Xoten we qumuldiki yerlik kadirlar 90 pirsent kishining lagérdin qoyuwétilgenlikini ret qildi

Muxbirimiz shöhret hoshur
2019-07-31
Élxet
Pikir
Share
Print
Uyghur aptonom rayonining re'isi shöhret zakir muxbirlarning so'allirigha jawab bermekte. 2019-Yili 30-iyul, béyjing.
Uyghur aptonom rayonining re'isi shöhret zakir muxbirlarning so'allirigha jawab bermekte. 2019-Yili 30-iyul, béyjing.
AP

Tünügün Uyghur aptonom rayonining re'isi shöhret zakir béyjingda qilghan sözide atalmish "Terbiyelesh" tiki kishilerdin 90 pirsentining qoyup bérilgenlikini élan qilghan idi. Bügün muxbirimiz Uyghur rayonining herqaysi jaylirigha téléfon qilip, bu heqte éniqlash élip bardi. Netijide xotenning buzaq yéza 1-kenttin lagérgha élip kétilgen 250 kishidin hazirgha qeder obul yasin isimlik birla kishining qoyup bérilgenliki, qumuldiki bir ahaliler olturaq rayonidin lagérgha ekitilgen 100 che kishidin peqet 3 kishining qoyup bérilgenliki ashkarilandi. Xoten wilayetlik edliye idarisining bir xadimi nechche yüz ming kishining lagérda ikenliki ilgiri sürülüwatqan bu wilayette bir ayda peqet 30 etrapida kishining lagérdin chiqiwatqanliqini melum qildi.

Uyghur rayonining re'isi shöhret zakir ötken aylarda lagér heqqide bergen bayanatida lagérdiki kishilerning sani heqqide axbaratta déyiliwatqanlarning köptürme ikenlikini bayan qilghan bolsimu, emma u éniq sanni éghizgha élishqa jür'et qilalmighan idi. Shöhret zakir tünügünki sözidimu Uyghur rayonidiki lagérlarda éniq halda qanchilik kishi barliqini tilgha almighan. U peqet atalmish "Terbiyelesh" tikilerning 90 pirsentining qoyup bérilgenlikini ilgiri sürgen. Téléfonimizni qobul qilghan aqsu wilayetlik edliye idarisining xadimi lagérdikilerning qoyup bérilgen yaki bérilmigenliki heqqidiki so'alimizgha jawab bermidi.

Xoten wilayetlik edliye idarisining bir xadimimu shöhret zakirning yuqiriqi sözlirining toghra yaki xataliqi heqqide bir nerse déyelmidi.

"Beydu" uchur ambirida körsitilishiche, xotenning buzaq yézisi 17 kenttin teshkillen'gen bolup, 33 ming nopusqa ige iken. Buzaq yézisidiki bir saqchi xadimimu özining hazirgha qeder bu yézidiki herqandaq bir kenttin "Terbiyelesh" tiki ahalilirining köpinchisining qoyup bérilgenliki heqqide uchur anglap baqmighanliqini éytti. Bundaq bir uchurdin bir saqchi xadimining xewersiz qélishining mumkinsizlikini otturigha qoyghan bu saqchi xadimi u özi olturushluq hem mes'ul bolghan 1‏-kentte 1700 dek nopus barliqi, buningdin 250 che kishining "Terbiyelesh" te ikenliki, hazirgha qeder bulardin peqet obul yasin isimlik bireylenningla lagéridin qoyuwétilgenlikini ashkarilidi.

Qumul sheher ichidiki bir ahaliler komitétining xadimi özi ishleydighan bu ahaliler komitétida 500 dek nopus barliqi, buningdin yüz nechche kishining lagérgha ekétilgenliki, ikki yildin béri bulardin peqet 3 kishiningla qoyuwétilgenlikini ashkarilidi. Xoten sheher ichi sultanem mehellisidiki ahalilerdin biri özi olturuwatqan kochining lagér qurulghandin buyan quruqdilip qalghanliqi, kochidiki öylerge qulup séliqliq ikenliki, ta hazirghiche qoshnilirining héch birining öylirige qaytip kelmigenlikini bayan qildi.

Ilgiriki éniqlashlirimizdin melum bolushiche, xoten wilayiti lagér qurulushi eng baldur bashlan'ghan, tutqun qilish eng qattiq élip bérilghan bir wilayettur. Muhajirettiki Uyghur közetküchiler xoten wilayitide az dégende birqanche yüz ming kishining lagérda ikenlikini ilgiri sürmekte. Biz xoten wilayetlik edliye idarisige qayta téléfon qilghinimizda téléfonimizni qobul qilghan yene bir xadimmu köpinche kishilerning lagérdin qoyuwétilgenlikidek bir uchurdin xewersizlikini éytti. Biz uningdin konkrét halda künde yaki ayda wilayet boyiche qanchilik kishining atalmish "Terbiyelesh" tin qoyup bériliwatqanliqini sorighinimizda, u wilayet boyiche ayda aran 30 che kishining qoyup bériliwatqanliqini bayan qildi. Ötken aydiki éniqlashlirimiz dawamida, qoyuwétilgenlerning asasen dégüdek salametliki nacharlashqan we ölüm girdabigha kélip qalghan yaki yashan'ghanlar ikenliki melum bolghan idi. Bu yilning béshida téléfonimizni qobul qilghan kucha nahiye xaniqitam yéziliq bir saqchi xadimi bu yézidin hazirgha qeder 5000 che kishining lagérgha ekétilgenliki, emma biriningmu téxi qoyuwétilmigenlikini pash qilghan idi.

Yuqirida igilen'gen uchurlar Uyghur rayonining re'isi shöhret zakirning 90 pirsent kishi "Terbiyelesh" tin qoyuwétildi dégen sözlirining saxtiliqini delillimekte.

Toluq bet