Xitay da'iriliri olimpik mezgilide bir qisim Uyghur munazire tor betlirini taqidi

 Bu heqte melum tor bette, xitayning munasiwetlik da'irilirining belgilimisi buyiche olimpik musabiqe mezgilide munazire munbirining 8 - ayning 25 - künige qeder taqilidighanliqi heqqide uqturush chaplan'ghan bolup, uqturushta, " olimpik yighini mezgilide tor uchur bixeterlikige kapaletlik qilish üchün bu mezgilde munberge her qandaq ezalarning téma, inkas yézishi cheklinidu " dep yézilghan we shundaqla, buning béyjing olimpik tenheriket musabiqisining muweppeqiyetlik ötküzülüshi üchün da'irilerning bir tutash élip bériwatqan tedbirining biri ikenliki, xitayning qanunigha xilap, muqimliqqa tesir yetküzüdighan bölgünchilik mezmunidiki her qandaq yollanmilarni yollimasliq heqqide agahlandurush bérilgen.

Xitayning olimpik yighini jeryanida Uyghur élide tor abuntlirining normal meshxulatliri mushuninggha oxshash cheklimilerge uchrighandin bashqa, xelq ammisining normal hayati pa'aliyetlirimu qattiq nazaret astigha élinmaqta.

Bolupmu qeshqer hemde kuchalarda yüz bergen egeshme weqelerdin kéyin, xitay hökümiti qeshqer, ürümchi, kucha, ghulja qatarliq Uyghurlar zich olturaqlashqan jaylarda herbiy halet yürgüzmekte hemde Uyghurlarni keng kölemlik tutqun qilish dawam qilmaqta.