткүчиләр болса бу хил халиғанчә тутқун қилишниң уйғур районида узундин бери давамлишип келиватқанлиқини, 4 ‏ - авғуст сәмән йоли вәқәси сәвәблик вәзийәтниң әмдила дуняға ашкарилиниватқанлиқини билдүрүшмәктә.

4‏ - Авғуст сәмән йоли вәқәсидин кейин, қәшқәр сақчи идариси мухбирларниң соалиға җаваб берип, қәшқәрдә қоллинишқа болидиған барлиқ бихәтәрлик тәдбирлирини қоллинип болғанлиқини, қоллинидиған чарә қалмиғанлиқини билдүргән иди. Мәзкур хәвәр агентлиқлири хәвәрни дуня уйғур қурултийиниң баянатчиси дилшат решит тәминлигән учурларға асасән тәйярлиған. Дилшат решит хәлқара җамаәтни уйғур райониниң олимпиктин кейинки вәзийитигә җиддий көңүл бөлүшкә чақирған.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт