Xitay milliy ishlar komitéti Uyghur musulmanlirining hej pa'aliyitini cheklewatqanliqini inkar qildi

Xitay xelq torining xewiridin ashkarilinishiche, 16 - awghust küni béyjingda az sanliq milletler kishilik hoquq tereqqiyati heqqidiki axbarat élan qilish yighini échilghan, yighinda chet'el muxbirlirining, Uyghur musulmanlirining insaniy hem diniy heq‏ - hoquqliri heqqide soralghan so'allargha jawab bergen, xitay milliy ishlar komitéti mu'awin re'isi wu shimin, xitay da'irilirining Uyghurlarning hej qilish pa'aliyitige tosqunluq qiliwatqanliqini inkar qilghan.
Muxbirimiz gülchéhre xewiri
2008-08-19
Share

 Wu shimin, " xitay hökümiti néme üchün Uyghur musulmanlirining mekkige bérip hej pa'aliyitige qatnishishini yaqturmaydu?" dep sorighan muxbirgha jawab bérip, " men shuni éytimenki, junggo hökümiti héchqachan Uyghurlarning hejige bérishini cheklimidi, hökümitimiz, her qaysi milletlerge étiqad erkinlik siyasiti yürgüzmekte, musulmanlarning hej qilish erkinliki heqqidimu mexsus qanunlar bar, Uyghur musulmanlarla emes, pütün xitaydin her yili nechche minglap musulman haji bolup kéliwatidu," dégen.

Emma Uyghurlarning radi'omizgha inkas qilishiche,xitay hökümiti yillardin buyan Uyghurlarning hej qilishini türlük tedbirler bilen tosup kéliwatqan bolup, hazirmu Uyghurlarning pasportini yighish, ürümchi we bashqa ayrudurumlarda hej qilghuchilarni tosush heriketliri dawam qilmaqta, qeshqer, xoten, aqsu qatarliq Uyghurlar zich olturaqlashqan rayonlarda, yerlik da'iriler hetta oqutquchi, oqughuchi hemde xizmetchilerning roza tutushi qattiq cheklinidighanliqi eger xilapliq qilghuchilar bayqalsa jazalinidighanliqi heqqide uqturushlarni chüshürgen.

Bu heqte radi'omizgha bayanat bergen dunya Uyghur qurultéyi bayanatchisi dilshat rishit, xitay hökümitining Uyghurlarning insani hemde diniy heq ‏ - hoquqlirini ochuq ‏ - ashkara basturushini qattiq eyibligendin sirt, dunya jama'etchilikini, Uyghurlargha qaratqan basturush heriketlirini toxtitish, ularning eqelliy diniy étiqadi hem insani heq ‏ - hoquqigha hörmet qilish toghruluq xitaygha bésim ishlitishke chaqirdi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet