Ghulja ara'östengde ikki kishining qamal mezgilide achliqtin ölgenliki delillendi

Muxbirimiz shöhret hoshur
2022.09.09
Share on WhatsApp
Share on WhatsApp
Ghulja ara'östengde ikki kishining qamal mezgilide achliqtin ölgenliki delillendi Ghuljadiki ahalilerning qamal mezgilide achliq krizisigha duch kelgenliki üchün naraziliq bildürmekte. 2022-Yili séntebir.
Social Media/Tiktok

Ghuljada bir qisim ahalilerning achliq krizisigha duch kelgenliki we buning ölüm-yétim ishlirigha sewep bolghanliqi ijtima'iy taratqularda izchil halda xewer qilinmaqta.

Muxbirimizning bu heqtiki éniqlashliri dawamida, ghuljaning ara'östeng yézisida ikki kishining mushu qétimliq qamal mezgilide achliqtin ölgenliki delillendi.

Biz ghuljadiki ahalilerning qamal mezgilidiki qiyinchiliqliri heqqide melumat élish üchün, asasiy qatlamlardiki bir qisim ahalilerge téléfon qilduq. Téléfonimizgha éhtiyat bilen jawap bergen ahaliler öz turmushining normal ikenlikini bayan qildi. Halbuki, ijtima'iy taratqularda ahalilerning achliq krizisige duch kelgenliki we bu krizisining ölüm-yétim ishlirigha yol échiwatqanliqi heqqide uchurlar tarqalmaqta.

Ghuljadiki qamal mezgilide wirusning aldini élish xadimliri kochilarda charlap yürgen körünüsh. 2022-Yili séntebir.
Ghuljadiki qamal mezgilide wirusning aldini élish xadimliri kochilarda charlap yürgen körünüsh. 2022-Yili séntebir.
Social Media/Tiktok

Ahalilerdin biri, ghulja nahiyesining ara'östeng yézisida ikki kishining mushu qétimliq qamal mezgilide ozuq-tölük we dora yétishmesliktin jan üzgenlikini tilgha aldi. Téléfonimizni qobul qilghan mezkur yéza gürkiretme kentining qoghdash xadimi, bu yézida ikki kishining qamal mezgilide jan üzgenlikini inkar qilmidi, emma u bu ikki kishining kimlikliri heqqidiki so'alimizgha, bu yézida 12 kent barliqi, ahalilirining hemmisini tonumaydighanliqini bahane qilip körsitip, bu heqte jawap bérish üchün alaqidar mes'ul xadimlardin melumat élishimiz kéreklikini tilgha aldi. Biz uningdin bu ikki kishining konkirét ölüm sewebini sorighinimizdimu, u bu heqte alaqidar mes'ul xadimlardin melumat almay turup jawap bérelmeydighanliqini éytti.

Téléfonimizni qobul qilghan gürkiretme kentining bir xadimimu, özining xizmetke yéngi ikenlikini seweb qilip körsitip, ikki kishining ölümi heqqidiki so'alimizgha jawab bermidi.

Axirida téléfonimizni qobul qilghan kent ayallar mudiri, yézida achliq krizisidin ölgen ikki kishining biri er, biri ayal ikenlikini ashkarilidi. U ölgen er kishining sawut tursun isimlik birsi ikenliki, uning ozuq-tölük we dora qéyinchiliqigha duch kélip, 10 kündin kéyin hayatidin ayrilghanliqini delillidi. U yene bu mehellide yéqinqi 10 kün ichide ölgen yene bir kishining gülbehrem isimlik bir déhqan ayal ikenlikini ashkarilidi. Mezkur ikki ölüm heqqide deslepte yip uchi bergen ahale, ölgüchilerdin birining dorsi yétishmeslik, yene birsining bolsa qamal keltürüp chiqarghan bir xapiliqlar seweblik jan üzgenlikini, bu xapiliqtin ölgüchining eslide yoshurun yürek késili bar ikenlikini ilgiri sürgen idi. Mezkur ayallar mudiri, sawut tursunning yürek késli qozghilip ölgenlikini ashkarilidi, emma gülbehremning ölümi heqqide melumati yoqluqini éytti.

Yene ilgirilep élip barghan éniqlashlirimiz dawamida bir kent xadimi ara'östengdiki mezkur ikki kishining achliqtin ölgenlikini delillidi.

So'al: tewelikingizdiki gülbehrem dégen ayaldin hal sorap barghan waqtingiz barmu?

Jawap: u bek az gep qilidighan ayal, peqet dert éytmaydu?

So'a: undaqta, uyaqning achliqtin ölgenliki rast oxshimamdu?

Jawap: choqum shundaq dep bilimen.

So'al: undaqta, sawut tursunchu ?

Jawap: u akimizmu ozuq-tölük yétishmey achliqtin ölgen.

Hörmetlik radiyo anglighuchilar, tönügün torgha chiqqan uchurda bir a'ilidin 4 ösmür balining éghir aghrip hayati xeterlik basquchta turiwatqanliqi shikayet qilin'ghan idi. Bügünki bir uchurda bir ösmür qizning öyide yalghuz jan üzgenliki inkas qilin'ghan.

Ötken heptidiki éniqlashlirimizda, ghulja nahiyesining qarayaghach yézisidiki mewlan sidiq dégen kishining qamal mezgilide dorisi waqtida yétip kelmigenliki üchün jan üzgenliki ashkarilan'ghan idi. Alaqidar xadimlardin biri, ghulja nahiyeside az dégende 12 kishining qamal keltürüp chiqarghan qiyinchiliqlardin jan üzgenlikini tilgha alghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.