Ghulja döngmazarda 40 yilliq partiye ezasi, 30 yilliq ayallar mudiri, 73 yashliq ruqiye osman 17 yilliq késiwétilgen

Muxbirimiz shöhret hoshur
2020.12.16
Ghulja döngmazarda 40 yilliq partiye ezasi, 30 yilliq ayallar mudiri, 73 yashliq ruqiye osman 17 yilliq késiwétilgen Etrapi sim tor we qoralliq eskerler bilen qorshalghan “Terbiyelesh lagéri”.
Social Media

Yash-qéri ayrimasliq, ötmüshidiki töhpisi bilen hésaplashmasliq peqetla xataliqini tartip achiqish-Uyghur rayonida yéqinqi 4 yilda dawam qilghan keng kölemlik tutqun herikitining xasliqliridin biridur. Ghulja nahiye döngmazar bazirida 40 yilliq partiye ezasi 73 yashliq ruqiye osman 17 yilliq késiwétilgen. Xitay soti sabiq ayallar mudiri ruqiye osmanning 30 yilliq xizmet tarixidiki töhpilirini nezerge almighan, uning peqet bir qétimliq teblighqe qatniship qalghanliqini uning teqdirini belgilesh üchün ölchem qilghan

Weziyettin xewerdar kishilerning bayan qilishiche, ghulja nahiyesining döngmazar bazirida 30 yil kent ayallar mudiri bolup aktip xizmet ishligen ruqiye osman, xizmet jeryanida pilanliq tughutqa emel qilmay qalghan köp sanda kishilerni soraq qilghan. Hamilidar ayallarni bala chüshürüsh opératsiyesi üchün doxturxanilargha yalap élip barghan. Muqimliqqa a'it köp sandiki atalmish “Jinayet yip uchliri” ni yuqiri derijilik alaqidar organlargha melum qilghan. U bu qilghanliri üchün yéza, nahiye we wilayet teripidin köp qétimlap mukapatlargha érishken. Emma 2017‏-yiligha kelgende umu mehelledashliri qatarida xitay dölet bixterlik küchlirining tömür orunduqigha olturghuzulup soraq qilin'ghan. Soraqta 10 yil awwal qatnashqan bir qétimliq ölüm murasimida tebligh anglap qalghanliqi üchün “Hésab” bergen. Ghulja nahiyesidiki alaqidar xadimlar, ruqiye osman heqqide gep échishtin özini tarrti. Inkas qilinishiche, shu chaghda 73 yashliq ruqiye osman soraq jeryanida özining 30 yildin artuq partiye we hökümetke qilghan xizmetlirini otturigha qoyghan؛ döwe-döwe guwahnamilirini körsetken؛ emma soraqta héchkim bu pakitlargha perwa qilmighan. U yenila béshigha qara xalta keydürülüp soraqaxanidin qamaqxanigha élip kétilgen.

Ghulja nahiyesidiki bir saqchixana bashliqi ruqiye osmanning délosini siyasiy qanun'gha mes'ul sékritarningla jawab béreleydighanliqini éytti. Biz bu saqchixana bashliqi teminligen téléfon nomurigha asasen ehwaldin xewerdar siyasiy-qanun xadimidin melumat soriduq. U döngmazar baziridin tutulghanlar arisida ruqiye osman isimlik biri barliqini delillidi.

Inkaschining bayanliridin melum bolushiche, ruqiye osman'ikkinchi qétimliq soraqta shu künki ölüm murasimigha paylaqchiliq üchün barghanliqini bildürüp, “Diniy esebiy” lerdin chégra ayrip baqqan bolsimu, saqchilar buninggha ishenmigen. Eksiche bu teblighni eyni waqitta doklat qilmighanliqi üchün, bu sözliri uning béshigha “Jinayetchini qanat astigha élish” tin ibaret téximu chong bir qalpaqning kiyilishige seweb bolghan we yéziliq qamaqxanidin nahiyelik qamaqxanigha yötkelgen.

Ruqiye osman nahiyediki soraqta u shu teblighghe qatnashqan yillarda teblighning cheklenmigenlikini tekitligen we teblighde ziyanliq bir mezmunni bayqimighanliqi üchün doklat qilmighanliqini bayan qilip, özini aqlighan. Emma soraq nöwiti bashqilargha yötkilip, béshigha qara xalta keydürülgen halatte qamaqxanigha yötkelgen.

Inkas qilinishiche, 2017-yili 6-ayda tutup kétilgen ruqiye osman, qamaqtiki 2 yilliq hayatida bir küni birliri kélip uqushmasliq bolghanliqini bildürüp qolidiki koyzini chiqiriwétishini kütüp yatqan. 2019-Yilining otturiliridasotqa tartilip, 17 yilliq késiwétilishini perez qilmighan. 50 Yilliq partiye ezasi ruqiye osman ghulja shehiriki baykül türmiside jaza mudditini ötimekte.

Xewer arxiplirimizdin körülüshiche, xitay da'iriliri 2017-yili korlada sabiq nemunichi sékrétar ziyawudun choruqni 82 yéshida tutqun qilghan. Turpan chatqalda 30 yilliq saqchixana bashliqi hebibulla abdulnimu 80 yéshida lagérgha eketken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.