Pénsyonér oqutquchi qéyyum meshrep jüme namizida "Qanunsiz tebligh" anglap qalghanliqi üchün 14 yilliq késilgen

Muxbirimiz shöhret hoshur
2021-07-05
Share
Rehime mehmut xanim: "Qayta terbiyelesh" namidiki "Yighiwélish lagéri" ning temidiki sim tiken soruq we közitish nuqtisi. 2018-Yili 4-séntebir, dawanching.
REUTERS

Qaraqashliq muhajirlardin biri radiyomizgha uchur yollap, yurti qaraqashning yawa yézisidiki bashlan'ghuch mektep oqutquchisi, pénsiyonér qéyyum meshrepning 70 yashqa yéqinlashqan waqtida 14 yilliq késiwétilgenlik uchurini melum qildi. Muxbirimizning qaraqashqa qarita élip barghan téléfon ziyaretliri dawamida, qéyyum meshrepning bir jüme namizida "Qanunsiz tebligh" anglap qalghanliqi üchün 14 yilliq késilgenli'iki, qizi patigül qéyyumning bolsa namelum sewep bilen 10 yilliq késiwétilgenliki delillendi

Qaraqashliq bir muhajirning inkas qilishiche, uning yawa yéza merkiziy bashlan'ghuch mektipidiki sabiq oqutquchisi qéyyum meshrep 2018-yilning axiri yéshi 70 ke yéqinlashqanda 14 yilliq késiwétilgen. Qaraqash nahiye yawa yéziliq bir saqchi xadimi bu yézida késiwétilgen yashan'ghanlar arisida qéyyum meshrep isimlik birsining bar-yoqluqi heqqidiki so'alimizgha jawap bermidi. Inkasta déyilishiche, 40 yilgha yéqin bashlan'ghuch mektep oqutquchisi bolup xizmet qilghan qéyyum meshrep 2010-yili pénsiyege chiqqan. U pénsiyonérliq hayatning tebi'iy bir parchisi süpitide mehellining jama'et pa'aliyetlirige toluq qatnashqan, toy-tökün, nezir-chiraqlardin qalmighan. 2014-Yili Uyghur rayonida atalmish "Diniy esebiylik" ke qarshi dolqun bashlan'ghanda, qaraqashning yawa yézisidimu eng deslepte diniy zatlar, uningdin kéyin ularning shagirtliri tutqun qilin'ghan bolsa, 2017-yili ene shu diniy zatlarning arqisida sep tutup namaz oqughanliki ahaliler tutup kétilgen, 2018-yiligha kelgende qéyyum meshrepke oxshash jama'etchilik yüzisdin diniy zatlar bilen bille olturup-qopup qalghan dölet kadirlirimu tutqun qilin'ghan.

Qaraqashning yawa yéziliq saqchixana bashliqi qéyyum meshrepning néme üchün késilgenliki we nede jaza mudditini ötewatqanliqi heqqidiki so'alimizgha jawap bérishni qopalliq bilen ret qildi. Emma u bu yézidin qéyyum meshrep isimlik bir pénsiyonér oqutquchining türmide ikenlikini inkar qilmidi.

Éniqlashlirimizning axirida aydinglishishiche, qéyyum meshrep 2013-yillarda mehellisidiki bir jüme namizida "Qanunsiz tebligh" qe qatniship qalghanliqi üchün 14 yilliq késiwétilgen. Bu yézidiki bir kent mudirining pash qilishiche, qéyyum meshrep nöwette qaraqashtiki bostanköl türmiside jaza mudditini ötimektiken.

Qaraqashliq muhajir pénsiyonér qéyyum meshrepning 4 perzenti barliqi we ularning ayrim öylük-ochaqliq ikenlikini bildürgen idi. Éniqlashlirimiz dawamida qéyyum meshrepning 40 nechche yashliq qizi patigül qéyyumning 10 yilliq késilgenliki aydinglashti.

Yuqiridabu yil yéshi 70 tin halqighan, 37 yilliq ma'aripchi qéyyum meshrepning bir jüme namizida atalmish "Qanunsiz tebligh" anglap qalghanliqi üchün 14 yilliq késilgenliki we qiziningmu namelum sewep bilen 10 yilliq késiwétilgenliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet