Үрүмчидики бир али мәктәптә қиз оқуғучилар үстидин һамилдарлиқ тәкшүрүши елип барди

Уйғур аптоном районидики йәрлик мәтбуатларниң хәвәр қилишичә, аптоном районниң мәркизи үрүмчидики бир али мәктәптә қиз оқуғучилар үстидин мәҗбури түрдә һамилдарлиқ тәкшүрүши елип елип берилған.

Мәтбуатлар, бу тәкшүрүш, оқуғучилар вә оқуғучиларниң аилә - тавабати алдидики мәсулийәтчанлиқини ада қилишни мәқсәт қилған, дәп язди. Хәвәрдә, тәкшүрүшниң қайси али мәктәптә елип берилғанлиқини ениқ оттуриға қоймиған болсиму, лекин тәкшүрүш бир техник мәктәптә елип берилғанлиқини вә тәкшүрүшниң бирқанчә йилдин бери йеңи оқуғучилар тәтилгә қоюп берилиштин бурун йолға қоюливатқанлиқини билдүрди.

Мәктәп даирилири " һәр йили оқуғучиларда саламәтлик тәкшүрүши елип бериватимиз. Бу қетимқи һамилдарлиқни тәкшүрүш буниң бир қисими," дәп тәкитлигән. Ройтерс ахбарат агентлиқиниң хәвәр қилишичә, даириләр йеңи оқуғучиларниң тәхминән % 80 - 70 ни тәшкил қилидиған йеши 17 дин 18 гичә болған қизларни мәктәп залиға йиғип, сүйдүк тәкшүрүши елип барған.

Хәвәрдә әскәртишичә, әгәр қизларда һамилдарлиқтин бишарәт беридиған нормалсиз әһваллар байқиса, дохтур буни дәрһал мәктәп даирилириға мәлум қилидикән. Һамилдарлиқ аламәтлири байқалған бәзи оқуғучиларниң мәктәптин өзликидин чекинидиған яки башқа мәктәпкә йөткилип кетишни илтимас қилған әһвалларму көрүлгән.

Лекин хәвәрдә бәзи оқуғучиларниң достлиридин сүйдүк арийәт елип тәкшүрүштин өтүвалғанлиқиниму язди. Бәзи оқуғучилар сүйдүк тәкшүрүштин наһайити қолайсизлиқ һис қилғанлиқини билдүргән. Йәнә бәзиләр бу усулға қарши елиш позитсийиси тутқан.

Хитай даирилири уйғур аптоном районида пиланлиқ туғут сияситини йолға қойған 1987 -йилдин бери, болупму йеқинқи 10 йилдин бери бу сиясәтни қаттиқ иҗра қилмақта. Күзәткүчиләрниң әскәртишичә, қиз оқуғучилар үстидин һамилдарлиқ тәкшүрүши елип бериш хитайдики башқа али мәктәпләрдә көрүлүп бақмиған әһвал болуши мүмкин. (Әркин)