Xitay hökümiti Uyghur éli we tibettiki kontrolluqini téximu kücheytishi mumkin

 Jil dru teripidin élan qilin'ghan maqalide, " Uyghur élide olimpik harpisida béyjing hökümiti teripidin élin'ghan qattiq bixeterlik tedbirlirige qarimay, awghust éyining ichidila xitay bixeterlik qisimlirigha qarshi 4 qétim hujum élip bérilishi, xitay hökümitining yéqinqi birnechche ay ichide tibet we Uyghur élige orunlashturulghan minglighan herbiy we saqchi qisimlirini chékindürmey bu rayonlarda dawamliq tutup turushigha seweb bolushi mumkin" déyilgen.

Xitay hökümitining tibet we Uyghur élidiki téléfon we intérnét qatarliq alaqilishish qoralliri üstidiki kontrolluqini dawamlashturuwatqanliqi eskertilgen maqalide, béyjing da'iriliri chet dölet rehberliri shuningdek tibet we Uyghur pa'aliyetchilirining tibetler we Uyghurlarning xitay hökümitige bolghan naraziliqlirini anglash we ularning shikayetliri üstide muzakire élip bérish toghrisidiki teleplirini ret qilip kéliwatqanliqini eskertilgen.

Xitay da'irilirining dalay lamani ishen'gili bolmaydighan adem dep tenqid qilsa, Uyghur élidiki weqelerni térrorchilarning ishi dep qarawatqanliqi tekitlen'gen maqalide, awghust éyi ichide Uyghur élide élip bérilghan 4 hujumning xitay saqchiliri we bixeterlik qisimlirigha qaritilghanliqi we hujum qilghuchilarning pichaq we öyde yasalghan bomba qatarliq nahayiti addiy qorallar ishletkenliki alahide tilgha élin'ghan.

Maqaliside, dunya Uyghur qurultiyining bayanatchisi dilshat rishitning "xitay hökümitining basturush siyasitining weziyetni téximu jiddiyleshtürüwétishidin endishe qiliwatimiz" dégen sözlirini neqil keltürgen aptur jil dru, maqalisini, xitay ijtima'iy penler akadimiyisining proféssori yu jiyenrongning " eger hökümet shinjangni xitay térritoriyisi ichide tutup turushni xalisa, Uyghur musteqilchilirige qarshi choqum qattiq tedbirler qollinishi kérek" dégen sözliri bilen ayaghlashturghan.