Ғулҗа шәһиридә бир қисим аһалиләрниң ач қеливатқанлиқи вә буни тилға елиши чәклиниватқанлиқи ашкариланди

Мухбиримиз шөһрәт һошур
2020-02-21
Елхәт
Пикир
Share
Принт
Ғулҗа тәвәсидин икәнлик еһтимали болған бир яшниң аилисидики 3 җанниң ач қалғанлиқи һәққидики ғәзәплик шикайити баян қилинған видийодин көрүнүш. 2020Йили 20-феврал.
Ғулҗа тәвәсидин икәнлик еһтимали болған бир яшниң аилисидики 3 җанниң ач қалғанлиқи һәққидики ғәзәплик шикайити баян қилинған видийодин көрүнүш. 2020Йили 20-феврал.
Social Media

Бүгүн иҗтимаий ахбаратларда кәң тарқалған бир видийолуқ учурда ғулҗа тәвәсидин икәнлик еһтимали болған бир кишиниң аилисидики 3 җанниң ач қалғанлиқи вә униң бу қейинчилиқини баян қилишиниң алақидар хадимлар икәнлик еһтимали болған бирқанчә киши тәрипидин тосқунлуққа учриғанлиқи ашкариланди. Мухбиримизниң бу һәқтә елип барған ениқлашлири давамида ғулҗа шәһириниң қарадөң йезисидики бир аял өзлириниң 10 күндин бери йемәк-ичмәк қейинчилиқиға дуч кәлгәнлики, 9 яшлиқ бир қизиниң озуқ йетәрсизликидин һушидин кәткәнликини ашкарилиди. Бу хил әһвалдики кишиләрниң ялғуз өзлири әмәсликини әскәрткән бу ханим асаси қатламдики кадирларниң аһалиләрни бу хил әһвалларни ичидә билишкә вә җәмийәткә ашкарилимслиққа зорлаватқанлиқини баян қилди.

Бүгүн иҗтимаий таратқуларда кәң тарқалған бир видийолуқ көрүнүштә ғулҗа тәвәсидин икәнлик еһтимали болған бир яшниң аилисидики 3 җанниң ач қалғанлиқи һәққидики ғәзәплик шикайити баян қилинған. Видийода йәнә униң алақидар һөкүмәт хадимлири икәнлик еһтимали болған бир қанчә киши тәрипидин тосқунлуққа учраватқанлиқи көрситилгән. Видийодин йәнә бу ачлиқ әһвали вә зарлинишниң уйғур районида йолға қоюливатқан җиддий һаләт сәвәблик йүз бәргәнлики мәлум.


Биз бу ачлиқ әһвалиниң омумийлиқ дәриҗисини ениқлап беқиш үчүн ғулҗа шәһиридики бир қисим аһалиләргә телефон қилдуқ. Телефонимизни қобул қилған бир ханим өз аилисидә 7 җан барлиқи, буларниң 10 күндин бери йемәк-ичмәктә қейинчилиқ тартиватқанлиқини ашкарилаиди. Униң дейишичә, 4 кичик бала болған бу аилидә чоңлар балиларни нәзәрдә тутуп күнигә бир вақтин тамақ йәп күн өткүзгән. Балилардин бири йемәк-ичмәк йетәрсизлики сәвәбидин мағдурсизлинип һушидин кәткән. Униң баян қилишичә, бундақ ачлиқ мәсилисигә дуч кәлгәнләр қарадөң йезисида көп санда болуп, асаси қатлам кадирлири бу әһвалларниң юқириға мәлум қилиниши яки җәмийәткә ашкарилинишини халимиғачқа қейинчилиқини мәлум қилған аһалиләргә соғуқ муамилә қилған вә әһвални ичидә билишкә зорлиған. Қарадөң йеза аһалилиридин маһирә исимлик бир ханим аһалиләр райони кадирлириға өйидә көмүр қалмиғанлиқини баян қилғинида хадимларниң аччиқ тәнә гәплиригә дуч кәлгән. Мәһәллидики бир мейип кишиниң йемәк-ичмәк тәлипиму рәт қилинған вә униң уруқ-туғқанлириға уни бу әһвал үстидин шикайәт қилмаслиққа көндүрүшкә буйриған.

Илгири иҗтимаий таратқуларда тарқалған башқа учурларда бәзи лагерлардикиләрниң 10 күнчә тамақсиз қалғанлиқи баян қилинса, йәнә бәзи учурларда бәзи аһалиләрниң өйидә қалайдиған көмүр қалмиғанлиқи үчүн мәшкә аяқ-кийимлирини қалаватқанлиқини паш қилинған иди. Өткән һәптиләрдә атуштин игилигән учурлиримиздиму аһалиләрниң озуқлуқ мәсилсидин әндишә қиливатқанлиқи мәлум болған. Ашкарилинишичә, бу ачлиқ мәсилиси, иқтисадий асасий аҗиз болған, болупму күндилик турмушини күндилик қамдайдиған аһалиләрдә омумиййүзлүк һалда көрүлмәктикән. 

Йәнә мәлум болушичә, коча чарлашқа бекитилгән хадимларниң вәзиписи ялғуз аһалиләрни юқумлиништин тосушла әмәс, бәлки аһалиләрниң өз қейинчилиқлирини җәмийәткә ашкарилаштин тосуш, йәни аталмиш муқимлиқни қоғдаштур. Шуңа мәзкур видийода қейинчилиққа дуч кәлгән кишиниң өзини тосуватқан хадимларға ғәзәплик һалда йениш билән бирликтә өзини түврүккә вә йәргә үсүш арқилиқ өзиниң җандин тойғанлиқини ипадиләватқанлиқи мәлум.
Қарадөңдики мәзкур ханимниң баян қилишичә, алақидар хадимлар юқириқидәк тосқунлуқларни пәйда қиливатқан болсиму, әмма шәһәрдики иқтисадий әһвали нисбәтән яхши кишиләр, болупму йемәк-ичмәк дукандарлири, қейинчилиқи бар кишиләргә инсандарчилиқ нуқтисидин ярдәм қилмақтикән. Улар бу ярдимини хадимлар чарлаштин тохтиған мәзгилдә, йәни сәһәр вақтида йошурунчә елип бармақтикән.

Пикирләр (0)
Share
Толуқ бәт