Saqchi xadimi: trénér alimjan maxmut “Saqalliq kishiler bilen munasiwet qilghanliqi” üchün tutuldi

Muxbirimiz shöhret hoshur
2022-03-14
Share
turme-siyasiy-mehbus.jpg Jinayetchilerni tutup turush merkizining derwazisi. Yerlik kishiler éytishiche, bu orun siyasiy jinayetchiler üchün ishlitilidiken. 2017-Yili 2-noyabir, korla.
AP

Norwégiyediki “Uyghuryar” fondi élan qilghan tutqundiki mesh'el kötürgüchiler tizimlikide qeshqer tenterbiye mektipining oqutquchisi, tonulghan walibolchi, dölet derijilik trénér alimjan maxmutningmu ismi bar idi. Muxbirimizning téléfon ziyaretliri dawamida, alaqidar bir xadim alimjan maxmutning “Saqalliq kishiler bilen munasiwet qilghan” liqi üchün tutqun qilin'ghanliqini ashkarilidi

Norwégiyediki “Uyghuryar” fondi élan qilghan “Tutqundiki mesh'el kötürgüchiler” tizimlikide qeshqerdin 8 kishining ismi tilgha élin'ghan idi. Bular tenherketchilerdin patigül qadir, alimjan maxmut, yasinjan awut, jumaxun memet, nur'éli memetlerdin bashqa yene doxtur abduqéyyum semet bilen emeldar adil abduréhimnimu öz ichige alghan idi. Bu tizimlik üstidiki éniqlashlirimiz dawamida, ötken heptilerde adil abduréhim bilen abduqéyyum semetning tutqunda ikenliki delillen'gen idi. Bügün bulardin tonulghan walibolchi alimjan maxmut heqqide melumat élish üchün, uning xizmet orni bolghan qeshqer wilayetlik tenterbiye mektipige téléfon qilduq. Téléfonimizni qobul qilghan bir nöwetchi xadim, Uyghurche soralghan so'allirimizgha xitayche jawap bérip, bu mektepte tutqun qilin'ghan bir oqutquchi yoq ikenlikini ilgiri sürdi.

“Uyghuryar” fondining yétekchisi, pa'aliyetchi abduweli ayupning bayan qilishiche, mezkur mekteptin tutqun qilin'ghan az dégende6 ‏-7 neper oqutquchi bar bolup, bulardin ikkisi ézizjan we ézizqari isimlik ikki neper walibol oqutquchisi iken. Mezkur mekteptin téléfonimizni qobul qilghan yene bir xadim, trénér alimjan maxmutning isimini tilgha élishimiz bilen, so'allirimizgha jawap bérishtin waz kechti.

Uyghur rayonida2017 ‏-yili bashlan'ghan chong tutqunda, yillardin béri tutqun'gha seweb bolup kelgen atalmish “Bölgünchilik” we “Diniy esebiylik” alametlirdin bashqa yene jem'iyette belgilik izzet-hörmetke ige bolushmu, herxil bahaniler bilen tutqun'gha seweb bolghan.

Abduweli ayupning bayan qilishiche, trénér alimjan maxmut, tenterbiye sahesidiki mahariti we tejribisi bilenla emes, belki yene terbiyeligen shagirtlirining köpliki we serxilliqi, shundaqla ijtima'iy munasetlerdiki aktipliqi bilenmu jem'iyette tonulghan we hörmet qazan'ghan iken. 2017 ‏-Yildiki chong tutqunda jem'iyette melum tesirge ige kishilerning eng bashta tutulghanliqini eskertken abduweli ayup, alimjan maxmutiningmu tutulushida, uning jem'iyettiki tesir küchining seweb bolghanliqini ilgiri sürdi.

Téléfonimizni qobul qilghan tewelikitiki saqchi xadimi, trénér alimjan maxmutining tutqunda ikenliki bilen birlikte, uning tutulush sewebinimu ashkarilidi. Melum bolushiche, uning tutulushigha “Saqaqlliq kishiler bilen munaswiwet qilghan” liqi seweb bolghan iken.

Ilgiri künes nahiyesining araltöpe yézisidiki tutqunlar heqqide élip barghan éniqlashlirimiz dawamida, mezkur teweliktin bir türküm tutqunlarning “Chékiti bar kishilerdin téléfon kelgen” liki üchün tutulghan'ghliqi melum bolghan. Ilgiriki éniqlashlirimizda yene ghuljadiki ataqliq chaqchaqchi rozaxunningmu “Téléfonigha nuqtiliq kishilerdin téléfon kelgen” liki üchün tutqun qilinip, bir mezgildin kéyin qoyup bérilgenliki melum bolghan idi.

“Uyghuryar” fondining “Tutqundiki mesh'elchiler tzimliki” de qeyt qilinishiche, trénér alimjan maxmut2017 ‏-yili tutqun qilinip, bir yildin kéyin 8 yilliq késiwétilgen, u nöwette aqsudiki bir türmide jaza mudditini ötimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet