Uyghur élide eydiz wirusi toshughuchilar az kem 23 minggha yetken

 Bezi közetküchiler Uyghur ili eydiz wirusi toshughuchilarning sani jehette 4‏ - orunni igiligen bolushi mumkin, lékin nopusning az - köplüki bilen nisbetleshtürgende , Uyghur élining 1 ‏ - orunni igilesh éhtimali zor, dep qarimaqta.

 22756 Neper déyilgini xitay resmiy organlirining statistikisi bolup, " tengritagh" tori jüme künki bir xewiride bu melumatning 29 ‏ - may küni ürümchide ötküzülgen "awstraliye - shinjang eydizning aldini élish we eydiz bimarlirigha köngül bölüsh türi"ning tejribe almashturush yighinida élan qilin'ghanliqini bildürdi. Xewerde yene , eydiz wirusining aptonom rayondiki 14 wilayet we 91 nahiyining hemmiside bayqalghanliqini, eydiz wirusi toshughuchilarning60 mingdin ashidighanliqini, bularning köp qisimi yashlarni asas qilidighanliqini we wirusning üzlüksiz kéngiyish basquchida turuwatqanliqini ilgiri sürdi.

Yéqinda amérika pénsilwaniye uniwérsitétining eydiz tetqiqatchisi mezgér ürümchide tekshürüsh élip bérip, eydizning Uyghurlarda yiligha %9 köpiyiwatqanliqini, bolupmu aqtamaka chekküchilerning %30 din köpreki eydiz wirusida yuqumlan'ghanliqini we buning dunyawi rékort yaratqanliqini bildürgen idi.

 Amérikiliq Uyghurshunas jastin rodélson, buningdin birqanche yillar ilgiri eydiz wirusining tarqilishi Uyghurlarda nahayiti xeterlik ehwalgha bérip qalidighanliqini agahlandurghan idi. U, 2000 ‏ - yili amérika dölet mejliside guwahliqtin ötkende, " eydiz kelgüsi yillarda Uyghurlargha kélidighan siyasiy ziyenkeshliktinmu xeterlik nerse bolup qélishi mumkin " dep tekitligen.