Лагерда ашқазинидин мәсилә чиққан шаһзадигүл төмүр мәҗбурий әмгәк мәйданида һаятидин айрилған

Мухбиримиз шөһрәт һошур
2021-12-27
Share
Корлада лагерға тизимлитишни рәт қилған әркин сулайманниң сақчиханидин җәсити чиққан Хитай сақчилири даванчиңдики 3-номурлуқ тутуп туруш мәркизиниң сиртқи кириш еғизида поста туруватқан көрүнүш. 3-Номурлуқ тутуп туруш мәркизи хитай бойичә әң чоң болуп, ватикан шәһириниң икки һәссисигә тоғра келиду. 2021-Йили 23-апрел.
AP

Өткән һәптә радийомизға кәлгән бир намсиз инкаста тоқсун наһийәсиниң бостан йезисидин лагерға елип кетилгән шаһзадигүл төмүр исимлик бир аялниң бултур 9-айда мәҗбурий әмгәккә селиниватқан бир фабрикада һаятидин айрилғанлиқи баян қилинған. Хәттә дейилишичә, шаһзадигүл төмүр лагерға әкитилип бир йилдин кейин ашқазини ағришқа башлиған. Шаһзадигүл саламәтликидики бу өзгиришни лагер мәсуллириға мәлум қилғнида, мәсул хадимлар униң бу хил шикайәтлириниң тунҗи қетим әмәсликини тилға елип, униң шикайитигә пәрва қилмиған. Нәтиҗидә ашқазан ағриқи барғансери еғирлишип бултур9-айға кәлгәндә мәҗбурий әмгәк мәйданида қан қусуп һушидин кәткән вә һаятидин айриған. Мухбиримизниң телефон зиярәтлири давамида мәзкур өлүм хәвәриниң тоғрилиқи дәлилләнди.

Вәзийәттин хәвәрдар кишиниң радийомизға инкас қилишичә, шаһзадигүл төмүр тоқсун наһийәсиниң бостан йезисидин болуп, у 2018-йилиниң оттурилири лагерға әкитилгән вә өткән йили 9-айларда лагердин җәсити чиққан. Дейилишичә, у саламәтликидин мәсилә чиқип җан үзгән мәзгилидә тоқсунниң алғуй йезисидики бир пайпақ завутида, зор бир түркүм лагер тутқунлири билән бирликтә мәҗбури әмгәккә селиниватқан икән. Биз бу учурниң тоғрилиқини айдиңлаштуруш үчүн тоқсун наһийәлик вә бостан йезилиқ алақидар идарә оранларға телефон қилдуқ.

Радийомизға кәлгән инкаста йәнә шаһзадигүлниң саламәтлик әһвали һәққидә мунулар қәйт қилинған: әзәлдинла тамақ иштиһаси яхши болмиған шаһзадигүл төмүр лагерға әкитилгәндин кейин, хели күнләргичә гелидин тамақ өтмигән. Бу әһвал лагер хадимлири тәрипидин “ачлиқ елан қилиш” дәп қарилип, униң техиму қаттиқ сорақ қилиниши вә қейин-қистаққа елинишиға сәвәп болған. Униң бурундин бар болған тамақ таллаш адитини чүшәндүрүшкиму пурсәт болмиған.

Биз бостан йезисидики алақидар хадимларниң биридин “бу йезида өткән йили җоңтәй лагеридики иш мәйданида җан үзгән аял ким?” дәп сориғинимизда, у “шаһзадигүл төмүр” дәп җавап бәрди, әмма у шаһзадигүлниң лагерға тутулушниң алди-кәйнидики саламәтлик әһвали һәққидә мәлумат бәрмиди.

Инкаста дейилишичә, лагердики соал-сорақ вә қейин-қситақтин кейин, шаһзадигүл лагер тамақлириға қаримаққа көнгәндәк қилған болсиму, әмма ашқазинида бир мәзгил биарамчилиқ давам қилған, кейинчә қаттиқ ағришқа башлиған. Әмма шаһзадигүл саламәтликидики бу начарлишишни лагер хадимлириға доклат қилишқиму петиналмиған. Арилиқта қусуп-яндуруп йүргинидә лагер хадимлири әһвалға шаһит болған болсиму, әмма хадимлар йәнила шаһзадигүлниң раст ағрилқиқиға гуман билән қариған. У ахириқи қетим иш мәйданиға елип меңилғанда, өзиниң беши қейиватқанлиқи вә мағдурсизлиқини билдүргән болсиму, хадимлар миңларчә мәҗбурий ишчи қатарида униму сәпкә тизилдуруп иш мәйдаиға елип барған. Инкаста дейлишичә, у өзи ишләватқан пайпақ завутида ишқа чүшүп икки саәттин кейин һушидин кәткән вә қан-қусуп йәргә йеқилған. Хадимлар уни лагер дохтурханисиға елип берип әһвалниң хәтәрликини көргән, ахирида уни йол үстидики бир йеза дохтурханисиға елип киргән, әмма у бу дохтурханида қутқузушқа өлгүрмәй һаятидин айрилған.

Тоқсундики сақчи хадимлиридин бири, шаһзадигүл төмүрниң лагердин дохтурханиға апирилғанлиқи вә давалаш карға кәлмигәндин кейин, өйигә қайтурулуп өйидә җан үзгәнликини тилға алди. Мәзкур хадим йәнә шаһзадигүл мәҗбурий әмгәккә селинған завутниң пайпақ завути икәнликиниму дәлиллиди.

У йәнә шаһзадигүл төмүрниң “өпкисидин мәсилә чиқти” дәп аңлиғанлиқи, әмма диягноз вә кесәл тарихини көрүп бақмиғанлиқи үчүн, униң ашқазан кесилидин хәвири йоқлуқини ейтти.

Илгири зияритимизни қобул қилған бир лагер сақчси лагердикиләрниң тамақ таллаш һоқуқи йоқлуқи, алдиға кәлгән тамақни йейишкә мәҗбур икәнликини, мәҗбури йегүзлгән бу тамақларниң уларниң саламәтликигә көрситидиған тәсири билән һесаплашмайдиғанлиқини ашкарилған иди. Тиббий мутәхәссисләрму лагерниң тамақ шараитиниң көп сандики тутқунларниң зәиплишиши вә саламәтликиниң керәктин чиқишиға сәвәб болуватқанлиқини пәрәз қилишқан иди.

Юқурида лагер тутқуни шаһзадигүл төмүрниң лагерда ашқазинидин мәсилә чиққанлиқи вә мәҗбурий әмгәккә селиниватқан фабрикада җан үзгәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт