Ghulja shehiride bir qisim ahalilerning ach qéliwatqanliqi we buni tilgha élishi chekliniwatqanliqi ashkarilandi

Muxbirimiz shöhret hoshur
2020.02.21
Ghulja-Acharchiliq.png Ghulja tewesidin ikenlik éhtimali bolghan bir yashning a'ilisidiki 3 janning ach qalghanliqi heqqidiki ghezeplik shikayiti bayan qilin'ghan widiyodin körünüsh. 2020Yili 20-féwral.
Social Media

Bügün ijtima'iy axbaratlarda keng tarqalghan bir widiyoluq uchurda ghulja tewesidin ikenlik éhtimali bolghan bir kishining a'ilisidiki 3 janning ach qalghanliqi we uning bu qéyinchiliqini bayan qilishining alaqidar xadimlar ikenlik éhtimali bolghan birqanche kishi teripidin tosqunluqqa uchrighanliqi ashkarilandi. Muxbirimizning bu heqte élip barghan éniqlashliri dawamida ghulja shehirining qaradöng yézisidiki bir ayal özlirining 10 kündin béri yémek-ichmek qéyinchiliqigha duch kelgenliki, 9 yashliq bir qizining ozuq yétersizlikidin hushidin ketkenlikini ashkarilidi. Bu xil ehwaldiki kishilerning yalghuz özliri emeslikini eskertken bu xanim asasi qatlamdiki kadirlarning ahalilerni bu xil ehwallarni ichide bilishke we jem'iyetke ashkarilimsliqqa zorlawatqanliqini bayan qildi.

Bügün ijtima'iy taratqularda keng tarqalghan bir widiyoluq körünüshte ghulja tewesidin ikenlik éhtimali bolghan bir yashning a'ilisidiki 3 janning ach qalghanliqi heqqidiki ghezeplik shikayiti bayan qilin'ghan. Widiyoda yene uning alaqidar hökümet xadimliri ikenlik éhtimali bolghan bir qanche kishi teripidin tosqunluqqa uchrawatqanliqi körsitilgen. Widiyodin yene bu achliq ehwali we zarlinishning Uyghur rayonida yolgha qoyuliwatqan jiddiy halet seweblik yüz bergenliki melum.


Biz bu achliq ehwalining omumiyliq derijisini éniqlap béqish üchün ghulja shehiridiki bir qisim ahalilerge téléfon qilduq. Téléfonimizni qobul qilghan bir xanim öz a'iliside 7 jan barliqi, bularning 10 kündin béri yémek-ichmekte qéyinchiliq tartiwatqanliqini ashkarila'idi. Uning déyishiche, 4 kichik bala bolghan bu a'ilide chonglar balilarni nezerde tutup künige bir waqtin tamaq yep kün ötküzgen. Balilardin biri yémek-ichmek yétersizliki sewebidin maghdursizlinip hushidin ketken. Uning bayan qilishiche, bundaq achliq mesilisige duch kelgenler qaradöng yézisida köp sanda bolup, asasi qatlam kadirliri bu ehwallarning yuqirigha melum qilinishi yaki jem'iyetke ashkarilinishini xalimighachqa qéyinchiliqini melum qilghan ahalilerge soghuq mu'amile qilghan we ehwalni ichide bilishke zorlighan. Qaradöng yéza ahaliliridin mahire isimlik bir xanim ahaliler rayoni kadirlirigha öyide kömür qalmighanliqini bayan qilghinida xadimlarning achchiq tene geplirige duch kelgen. Mehellidiki bir méyip kishining yémek-ichmek telipimu ret qilin'ghan we uning uruq-tughqanlirigha uni bu ehwal üstidin shikayet qilmasliqqa köndürüshke buyrighan.

Ilgiri ijtima'iy taratqularda tarqalghan bashqa uchurlarda bezi lagérlardikilerning 10 künche tamaqsiz qalghanliqi bayan qilinsa, yene bezi uchurlarda bezi ahalilerning öyide qalaydighan kömür qalmighanliqi üchün meshke ayaq-kiyimlirini qalawatqanliqini pash qilin'ghan idi. Ötken heptilerde atushtin igiligen uchurlirimizdimu ahalilerning ozuqluq mesilsidin endishe qiliwatqanliqi melum bolghan. Ashkarilinishiche, bu achliq mesilisi, iqtisadiy asasiy ajiz bolghan, bolupmu kündilik turmushini kündilik qamdaydighan ahalilerde omumiyyüzlük halda körülmektiken. 

Yene melum bolushiche, kocha charlashqa békitilgen xadimlarning wezipisi yalghuz ahalilerni yuqumlinishtin tosushla emes, belki ahalilerning öz qéyinchiliqlirini jem'iyetke ashkarilashtin tosush, yeni atalmish muqimliqni qoghdashtur. Shunga mezkur widiyoda qéyinchiliqqa duch kelgen kishining özini tosuwatqan xadimlargha ghezeplik halda yénish bilen birlikte özini tüwrükke we yerge üsüsh arqiliq özining jandin toyghanliqini ipadilewatqanliqi melum.
Qaradöngdiki mezkur xanimning bayan qilishiche, alaqidar xadimlar yuqiriqidek tosqunluqlarni peyda qiliwatqan bolsimu, emma sheherdiki iqtisadiy ehwali nisbeten yaxshi kishiler, bolupmu yémek-ichmek dukandarliri, qéyinchiliqi bar kishilerge insandarchiliq nuqtisidin yardem qilmaqtiken. Ular bu yardimini xadimlar charlashtin toxtighan mezgilde, yeni seher waqtida yoshurunche élip barmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.