Qeshqer su idarisining kadiri turghun asim meschit chéqishta aktip bolmighanliqi üchün lagérgha ekétilgen

Muxbirimiz shöhret hoshur
2019-03-26
Élxet
Pikir
Share
Print
Chiqiliwatqan meschitlerge échinip qarawatqan boway.
Chiqiliwatqan meschitlerge échinip qarawatqan boway.
Social Media

Biz ötken heptilerde qeshqer su ishliri idarisi xizmetchilirining 15 pirsentining lagérda ikenliki heqqide xewer bergen iduq. Shundin kéyin weziyettin xewerdar kishiler radiyomizgha uchur yollap, mezkur idarining rehberlik hey'etliridin biri, téxnik mudir turghun asimning lagérgha élip kétilgenlikini, uning meschit chéqishta aktip bolmighanliqi üchün "Ikki yüzlimichilik" bilen eyiblinip, jazaliniwatqanliqini melum qildi. Muxbirimizning bu heqtiki éniqlashliri dawamida qeshqerdiki alaqidar xadimlar mezkur uchurning toghriliqini delillidi.

Qeshqer weziyitidin xewerdar kishilerdin biri ötken hepte radiyomizgha inkas yollap, qeshqer su ishliri idarisining yighiwélish lagéridiki téxnik mudiri turghun asimning 2016‏-yildiki meschit chéqish dolqunida aktip bolmighanliqi üchün "Ikki yüzlimichilik" bilen eyiblinip, jazaliniwatqanliqini melum qildi.

Ötken heptilerdiki éniqlashlirimiz dawamida qeshqer su ishliri idarisidin 6 xizmetchining lagérda ikenliki, bu 6 kishidin birining mezkur idarining rehberlik hey'iti, téxnik mudir turghun asim ikenliki melum bolghan idi. Emma uning néme üchün tutulghanliqi aydinglashmighan idi. Inkasta déyilishiche, turghun asim shu yili qeshqer beshkéremning 10‏-kentige meschit bashqurush guruppisi xadimliri qatarida xizmetke chüshken. Xizmet guruppisidikiler ‏10‏-kenttiki merkizi meschitini chéqish üchün heriketke ötkende turghun asim meschitni chéqishtin awwal meschitning chéqilishi heqqide ahalilerni, bolupmu yurt chonglirini xewerlendürüwéitish we zörür tépilsa meschitni chéqishni bir kün kéchiktürüsh heqqide teklip bergen. Eyni chaghda u bu teklipni meschit chéqish dawamida ammining qarshiliqigha uchrimasliq, ushtumtut weqe chiqishning aldini élish meqsitide, yeni xitay hökümitining meydanida turup hökümet menpe'eti üchün otturigha qoyghan bolsimu, aridin ikki yil ötkende bu teklip uning "Ikki yüzlimichilik" bilen eyiblinishige seweb bolghan.

Qeshqerdiki siyasiy-qanun saheside wezipe ötewatqan bir xadim turghun asimning 2016‏-yili 10‏-ayda qeshqer beshkéremde meschit bashqurush guruppisida wezipe alghanliqi we shu chaghdiki xizmet pozitsiyesi seweblik jazalan'ghanliqini delillidi. Weziyettin xewerdar kishining inkasida déyilishiche, turghun asimning weqe chiqishning aldini élish üchün otturigha qoyghan yuqiriqi teklipi eyni chaghda xizmette sörelmilik qilish, aktip we keskin bolmasliq dep qarilip tenqidige uchrighan we mezkur meschitning chéqilishimu shu künila ijra bolghan. Yene mezkur inkasta déyilishiche, turghun asim eyni chaghda bu tenqidke süküt qilip, artuqche özini chüshendürüsh yaki aqlash pozitsiyeside bolmighan. Bu teklip 2018‏-yiligha kelgende meschit chéqishqa qarita naraziliq pikri toplashqa we weqe chiqishqa purset yaritip bérishke urunush dep qaralghan. Turghun asim xitay kompartiyesining eng muhim xizmitide eng sezgür meydanda "Ikki yüzlimichilik" qilish jinayiti bilen eyiblen'gen. Alaqidar xadim gerche turghun asimning konkrét intizam yaki qanun'gha xilap qandaq bir söz-herikette bolghanliqini dep bérelmigen bolsimu, emma uning xizmette passipliq qilghanliqi üchün tutulghanliqini yoshurmidi.

Igilen'gen uchurlardin turghun asimning mezkur teklipni inkas yetküzgüchi dégendikidek weqe chiqishning aldini élish üchün otturigha qoyghanliqi we yaki milliy we meniwi bayliqlarni qoghdash we yaki mehelle jama'itining qelbini renjitmeslikini oylighanliqi hazirche melum emes. Emma melum bolghini xitay da'iriliri 2016‏-yili "Meschitlerni elalashturush" nami astida élip barghan meschit chéqish dolqunining yalghuz meschitlerning yiqilishighila emes, yene bir qatar kishilerning jazalinishighimu seweb bolghanliqidur.

Xitayning türkiyediki bash elchisi ötken ayda naxshichi abduréhim héyt heqqide türkiye hökümitining bayanatigha qayturghan inkasida Uyghur rayonida 24 ming meschit barliqi, meschitler sanining nopusqa nisbeten éytqanda türkiye we islam dunyasidiki herqandaq bir dölettinmu köplükini ilgiri sürgen. Emma bu meschitlerning yerlik xeyr-saxawetchilerning himmiti bilen sélin'ghanliqi we mutleq köp qismining 2016‏-yili "Meschitlerni elalashturush" nami astida chéqiwétilgenlikini shundaqla bu jeryanda bir türküm kishilerning jazalan'ghanliqini tilgha almighan idi. Eyni chaghdiki éniqlashlirimizda meschit chéqishning yalghuz qeshqer toqquzaqtila emes, belki yene yéngisar, qaghiliq we xotenning bir qisim nahiyeliridimu élip bérilghanliqi delillen'gen idi.

Toluq bet