Xitay da'iriliri "Uyghurbiz" tor ponkitini pichetligen

Én'gilizche chiqidighan "yer shari pikir erkinlik terghibatchi tori"xitaydiki musulman ahale we bashqa étnik guruhlar bilen xen milliti arisidiki zor alaqe boshluqida köwrüklük rol oynawatqan "Uyghur torda" tor békitining pichetlen'genlikini we tor béketlirini sewebsiz péchetlesh xitayda adettiki bir ish bolup qalghanliqini yazdi.

" Uyghur torda " dégen nam bilen chiqidighan mezkur tor békitining 15 ‏ - may küni tordashlargha élan qilghan xoshlishish xétide " Uyghur torda" ponkitining hemmeylen'ge melum bolghan sewebler tüpeylidin taqilidighanliqini we buni élan qilish özlirige nahayiti éghir kéliwatqanliqini tekitligen. Lékin torda tor békitining hemmeylen'ge melum bolghan taqilish seweblirini izahlighan ulanma bolsa échilmidi.

Xoshlishish xétide mundaq deydu:" biz bu yerde oxshimighan milletlerdin bolghan nurghun dostlarni öz ‏ - ara tonushturush we uchrashturush arqiliq ular arisidiki öz ‏ - ara chüshinishni téximu keng we chongqurlashturduq. Uyghur torda milletlerning ammiwi alaqe qanilini achti. Biz xelqler arisidiki ammiwi di'alogning nahayiti muhim ikenlikige ishinettuq ".

Mezkur tor békiti Uyghurlar duch kéliwatqan bezi sezgür mesililerni qorqmay munazire qilalaydighan, bu mesililerge xitaydiki oxshimighan milletler jümlidin xitaylar pikir qatnashturidighan az sandiki Uyghurlargha munasiwetlik tor betlerdin idi. " Uyghur torda"ning xoshlishish xétide eskertishiche, mezkur tor künde bir milyon bet échilidighan tor békiti bolup qalghan iken.