Walibolchi ablet bawudunning tutulush we lagérda késel bolush sewebi heqqide uchur we perezler

Muxbirimiz shöhret hoshur
2020-10-07
Share
lager-yepiq-terbiyelesh-oginish.jpg Etrapi sim tor we qoralliq eskerler bilen qorshalghan "Terbiyelesh lagéri".
Social Media

Biz uchturpanda ikki yil lagérda yétip, ikki qoltuqida qosh hasa tayaq bilen chiqqan sabiq walibolchi ablet bawudun heqqide yenimu ilgirilep ehwal éniqlishimiz dawamida alaqidar kent saqchisi uning tutulush sewebini ashkarilidi. Ablet bawudunning késellik alametliri heqqide tehlil yürgüzgen tébbiy penler doktori jür'et obul ependi ablet bawudunning késel sewebi heqqiki perezlirini otturigha qoydi. U perezliri arisida ablet bawudunning belgilik ximiyewiy dora sinaqlirining ziyankeshlikige uchrighanliq éhtimalliqinimu chetke qaqmidi.

Walibolchi ablet bawudun heqqide yenimu ilgirilep ehwal éniqlishimiz dawamida, uchturpanning imamlirim yézisidiki bir kent saqchisi uni saghlam we qawul bir walibolchidin qosh hasa tayaqliq bir bimargha aylandurghan sewebning atalmish qol téléfondin chiqqan bir mesile ikenlikini ashkarilidi. Uning déyishiche, ablet bawudun qol téléfonigha "Ko'eyya" dep atilidighan bir "Qanunsiz yumshaq détal" ni chüshürgenliki üchün 2016-yili tutup kétilgen. Shu qétimliq tekshürüshte uning qilmishi diqqetsizlik dep qaralghan. Emma2017-yili lagérlar qurulghanda mezkur ehwal "Siyasiy mesile" dep qarilip, ablet bawudun lagérgha tashlan'ghan. Bu saqchi xadimimu ablet bawudunning eslide kentte boghaltir we katipliq qiliwatqanliqi, shunga yéziqchiliq ishlirida bezide tor meshghulatliridin paydilinidighanliqi, we bilip-bilmey torda cheklen'gen matériyallarni échip salghanliqini ilgiri sürdi.

Ablet bawudunni walibol meydanidin chaqirtip ekelgen we saqchilargha tapshurup bergen kent amanliq mudiri bolsa, ablet bawudunning atalmish "Xataliqi" ning yalghuz qanunsiz yumshaq détalni chüshürgenlikila emes, belki yene qol téléfonini bir walibolchi dostigha bérip turghanliqi we u dostining chet'eldiki tughqini bilen bu téléfonda körüshkenliki, buning soraq we tekshürüsh dawamida "Chet'el bilen qanunsiz sözlishishke wasitichi bolup bérish" dep qaralghanliqi we shu seweblikmu tutulghanliqini bayan qildi.

Mezkur saqchi xadimi ablet bawudunning salametlikining nöwette échinishliq ehwalda ikenlikini tekitlidi. Börek ze'iplishishning sewebliri heqqide qisqiche toxtalghan tébbiy mutexesis-méditsina penliri doktori jür'et obul saghlam bir walibolchining ikki yil lagérda yétip, qosh hasa tayaqliq bolup qélishining pewqul'adde bir ehwal ikenlikini tekitlidi. Biz mezkur kent amanliq mudiridin ablet bawudunning lagérdiki kamér we tamaq shara'itliri heqqide melumat soriduq. Bu xadim ablet bawudunning képillikte bolghanliqi üchün bu heqte melumat bérelmigenlikini eskertti.

Jür'et obulning qarishiche, ablet bawudun türmidiki ozuqlinishning nacharliqi sewbidin börekte ze'iplishish tughulghan bolushi mumkin iken. Nöwette washin'gtondiki bir doxturxanida xizmet qiliwatqan doktor jür'et obul ependi ablet bawudunning lagérda qéyin-qistaqqa uchrighan bolushi mumkinliki we tayaq zerbisidin börikining zeximlen'genlik éhtimalliqinimu otturigha qoydi.

U axirida ablet bawudunning xitay lagérlarda élip bériwatqan belgilik ximiyewiy dora siniqining ziyankeshlikige uchrighanliq éhtimalliqinimu chetke qaqmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.