Xoten pédagogika aliy téxnikomining 50 ke yéqin oqutquchisining tutulghanliqi ashkarilandi

Muxbirimiz shöhret hoshur
2019-12-13
Élxet
Pikir
Share
Print
Muhajirettiki tetqiqatchi abduweli ayup teripidin teyyarlan'ghan "Tutqundiki ziyaliylar tizimliki" diki bir qisim ziyalilar.
Muhajirettiki tetqiqatchi abduweli ayup teripidin teyyarlan'ghan "Tutqundiki ziyaliylar tizimliki" diki bir qisim ziyalilar.
Sintash Media (Behram Sintash)

Muxbirimizning xoten'ge qarita élip barghan téléfon ziyaretliri dawamida 500 etrapida ishchi-xizmetchisi bolghan xoten pédagogika aliy téxnikomining 50 ke yéqin oqutquchi we memuriy xadimlirining tutqunda ikenliki, bularning ichide yéshi 70 tin ashqan pénsiyonérlarningmu barliqi ashkarilandi. Melum bolushiche, mezkur mektepning ishchi-xizmetchilirining yérimdin köpreki Uyghur bolup, tutulghanlar mezkur mekteptiki pütkül Uyghur oqutquchilar qoshunining 15 pirsentige yétidiken.

Hörmetlik radiyo anglighuchilar, ötken aylarda torlarda tarqalghan we ürümchidiki melum bir oniwérsitétning siyasiy öginish yighinining neq meydan xatirisi ikenliki ilgiri sürülgen bir awaz xatiriside ma'arip sahesidin köp sanda Uyghur oqutquchilarning tutqunda ikenliki ashkarilan'ghan idi. 

Biz ötken hepte xoten pédagogika aliy téxnikomining ikki mudirining tutqunda ikenliki éniqlap bolghandin kéyin, tutqundiki oqutquchilarning omumiy sani we ehwali heqqidimu éniqlash élip berduq. Mezkur mektep xadimi teminligen alaqe uchurlirigha asasen xotendiki ma'arip sahesige mes'ul bir sabiq siyasiy qanun kadiridin tutqundiki ikki mudirdin bashqa yene kimlerning tutqunda ikenlikini soriduq. 

U sha'ir muxter süpürge we enwer hoshur qatarliq 50 yéqin oqutquchi we memuriy xadimning nöwette kériye türmiside ikenlikini ashkarilidi. 16 ‏-Noyabir xelq'aragha ashkarilan'ghan xitayning lagérlar heqqidiki mexpiy höjjetliride lagérgha adem tutushta yash cheklimisi yoqliqi éniq bayan qilin'ghan idi. 

Ötken yili qeshqer Uyghur neshiriyatidin 30 pirsent ishchi-xizmetchining tutqunda ikenliki ashkarilan'ghandimu bularning ichide yéshi 70tin halqighan ilgiriki 3 neper sabiq neshiriyat bashliqining barliqi melum bolghan idi. Xoten pédagogika aliy téxnikomidin tutqun qilin'ghanlar arisidimu pénsiyonérlardin az dégende 5 nepiri barliqi, bularning ilgiri yuquri derijilik memuri xizmetler ötigenliki, ulardin bezilirining nöwette salametlikining nachar ehwalda ikenliki ashkarilandi. 

Muhajirettiki pa'aliyetchi we tetqiqatchi abduweli ayup teripidin teyyarlan'ghan "Tutqundiki ziyaliylar tizimliki" de mu'awin mudiri barat tursunbaqidin bashqa proféssor ömerjan nuri we oqughuchilar bashqarmisining bashliqi jür'et döletlerningmu isimliri orun alghan. Mezkur siyasiy-qanun kadiri jür'et döletningmu tutqundikiler arsida barliqini delillidi. 

Hörmetlik radiyo anglighuchilar, biz ötken hepte mezkur mektepning ikki mudirining kériye türmiside ikenlikini xewer qilghandin kéyin weziyettin xewerdar kishiler radiyomizgha uchur yollap, kériye türmisining xoten'ge qarimaydighanliqi we aptonum rayun teripidin biwasite bashqurulidighanliqini melum qilghan idi. Mezkur sabiq siyasiy-qanun kadirimu xoten pédagogika aliy téxnikomi biwaste ma'arip nazaritige qarighanliqi üchün tutqunlarning xotendiki saqchi organliri teripidin emes, belki aptonum rayondki dölet amanliq saqchiliri teripidin tutup tekshürülgenlikini melum qildi.

Toluq bet