Tyenjin soda uniwérsitétining tutqundiki ikki oqughuchisining qarimaydiki "Terbiyelesh merkizi" de ikenliki aydinglashti

Muxbirimiz shöhret hoshur
2020-10-23
Share
lager-Karamay-city-prison.jpg Qaramay shehirige sélin'ghan yighiwélish lagéri. 2018-Yili 20-awghust.
bitterwinter.org

Muxbirimizning ötken heptilerdiki éniqlashliri dawamida tyenjin soda uniwérsitétining ghayip ikki Uyghur oqughuchisining qarimay saqchiliri teripidin tutqunda ikenliki delillen'genidi. Muxbirimizning ilgirilep élip barghan éniqlashliri dawamida ularning qol téléfonidin atalmish mesile chiqqanliqi üchün tutulghanliqi we nöwette qarimaydiki bir "Terbiyelesh merkizi" de tutup turiliwatqanliqi aydinglashti. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radi'o anglighuchilar, tyenjin soda uniwérsitétida ghayip bolup ketken ikki Uyghur oqughuchining tetilde yurti qarimaygha barghandin kéyin tutqun qilin'ghanliqi delillen'gendin kéyin, biz bu ikki oqughuchining néme üchün tutulghanliqi we nede tutup turiliwatqanliqi heqqide ilgirilep éniqlash élip barduq. Tyenjin uniwérsitétining bir mes'ul xadimi zikrulla we qedirdin isimlik ikki oqughuchisining mekteptin saq-salamet yurtigha qaytqanliqi, emma tetil toshup ikki ayche waqit ötken bolsimu, bu ikki oqughuchining téxiche mektepke qaytip kelmigenliki we bularning teqdiridin özlirining endishe qiliwatqanliqini bildürdi. Bu ikki ghayip oqughuchi heqqide radiyomizgha kelgen inkasta, ularning qol téléfonliridin mesile chiqqanliqi, yeni qarimay saqchiliri ularning qol téléfonlirini tekshürüsh dawamida, atalmish qanunsiz diniy matériyallarni uchratqanliqi we mushu seweblik tutqun qilin'ghanliqini melum qilghanidi. Inkasta déyilishiche bu ikki oqughuchi tutup kétilgendin kéyin ularning nede tutup turiliwatqanliqidin a'ile-tawi'abatlirimu uchur alalmighan. Inkasta yene ularning diniy esebiylik gumani bilen tutulghanliqi we shunga atalmish terbiyelesh merkezlirige ekétilgenlik éhtimalliqi eskertilgenidi. Shunga biz qarimay saqchilirigha téléfon qilip, bu ikki oqughuchining tutulush sewebi heqqide melumat soriduq. Saqchilar bu heqte melumat bérishni izchil halda ret qildi. 

Tyenjin uniwérsitéti xadimliri, özlirining tyenjin saqchiliri arqiliq, mezkur ikki oqughuchining tutqunda ikenliki heqqide éniq melumat alghanliqi, emma néme üchün tutulghanliqi heqqide uchur alalmighanliqini éytti. Mezkur xadim, tutqundiki oqughuchiliri zikrulla we qedirdinning sawaqdashliridin anglighanlirigha asasen, ularning qol téléfonidin chiqqan belgilimige xilap bir matériyallar seweblik tutulghanliqini tilgha aldi؛ emma u bu oqughuchilirining nede tutup turiliwatqanliqi heqqide uchur alalmaywatqanliqini tekitlidi. Biz bu heqte uchur élish üchün qarimay sheherlik ma'arip idarisigha téléfon qilduq we qolimizdiki yip uchlirigha asasen, tyenjin uniwérsitétidin tetilge kelgen we terbiyeleshke e'ikitilgen ikki oqughuchining kim ikenlikini soriduq؛ bu xadim, bularning isimining zikrulla we qedirdin ikenlikini bildürdi we ularning terbiyeleshte ikenlikini ret qilmidi. Bu xadim yene mezkur ikki oqughuchining téléfonidin belgilimige xilap matériyallar chiqqanliqi üchün bu yil 7 ‏-ayning birinchi heptisi tutulghanliqini delillidi. Biz arqidin tyenjin uniwérsitétigha qayta téléfon qilip, mezkur ikki oqughuchining nöwette qeyerde tutup turiliwatqanliqini tekrar soriduq. Alaqidar xadim, bularning qarimay shehiridiki bir "Terbiyelesh merkizi" de ikenliki we bu uchurni saqchi organliridin uqqanliqini ashkarilidi. 

Bizge kelgen inkasta, mezkur ikki oqughuchining oquwatqan kespi heqqide melumat bérilmigenidi. Biz mektepning yene bir xadimidin qarimaydiki terbiyelesh merkizide tutup turiliwatqan mezkur ikki oqughuchisining tyenjin uniwérsitétida oquwatqan kespiy heqqide melumat soriduq؛ mezkur xadim, buning oqughuchilarning shexsiy uchurigha yatidighanliqini eskertip melumat bérishni ret qildi. Bu ikki oqughuchining uniwérsitétning qanchinchi yilliq oqughuchisi ikenlikinimu dep bermidi. 

Yene éniqlashlirimiz dawamida, tyenjin uniwérsitétidin yurtigha qaytip ghayip bolup ketken oqughuchilarning yalghuz zikrulla bilen qedirdinla emesliki, mesilen qarimayning özidila, bu ikki oqughuchigha chétilip yene birnechche oqughuchiningmu tutqun qilin'ghanliqi melum boldi؛ emma ularning kimliki we aqiwiti hazirche melum emes. 

Hörmetlik radi'o anglighuchilar, yuqirida tyenjin uniwérsitétidin ghayip bolup ketken ikki Uyghur oqughuchining qarighandiki bir "Terbiyelesh merkizi" de ikenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.