Уйғур елидә әйдиз вируси тошуғучилар аз кәм 23 миңға йәткән

 Бәзи көзәткүчиләр уйғур или әйдиз вируси тошуғучиларниң сани җәһәттә 4‏ - орунни игилигән болуши мумкин, лекин нопусниң аз - көплүки билән нисбәтләштүргәндә , уйғур елиниң 1 ‏ - орунни игиләш еһтимали зор, дәп қаримақта.

 22756 Нәпәр дейилгини хитай рәсмий органлириниң статистикиси болуп, " тәңритағ" тори җүмә күнки бир хәвиридә бу мәлуматниң 29 ‏ - май күни үрүмчидә өткүзүлгән "австралийә - шинҗаң әйдизниң алдини елиш вә әйдиз бимарлириға көңүл бөлүш түри"ниң тәҗрибә алмаштуруш йиғинида елан қилинғанлиқини билдүрди. Хәвәрдә йәнә , әйдиз вирусиниң аптоном райондики 14 вилайәт вә 91 наһийиниң һәммисидә байқалғанлиқини, әйдиз вируси тошуғучиларниң60 миңдин ашидиғанлиқини, буларниң көп қисими яшларни асас қилидиғанлиқини вә вирусниң үзлүксиз кеңийиш басқучида туруватқанлиқини илгири сүрди.

Йеқинда америка пенсилванийә университетиниң әйдиз тәтқиқатчиси мәзгер үрүмчидә тәкшүрүш елип берип, әйдизниң уйғурларда йилиға %9 көпийиватқанлиқини, болупму ақтамака чәккүчиләрниң %30 дин көпрәки әйдиз вирусида юқумланғанлиқини вә буниң дуняви рекорт яратқанлиқини билдүргән иди.

 Америкилиқ уйғуршунас җастин роделсон, буниңдин бирқанчә йиллар илгири әйдиз вирусиниң тарқилиши уйғурларда наһайити хәтәрлик әһвалға берип қалидиғанлиқини агаһландурған иди. У, 2000 ‏ - йили америка дөләт мәҗлисидә гуваһлиқтин өткәндә, " әйдиз кәлгүси йилларда уйғурларға келидиған сиясий зийәнкәшликтинму хәтәрлик нәрсә болуп қелиши мумкин " дәп тәкитлигән.