Atushtiki saqchi xadimliri: chaghanni tebrikleshke qatnashqanlar mukapatlinidu, qatnashmighanlar jazalinidu

Bir heptidin buyan ijtima'iy taratqularda Uyghur élide chaghanliq pa'aliyetlerning daghdughiliq élip bériliwatqanliqi we chaghanni tebriklewatqanlarning köpinchisining Uyghur ikenliki heqqide uchurlar tarqaldi. Muxbirimizning bu heqtiki éniqlashliri dawamida, atushtiki alaqidar xadimlar, xitay da'irilirining Uyghurlarni chaghanni tebriklinish üchün bir tereptin righbetlendürüsh we mukapatlash tedbiri qollansa؛ yene bir tereptin siyasiy idiyewi xizmet ishlesh we qatnashmisa jazalinidighanliqi heqqide qorqutush tedbirlirini qollan'ghanliqi ashkarilandi.

Ijtima'iy taratqulardin melum bolushiche, chaghanni tebriklesh pa'aliyetliri atushta eng daghdughiliq shekilde dawamlashmaqta. Hetta atushtiki qatnash saqchiliri saqchilarni medhiyeleydighan xitayche naxshilarni tembürde orunlighan. Biz bu tebriklesh pa'aliyetlirining perde arqisini aydinglashturush üchün atushtiki alaqidar orun we xadimlargha téléfon qilduq. Atushtiki bir saqchi xadimi bu pa'aliyetlerge heydekchilik qiliwatqanlar arisida kent derijilik saqchi ishxaniliri barliqini tilgha aldi.

Atushning azaq yézisidiki bir kent sékrétarining ashkarilishiche, chaghanni tebriklesh pa'aliyetlirini her derijilik partkom teshwiqat komitéti bilen siyasiy qanun komitéti birlikte teshkilligen.

Melum bolushiche, da'iriler Uyghurlarni chaghanliq pa'aliyetlerge keng-kölemde qatnashturush üchün righbetlendürüsh bilen qorqutush tedbirini teng qollan'ghan. Yuqiriqi saqchi xadimning déyishiche, chaghanni tebriklesh pa'aliyitige qatnashqanlargha heqsiz kiyim-kéchek tarqitish bilen birlikte yene ulargha pa'aliyet axirida her xil turmush buyumlirini sowghat qilghan؛ bezi jaylarda künige 150 yüendin ish heqqi bergen.

Mezkur xadim kishilerning yéqinqi yillarda idiyeside özgirish bolghanliqini, shunga, chaghanni tebrikleshni chin qelbidin qobul qilghanliqini tilgha alghan bolsimu, emma azaq yézisidiki yuqiriqi sékrétar, chaghan pa'aliyitige qatnishishni ashkara ret qilmisimu, arqisigha tartshqanlar, qatnashmasliq üchün bahane izdigenler bolghanliqini, ularni heriketke keltürüsh üchün kentlerde her küni siyasiy öginishler élip bériliwatqanliqini ashkarilidi.

Atushning aghu yézisidiki bir kent amanliq mudirining ashkarilishiche, da'iriler, özining sen'et iqtidari turup, yeni naxsha-usul mahariti bar turup, tebrikleshtin özini qachurghanlargha mexsus idiyewi terbiye élip barghan. Bu terbiyede chaghanni tebrikleshning mahiyette döletni söyüsh we döletni himaye qilish menisige ige ikenlikini tekitligen. Da'iriler buning bilen birlikte, chaghanliq pa'aliyettin qesten özini qachurghanlarning qanuniy jazagha tartilidighanliqini uqturghan.

Azaqtiki sékrétarning déyishiche, kishilerni chaghanni tebrikleshning zörüriyiti we qatnashmighanlarning aqiwiti heqqidiki bu telim-terbiye yighinliri ikki aydin béri dawam qilmaqta. Arghudiki amanliq mudirining bayanliridin melum bolushiche, yerlik da'iriler bu xil righbet we tehdit arilashqan teshwiqat pa'aliyitini nöwette heptide yette kün, etigen we axshamliri élip barmaqta.

Yuqiriqi xadimlarning bayanliridin melum bolushiche, mana mushundaq qattiq-yumshaq tedbirlerning netijiside Uyghur élide yerlik ahalilerning chaghanni tebriklesh pa'aliyetliri “Ghelibilik”, yeni tosalghusiz we majirasiz dawam qilmaqta.

Yuqirida Uyghur élide nöwette ewjige chiqiwatqan chaghanni tebriklesh pa'aliyetlirining perde arqisi heqqide melumat berduq.