Atushta misirgha bala ewetken bir jemettin az dégende ikki kishining lagérda jan üzgenliki we 5 kishining türmide ikenliki aydinglashti

Muxbirimiz shöhret hoshur
2021-03-04
Share
Atush bögenlik karxanichi qurbanjan abdukérimning lagérdin chiqipla jan özgenliki delillendi Atushluq karxanichi qurbanjan abdukérim lagérdin chiqip 3 kündin kéyin jan üzgen.
Zibibulla teminligen

Aldinqi hepte lagérdin chiqipla jan üzgen tijaretchi qurbanjan abdukérim heqqide téximu ilgirilep élip barghan éniqlashlirimiz dawamida, uning misirdin qaytip kelgen 4 neper jyenining türmide ikenliki we inisi siéyit'axunning balilirini misirda oqutqanliqi üchün késilip nöwette jaza mudditini atushtiki aghu türmiside ötewatqanliqi delillendi. Yene ötken yili lagirda ölgenliki delillen'gen misirdin qaytqan oqughuchi ilham qariningmu qurbanjan abdukérimning jyenliridin ikenliki melum boldi.

Hörmetlik radiyo anglighuchilar, ötken hepte lagérda jan üzgen qurbanjan abdukérimning a'ile ehwali heqqide élip bérghan éniqlashlirimiz dawamida, uning tutqun qilinishigha töt jyenining misirda oqughanliqiningmu sewep bolghanliqi otturigha chiqti. Melum bolushiche, qurbanjan abdukérimning 3 qérindishi bar bolup, bulardin inisi séyit'axun, qurbanjan bilen meslihetliship ibrahim we ezimet isimlik ikki oghlini2013 ‏-yilliri misirgha oqushqa ewetken. 2017 ‏-Yilining béshida séyit'axun atushtiki saqchilarning chaqirtishi bilen tijaret qiliwatqan qirghizistandin qaytip kelgen. U kélishigila misirdiki ikki oghlini qayturup ekilishke mejburlan'ghan. Uning ikki balisi qayturup kélin'gendin kéyin, dada-bala her üchilisi tengla qamaqqa élin'ghan. Zibibullaning déyishiche, séyit'axun ikki balisini misirda oqutqanliqi üchün 18 yilliq késiwétilgen. Téléfonimizni qobul qilghan atush bögendiki alaqidar xadimlar, séyit'axuning qirghizstanda rext tijariti qiliwatqan yéridin qayturup ekilin'genliki we baliliri'ini misirda oqutqanliqi üchün tutulghanliqi, shundaqla 12 yilliq késilgenliki we nöwette atushtiki aghu türmiside jaza mudditini ötewatqanliqini delillidi.

Zibibulla yene séyit'axunning ikki oghlidin bashqa, bu balilar bilen newre qérindash bolghan medine hékimjan we imran hékimjanlarningmu misirdin qaytqan oquchilar ikenliki we ularningmu késiwétilgenlikini tilgha aldi. Bögendiki alaqidar xadimlardin yene biri qurbanjan abdukérimning jemitidin bolghan mezkur 4 oqughichining türmide ikenliki delillidi we ulardin üch nepirining 7 we 9 yilliq késilgenlikini ashkarilidi.

Zibibullaning déyishiche, lagérda jan üzgen qurbanjanning qéyin'akisining oghli ilhamjan muhemmetmu misirdin mejburiy qayturup ekélin'gen we lagérgha ekitilip uzun ötmey jesiti a'ilisige qayturulghan. Bu uchurning toghriliqi ötken yilqi éniqlashlirimiz dawamida delillen'gen idi. Zibibullaning yurttiki alaqidar qanalliri arqiliq uqushiche, ilhamjan memetning ölüm xewirining azabigha berdashliq bérelmigen dadisi memetjan eqliy tengpungluqini yoqitip qoyghan.

Hörmetlik radiyo anglighuchilar, yuqurida atushta misirgha perzentlirini oqushqa ewetken bir jemettin az dégende ikki kishining lagirda ölgenliki we 5 kishining türmide ikenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet