Xitay konsulxanisidin ikki Uyghurgha jawap: "Bölgünchilerge qétilghanliqing üchün ata-anang séning bilen sözlishishni ret qildi"

Muxbirimiz shöhret hoshur
2020-02-14
Élxet
Pikir
Share
Print
Ömer hemdulla tutqundiki a'ile ezaliri heqqide guwahliq bermekte.
Ömer hemdulla tutqundiki a'ile ezaliri heqqide guwahliq bermekte.
Photo: RFA

Melum bolushiche, tutqundiki a'ile-ezaliri heqqide axbaratta guwahliq bergen istanbuldiki ikki Uyghur muhajir bu hepte xitay konsulxanisidin kütülmigen bir téléfon tapshruwalghan. Téléfonda bulargha a'ilisining ehwali heqqide melumat béridighanliqini éytqan mezkur xadim her ikki muhajirgha a'ile ezaliridin bir qismining késilip ketkenlikini resmiy uqturghan. Andin türme sirtidiki a'ile-ezalirining "Ular chet'elde bölgünchilik bilen shughullan'ghanliqi üchün ular bilen sözlishishni ret qilghanliqi" ni éytqan.

Hörmetlik radiyo anglighuchilar, türkiyediki Uyghur muhajirlardin ömer hemdul bilen jewlan shirmemet yéqinda ijtima'iy axbaratlarda bayanat élan qilip tutqundiki a'ile ezaliri heqqide guwahliq bergen idi. Ularning bayanatidiki uchurlar radiyomiz we bashqa xelq'ara taratqular teripidin xewer qilin'ghan idi. Bayanat élan qilishtin awwal pütün so'allirini jawabsiz qaldurghan istanbuldiki xitay konsulxanisi yéqinda bu ikki muhajirni özlikidin izdep, ularning a'ile ezalirining ehwali heqqide qismen jawap bergen. 

Bu ikki muhajir radiyomizgha teminligen töwendiki awaz xatirisidin melum bolushiche, konsulxana xadimi ömer hemdullagha bergen jawabida uning ikki akisi, korladiki roza haji soda shirkitining we chilanbagh sariyining sahibi rozi hemdulla bilen muhemmed hemdullaning késilgenlik uchurini deliligen. Mezkur xadim jewlan shirmemetke bergen jawabidimu uning apisining atalmish "Térorchi" largha yardem bergenliki üchün késilip ketkenlikini uqturghan. Emma ularning jaza mudditi heqqide melumat bermigen. 

Konsulxana xadimi jewlan shirmemetke dadisi we inisining nöwette lagérda emeslikini uqturush bilen birlikte uning "Türkiye we misirda bölgünchilik pa'aliyetlirige qétilghanliqi üchün ata-anisining uning bilen sözlishishni ret qilghanliqi" ni uqturghan. Jewlan özining misirgha bérip baqmighanliqi, türkiyedimu oqush we tijarettin bashqa ishqa arilashmighanliqini bildürgende mezkur xadim özlirining bu uchurni dölet ichidiki alaqidar xadimlardin igiligenlikini uqturghan. 

Jewlan shirmemet bilen ömer hemdulla konsulxana xadimidin téléfon tapshuriwérilish jeryani heqqide tepsiliy melumat berdi.

Ömer hemdul söhbitimiz dawamida bir ata-ananining öz perzenti bilen sözlishishni ret qilishning mumkin emesliki, buning insan tebi'itige uyghun emeslikini tekitlesh bilen birlikte xitay terepning özlirining éghizini tuwaqlash üchün tehdit arilash uchur yetküziwatqanliqini ilgiri sürdi. Jewlan shirmemet eger dadisi bilen inisining özi bilen sözlishishni ret qilghanliqi rast bolsa, buning bir xalimasliq yaki qarshiliqtin emes, belki wehimidin ikenklikini, ularning lagérdiki mezgilde ilgiri özi bilen téléfonda sözleshkenliki üchün éghir ten jazasigha uchrighanliq éhtimalliqini otturigha qoydi. U yene dadisining salametlik ehwali özi bilen sözleshküdek derijide bolmighanliqi üchün da'irilerning bu yalghanni toqup chiqqanliq éhtimalliqinimu tilgha aldi. 

Her ikki muhajir xitay konsulxanisining tehditige perwa qilmaydighanliqi, a'ile ezaliri we lagérdikiler erkinlikke érishmigüche bu zulumni dunyagha pash qilishni toxtatmaydighanliqini bildürdi.

Toluq bet