Uchturpan imamlirimdiki jambizim kochisidin lagérgha ekétilgen 17 kishidin üchi ölgen, üchi méyip bolghan
2020.10.28
Radiyomizgha kelgen bir inkasqa asasen muxbirimizning éniqlashliri dawamida uchturpanning imamlirim yézisidiki uzunluqi bir kilométirche kélidighan, nopusi 180 etrapida bolghan jambizim namliq bir kochidin 3 yilning aldida 17 kishi lagérgha ekétilgen. Nöwette bulardin üchi lagérda jan üzgen, üchi lagérdin méyip chiqqan, besh nepiri késiwétilgen, ikki nepiri zawutqa yollan'ghan, qalghan 5 nepirining iz-dériki ghayib bolghan.
Uchturpanliq muhajirlardin biri radiyomizgha uchur yollap, yurti uchturpan imamlirimdiki jambizim namliq kichikkine bir kochidin 20 nechche kishining lagérgha ekétilgenliki we bulardin üch kishining lagérdin jesiti chiqqanliqini melum qilghan idi. Biz bu uchurni delillesh üchün uchturpan nahiyesi we uning imamlirim yézisidiki bir qisim alaqidar xadimlargha téléfon qilduq. Téléfonimizni qobul qilghan imamlirimdiki bir kent saqchisi mezkur inkasta déyilgen jambizim kochisining bir kilométirche uzaqliqta ikenliki we nopusining 180 etrapida ikenlikini ashkarilidi.
Uning déyishiche, imamlirimdiki12 -kent4 -guruppigha tewe bu kochidin ablikim niyaz, turghun memet, kérem raxman qatarliq 17 kishi lagérgha ekétilgen. Bulardin yéqinqi üch yil ichide üch kishining lagérdin jesiti chiqqan. Lagérda jan üzgen bu üch kishi 50 we 55 yashliq abdusalam niyaz we memet niyaz aka-ukilar we 45 yashliq turdi osman iken. Déhqanchiliqtin bashqa ish-oqiti bolmighan, her biri 5-6 janliq bir a'ilining dadisi bolghan bu üch kishining lagérgha élip kétilishtin burun saq-salamet kishiler ikenliki melum. Emma ularning lagérda néme sewebtin jan üzgenliki melum emes. Her üch kishi uchturpandiki kölimi eng chong bolghan, on mingdin artuq kishi qamalghanliqi ilgiri sürülüwatqan kongtey lagérida jan üzgen.
Mezkur kent saqchisining ashkarilishiche, bu 17 kishi ichidin enwer tewekkül, turdi xudiyem, ablet bawudun qatarliq 3 kishi méyip halette képillikke qoyup bérilgen. Bulardin enwer tewekkül öpke késilige, ablet bawudun börek késilige giriptar bolghan. Turdi xudiyemning putidin chataq chiqqan. Melum bolushiche, 20 bilen 30 yash arisidiki bu üch kishi boyi bir métir 80 santimétirdin égiz, éghirliqi normal, lagérgha élip kétilishtin awwal saghlam kishiler bolup, ularning konkrét néme sewebtin qisqighine üch yil ichide méyip haletke keltürülgenliki melum emes. Mezkur 17 kishidin arzugül semet we xanzöhre seyid'exmet aqsudiki zawutqa mejburi ishchiliqqa ewetilgen. Ablet ablikim, salam barat, kérem raxman qatarliq besh kishi üstidin késim késilip türmige yollan'ghan. 17 Kishidin qalghan 4 nepirining nöwette iz-dériki melum emes.
Bu kent saqchisining ashkarilishiche, mezkur 17 kishi olturushluq jambizim kochisi 12-kentning téxi lagérgha ekitilgenler nisbeten azraq bolghan 4-guruppsgha tewe bolup, 3 ming nopusluq bu kenttin késiwétilgenlerning sanila 200 etrapida iken.